［愛情純愛］我地之間嘅友誼純度絕對等於零！！！: 59. 好看有什麼用？

「我唔知佢中意我⋯」潘景諭覺得自己莫名其妙地中槍，「再講，如果佢係中意我，我就更加唔會收啦⋯」

「你唔好比馨馨聽到呀⋯！如果唔係佢又怪落我度⋯！」沈心怡連忙緊張地回頭確認馨馨嘅位置

潘景諭望住沈心怡嘅緊張，心裏有啲不是味兒⋯明明有人中意自己，但沈心怡一啲都唔緊張呢樣，反而怕馨馨會嬲佢多啲⋯

「只有佢中意嘅人唔係我，先會係咁嘅反應⋯」潘景諭嘅心裏道，「佢有冇中意嘅人⋯？」

「算啦由馨馨啦，佢不嬲都中意發小姐脾氣⋯」李逸彤輕捏一下沈心怡嘅臉頰，「由得佢啦，你又唔係冇幫佢。」





「嗯。」沈心怡點一點頭，除咗由得佢之外都冇其他辦法，本來就唔係沈心怡嘅錯，唔通要沈心怡去道歉咩

「潘景諭你檢討下啦！」李逸彤望向潘景諭道

「點解係我⋯？」潘景諭不解地望住李逸彤，「又關我咩事？我躺着也中槍⋯」

「你惹埋啲狂風浪蝶番嚟⋯我先係躺着也中槍嗰個囉！」沈心怡輕皺起眉頭抱怨道，然後又細聲地抱怨，「都唔知生咁好睇有咩用⋯」

沈心怡咁樣嘅一句，潘景諭頓時笑逐顏開，毫不掩飾自己對呢個讚賞嘅認同；邱旻顥嘅目光頓時落喺潘景諭身上





「心怡你都讚得太直接啦掛⋯」李逸彤拉一拉沈心怡嘅衫袖

「我冇讚佢呀。」沈心怡一臉認真地搖搖頭，「我講事實咋。」

潘景諭點點頭，人地話佢個樣好睇都冇咁開心，但呢句說話出自沈心怡把口就唔一樣，因為沈心怡好少會咁樣講

「就好似⋯邱旻顥都好好睇一樣。」沈心怡望住李逸彤補多句

邱旻顥嘅嘴角滲出笑意，佢得意洋洋地望住潘景諭挑一下眉；潘景諭嘅心瞬間就覺得有啲不爽





「係唔係我好睇啲？」潘景諭不忿地追問沈心怡

「你唔好咁自戀啦潘景諭⋯」李逸彤反一下白眼，企喺潘景諭身旁嘅邱旻顥頓時望住潘景諭笑咗一笑

「佢先唔係因為自戀囉！」邱旻顥喺心裏笑道，知道潘景諭嘅秘密嘅佢覺得好有趣

「沈心怡。」潘景諭一臉認真地望住沈心怡

「哦⋯嗯。」沈心怡淡然地回答，潘景諭一追問，沈心怡就覺得唔好意思直接答佢

今次到潘景諭得戚咁望向邱旻顥，邱旻顥無奈地笑了笑

「你高興就好啦～」邱旻顥無奈地講道

⋯





Lunchtime

「你地係唔係陣間過嚟？」李逸彤拎起手機同銀包，回頭望住邱旻顥

邱旻顥拎起枱上面嗰份報告，係本來琴日要交嘅嘢，但佢未交

「我同潘景諭陣間嚟，你地叫咗嘢食先。」邱旻顥袋咗一枝筆入褲袋，「你知我食咩㗎可？」

「哦，知呀，你食嚟食去都係嗰個㗎啦～」李逸彤微微點頭道

「哦～」邱旻顥輕輕一笑，行出座位，「好了解我咁喎～」

「邊個了解你？」李逸彤撇開臉唔望佢，「先唔係了解你⋯！係你食嚟食去都係嗰一兩個餐。」





「哦好啦～」邱旻顥笑了笑，然後行去搵潘景諭，「喂，落去啦。」

「哦。」潘景諭拎埋佢嘅報告然後同邱旻顥一齊行出課室

「心怡～我地去餐廳先啦～」李逸彤行到沈心怡嘅座位

兩個女仔先去餐廳坐低，一坐低就拎起餐牌睇

「洗唔洗幫佢地叫埋嘢食呀？」沈心怡問道

「邱旻顥叫我幫佢叫咗嘢食先。」李逸彤望坐餐牌，諗緊今日自己食咩好，「你睇下潘景諭食咩，幫佢叫埋囉～」

「哦好呀。」沈心怡專心地望住餐牌

落單嘅阿姨啱啱行開，邱旻顥同潘景諭就嚟到坐低





「落咗單啦？」邱旻顥問道

「嗯，落咗。」李逸彤將餐牌放番喺一旁，「交咗報告啦？」

「交咗啦。」邱旻顥講道

「好心你兩個就唔好咁懶啦⋯報告都遲交⋯」李逸彤無奈地反一下白眼

「你估個個都好似你兩個咁咩～」潘景諭將手機放到枱上，「一早就做完等交。」

「做功課係責任嚟囉好唔好。」李逸彤更加無奈，都唔知呢兩個人點解可以理直氣壯咁欠功課

「你幫我叫咗咩？」潘景諭問沈心怡，雖然佢唔知係唔係沈心怡幫佢點餐，但佢估十有八九都係沈心怡





「呀？」本來睇緊手機嘅沈心怡抬頭望向潘景諭，「煎雞扒，你平時唔係都係食呢個咩？」

「係呀。」潘景諭回答道，「好奇一下啫～」




IG Link: https://www.instagram.com/nd_cotttoncandy/?hl=zh-tw