［愛情純愛］我地之間嘅友誼純度絕對等於零！！！: 37. 「早安！」

「李逸彤⋯」邱旻顥快速地抄完佢要抄嘅嘢，然後將書遞番比李逸彤

「嗯。」李逸彤輕嗯一聲，連頭都冇擰過去，只係伸手接住本書

「今日心情唔好⋯？」邱旻顥喺心裏疑惑地問道，「望都唔望我⋯」

「叮噹叮噹⋯叮噹叮噹～」

落堂到咗小息時，邱旻顥見李逸彤坐喺位執嘢，佢伸手試探般拍一拍李逸彤嘅膊頭





「買唔買嘢飲呀？」邱旻顥問道

「唔飲。」李逸彤用着淡然嘅聲線回答道

「你⋯今日心情唔好呀？」邱旻顥小心翼翼地提問道，佢都唔知李逸彤到底因為咩原因，突然就嬲咗一樣

「係掛⋯」李逸彤靜咗一秒後，緩緩地開口回答道

邱旻顥若有所思地望住李逸彤嘅背影，佢嘅內心暗暗地覺得好似係自己做錯咗啲咩激嬲咗眼前人一樣





「今日我都只係早咗番嚟呀⋯」邱旻顥開始獨自猜測起嚟，「係咪真係我做咗啲咩令佢心情唔好⋯？」

「彤彤～你要唔要買嘢食呀？」沈心怡行到去李逸彤嘅旁邊問道

「唔洗呀～」李逸彤笑了笑講道，坐喺佢後面嘅邱旻顥更敢肯定，絕對係自己做咗啲咩激嬲咗李逸彤，「你去買啦～」

「咁我同阿諭去買嘢食啦～」沈心怡講完後轉身朝課室門口行去，同潘景諭匯合

「佢今日真係望都冇望過我呀⋯！」邱旻顥嘅心裏有少許著急，「一眼都冇望過我！今朝早佢番到嚟連早晨都冇同我講⋯！」





邱旻顥諗起李逸彤番嚟嘅時候冇同自己講早晨，頓時靈機一動，諗到啲咩一樣

「我今日⋯好似冇同佢講早晨⋯」邱旻顥喺心裏有種恍然大悟一樣嘅感覺，同時有啲無言以對嘅感覺，「佢因為我冇同佢講早晨所以⋯嬲咗我⋯？」

邱旻顥耷低頭，皺起眉頭後伸手拍咗自己嘅額頭兩下

「今日趕住番嚟拎書做功課⋯都唔記得咗⋯！」邱旻顥喺心裏苦惱地講道，「點算⋯」

邱旻顥抬眼望住坐喺佢正前方嘅李逸彤，李逸彤正耷低頭睇緊手機；邱旻顥拎出手機，喺IG send咗個message比李逸彤

「早晨」

本來就睇緊手機嘅李逸彤，當然會見到喺上面彈出嚟嘅通知，李逸彤瞄咗通知一樣，然後㩒咗入去

李逸彤：？





「我今日趕住番嚟做功課嘛⋯」邱旻顥投降般講道，「一時唔記得咗⋯」

李逸彤：唔記得咩呀

「宜家補講番」邱旻顥回覆道，佢抬眼望一望李逸彤，李逸彤仍然背住佢，「唔嬲唔嬲！」

李逸彤：我冇嬲

李逸彤口不對心地回覆道，不過佢亦冇可能真係話比邱旻顥知自己係嬲緊

「李逸彤⋯」邱旻顥伸手拍李逸彤嘅膊頭，「嗨～」

「咩呀？」李逸彤微微轉頭望一望邱旻顥，眼裏都係有少少不悅滲出





「你仲嬲呀⋯」邱旻顥嘅上身傾前，快要伏低喺枱上一樣，細細聲地問道，「我冇心㗎，我冇帶書番去做地理，先要趕住番嚟做，你就原諒我一次⋯」

「我又冇嬲⋯」李逸彤疊好放喺枱上嘅嘢同時細聲地道，聽到邱旻顥低聲下氣氹番自己，感覺又嬲唔落啲咩

「真係冇嬲呀？」邱旻顥嘅右手放喺枱上，整個人微微側向右邊，將下巴靠喺手臂上，側着頭望住李逸彤

「冇⋯」李逸彤瞄咗邱旻顥一眼後細聲地講道，喺心裏又道：「邊嬲得落⋯」

邱旻顥見李逸彤話唔嬲，本來苦惱嘅感覺一下子散去，嘴角都自動地上揚起嚟

「咁⋯星期六，仲去食晚飯㗎可？」邱旻顥拉開話題問起星期六嘅約會

「食呀！我又冇話唔食！」李逸彤一下子回頭望向邱旻顥講道

「我點知你會唔會嬲到連飯都唔食⋯」邱旻顥定睛地望住李逸彤嘅側面，李逸彤冇回答，邱旻顥嘅手玩弄着李逸彤掛喺櫈背上嘅校褸衫袖，「你真係⋯」





邱旻顥頓了一頓，下意識地坐好起嚟，伸手摸摸頸

「嗯？我真係咩呀？」李逸彤疑惑地望住欲言又止嘅邱旻顥

邱旻顥偷望咗李逸彤一眼，視線隨即閃避，然後假裝自然地笑一笑

「你真係好為食⋯！」邱旻顥隨便搵咗個理由取代佢本來想講嘅說話

「咩呀！冇囉～」李逸彤笑了笑，似乎相信咗邱旻顥嘅呢個答案

邱旻顥望住李逸彤，佢嘅目光總係輕易地比李逸彤吸引

「你真係⋯咁在意我嘅一句早晨咩⋯？」邱旻顥喺心裏講出啱啱佢冇講出口嘅說話，「因為我冇講而嬲我一朝早⋯」








IG Link: https://www.instagram.com/nd_cotttoncandy/?hl=zh-tw