［愛情純愛］我地之間嘅友誼純度絕對等於零！！！: 57. 戀愛圈套

沈心怡同李逸彤行喺前面，邱旻顥同潘景諭行喺後面，一踏出課室門口，邱旻顥就用手肘撞咗潘景諭一下

「原來多得你～開心啦～小心糖尿病呀。」邱旻顥細聲地故意講道，「未食都心甜死。」

「噓！」潘景諭嘅臉上掛住嘅笑容，完全將佢嘅心聲表露無遺，明明想控制住自己嘅笑意，但心甜嘅感覺卻喺微微上揚嘅嘴角滲出嚟

⋯

數學堂





「今日邊個係值日生？」老師邊講邊回頭望向黑板，望向寫喺角落嘅值日生，「23號出嚟做咗呢題。」

李逸彤聽到後，默默地拎起自己嘅堂課簿起身行出去，佢就係23號，今日嘅值日生

「揀多個做右邊呢題啦，呃⋯17號！」老師隨口叫咗個學號

「哦～」班上嘅同學們頓時有反應，個個都偷偷笑起嚟

邱旻顥起身行出去，經過老師同李逸彤行到去黑板嘅右方，邱旻顥耷低頭一望，卻冇見到粉筆





邱旻顥行到李逸彤旁邊，拎起一枝粉筆後行番去自己嘅題目前

李逸彤企喺黑板前，同邱旻顥下意識地對望一眼後，目光便落喺黑板上嘅題目，然後望一望自己嘅堂課簿，手拎起放喺黑板前嘅白色粉筆，一提手直接就喺黑板上寫下題目嘅答案

粉筆敲打喺黑板上嘅清脆利落嘅聲音傳遍整個課室，落筆嘅利落表現出佢對自己嘅信心，確定自己嘅答案係啱

喺寫下最後嘅答案後放低粉筆，邱旻顥亦寫好題目放低粉筆

邱旻顥早一步轉身走，佢經過check一次數嘅李逸彤嘅身後





李逸彤都轉身打算番埋位，行咗兩步就比喺地上嘅咪線絆咗一下，向前跌咗兩步，直接毫不猶疑地撞上同佢距離只有兩步多啲嘅邱旻顥嘅背

「哦～」班上見到呢一幕嘅同學頓時又起哄

邱旻顥轉頭望一望李逸彤，只見李逸彤嘅臉頰都因為尷尬而紅紅的

李逸彤自覺尷尬又難為情，佢拎起堂課簿稍微喺臉前擋一下

兩人若無其事地番埋位坐低，李逸彤嘅心跳就喺啱啱撞上邱旻題嘅背時一下子加速起嚟，李逸彤一直耷低頭想令自己冷靜落嚟

邱旻顥抬眼偷望李逸彤一眼後收回視線，佢感覺自己嘅背熱到好似比火燒一樣滾燙

雖然事情嘅發生係意料之外，但大家嘅反應係意料之內⋯只係當事人都會獨自感到尷尬唔自在⋯

「背脊好似出緊汗⋯」邱旻顥喺心裏默默地講道同時感受着自己嘅心跳，「佢又會咁樣直接撞上嚟⋯」





邱旻顥有時都覺得可能係連個天都想幫佢一把，想拉近佢地之間嘅距離

「邱旻顥你計錯數。」李逸彤忽然回頭細細聲地講道

「我？邊度呀？」邱旻顥頓時回神，拎起堂課簿檢查

「尾三嗰個計錯咗，所以你個答案都錯。」李逸彤拎筆原子筆，筆尖落喺邱旻顥嘅堂課簿上，指出佢計錯嘅步驟，「你睇下呢度，你計錯啦。」

「係咩？」邱旻顥半信半疑地拎起自己嘅cal機再重新計一次

「呃你有錢分咩⋯」李逸彤轉身嘅同時反一下白眼講道

「又真係計錯咗⋯」邱旻顥望住自己啱啱再計出嚟嘅答案細細聲地喃喃自語道





邱旻顥㩒兩下鉛花筆，見冇筆芯出，諗都冇諗就直接踢咗李逸彤張櫈嘅櫈腳兩下

「嘖⋯踢我張櫈做咩呀小學雞⋯」李逸彤不滿地回頭望向邱旻顥

「有冇筆芯？」邱旻顥拎住鉛芯筆喺李逸彤嘅眼前晃兩下

「芯就冇，多一枝筆就有。」李逸彤邊講邊從櫃桶抽出筆袋，喺筆袋中拎咗枝鉛芯筆出嚟

「雖然都知你個人冇心㗎啦⋯不過有筆都好。」邱旻顥輕嘆一口氣開玩笑地講道

「你咪係冇心嗰個人。」李逸彤臉上掛上虛偽嘅微笑

「我冇筆芯啫⋯」邱旻顥無奈地反一下白眼講道，「個心個喺度⋯」

「話你對我冇心就真⋯」李逸彤喺心裏略微不滿地道，但口卻淡然地回答：「哦。」





李逸彤拎咗盒筆芯然後遞比邱旻顥，邱旻顥接過芯盒，然後拎咗一枝鉛芯放入筆裏

「唔該。」邱旻顥將筆芯盒歸還，用芯盒輕敲咗李逸彤嘅膊頭兩下

李逸彤冇轉頭望，只係默默地伸左手朝右邊膊頭摸去，喺佢伸手去拎芯盒時，指尖掂到邱旻顥嘅手

李逸彤若無其事地收回筆芯，但指尖卻發熱，本來少許冰涼嘅手忽然間變熱起嚟

李逸彤悄悄回頭望一眼佢嘅後座同學，邱旻顥剛好耷低頭見唔到李逸彤落喺自己身上嘅視線

李逸彤又悄悄地將目光收回，好似唔知由幾時開始，佢就總係會悄悄地望邱旻顥，每一日都會悄悄地留意邱旻顥嘅一言一行，悄悄地將留意到關於邱旻顥嘅喜惡都偷偷記住

當李逸彤發現自己好似成日都不自覺地留意邱旻顥時，佢亦發現自己好似⋯墜進戀愛了⋯








IG Link: https://www.instagram.com/nd_cotttoncandy/?hl=zh-tw