［愛情純愛］我地之間嘅友誼純度絕對等於零！！！: 61. 擔心

潘景諭一頭霧水地望住邱旻顥，佢幾時有話要買嘢⋯？

同邱旻顥對望咗兩秒後，潘景諭明白邱旻顥嘅意思，連忙點頭

「係呀，我有嘢要買。」潘景諭連忙附和道，然後微微側着頭望向沈心怡

李逸彤疑惑地望住潘景諭，又望一望邱旻顥，心中覺得好似邊度怪怪地一樣，但又講唔出怪喺邊

四個人搭車番到去，當李逸彤仲關心緊沈心怡嘅時候，潘景諭同邱旻顥對望咗一眼，邱旻顥望咗沈心怡一眼，然後目光又落番喺潘景諭身上同佢對望，邱旻顥嘅臉上掛上淡淡嘅笑容





「心怡你番去要小心啲！」李逸彤擔心地對沈心怡提點道，生怕沈心怡會照顧唔到自己一樣，「唔好整到個傷口呀！」

「知啦知啦！」沈心怡無奈地笑道，但面對李逸彤對佢嘅擔心，沈心怡嘅心裏係開心嘅，「我番到去同你講聲啦～」

「潘景諭！你要將心怡平安咁送到番去呀！」李逸彤對住潘景諭叮囑道，「心怡少一條頭髮都唯你是問呀！」

「係，收到收到！」潘景諭對李逸彤敬咗個禮

「彤彤，睇嚟我要搵男朋友都幾難啦～佢過唔到你嗰關都唔洗旨意同我一齊啦～」沈心怡笑着地開玩笑道，「你喺度嘅話，我真係唔洗拍拖都得啦！」





聽到沈心怡咁樣一講，潘景諭頓時望一望李逸彤，佢不禁諗自己過唔過到李逸彤嗰關

李逸彤同沈心怡係好朋友個個都知，而且李逸彤其實總會下意識保護沈心怡，生怕沈心怡會受傷害，或者因為沈心怡有着一副柔弱少女嘅臉龐，所以大家對佢都會不禁放一份憐愛

「我一定會為你好好把關！」李逸彤肯定地道，「我地嘅心怡太～好啦！」

「知啦知啦！」沈心怡笑了一笑，然後同李逸彤揮揮手，「我地聽日見啦～」

潘景諭行喺沈心怡嘅旁邊，手微微抬起想扶一扶沈心怡，但眼見沈心怡行起嚟都幾正常，於是只好默默地將手收回





「阿諭要去買咩？」沈心怡打開話題問潘景諭

「呃⋯」潘景諭一時間答唔出，本來佢就冇嘢要買，佢只係想送沈心怡番屋企，想同佢獨處多一陣，但佢唔可能咁答，所以只好隨口就作個理由：「我想去一轉文具店。」

「你要去文具店呀？宜家？」沈心怡抬頭望住潘景諭問道

「唔係，送咗你番去先再去。」潘景諭自然地講道，只要送咗沈心怡番去，佢去唔去文具店都唔係一個問題

「不如宜家去呀～我都想去一轉文具店！」沈心怡一臉感興趣地對潘景諭講道，仲帶着小跳步行副潘景諭嘅面前

「吓⋯？」潘景諭稍微愣了一下，「但你行起上嚟唔會痛咩？唔番屋企休息下？」

「嗯？唔緊要呀～都唔係真係好痛呀～」沈心怡耷低頭望一望自己貼住紗布嘅膝頭，然後笑盈盈地望向潘景諭，「去唔去？文具店。」

「唔⋯」潘景諭嘅內心有啲猶疑同掙扎





難得係沈心怡主動提出一齊去文具店，但沈心怡嘅腳受咗傷，潘景諭怕沈心怡會痛

沈心怡一臉期待地望住潘景諭，等待潘景諭嘅答覆；潘景諭敵不過沈心怡明亮嘅雙眸同期待，默默地點點頭

兩人行到去文具店，沈心怡百無聊賴地喺文具店內隨便逛逛，潘景諭一直跟喺沈心怡嘅身邊同佢一齊睇筆

「你去睇你自己要買嘅嘢就可以啦～唔洗理我～」沈心怡望向喺自己身旁試緊筆嘅潘景諭講道

「唔緊要，隨便睇下先。」潘景諭將筆插番喺原位，然後又拎另一枝筆試寫

潘景諭一直跟喺沈心怡身後，連距離都唔會多過兩步，佢唔想離沈心怡太遠，畢竟係難得嘅獨處時間

「哦⋯」沈心怡放低手上嘅筆，回頭望一望後面嘅架，「阿諭，我去後面睇下。」





「好呀。」潘景諭點一點頭，喺沈心怡轉身行之際放低筆跟喺佢身後

一個小學四、五年級嘅小朋友手上拎住一個籃球袋，佢直接朝住筆架跑；沈心怡下意識往旁邊行咗一小步避開，小學生跑到離沈心怡只有一個身位距離時停低，一個大動作、連帶着籃球袋一齊轉身

球袋一下子打中咗沈心怡嘅膝頭，仲要碰巧打喺沈心怡貼住紗布嘅嗰一隻腳上

「呀嘶⋯」沈心怡忍唔住低聲叫咗出嚟，痛感隨即由膝頭沿住神經線擴散，感覺受咗傷嘅左腳頓時麻痺咗一樣

「做咩呀？傷口痛呀？」潘景諭見沈心怡嘅反應，頓時緊張地問道

小學生意識到自己唔小心打到人，連忙回頭望沈心怡一眼，有啲慌張地朝門口跑去，完全冇打算道歉

「佢個籃球打到我⋯」沈心怡嘅雙眼紅紅的，眼睛一下子就濕潤起嚟

「有冇事呀？痛唔痛？」潘景諭連忙伸手將沈心怡扶住





「唔緊要⋯都Okay⋯」沈心怡微笑道，但潘景諭一望到沈心怡嘅笑容就知道，沈心怡又死撐，因為佢連笑容都係強擠出嚟

「番去先啦我地⋯！」潘景諭扶住沈心怡行出文具店，因為傷口帶嚟嘅痛感同麻痺感覺，沈心怡行起嚟時都一拐一拐

「都叫咗你番屋企先㗎啦⋯」潘景諭扶住沈心怡嘅前臂，放慢腳步行喺佢嘅身旁，「痛唔痛呀⋯？」




IG Link: https://www.instagram.com/nd_cotttoncandy/?hl=zh-tw