［愛情純愛］我地之間嘅友誼純度絕對等於零！！！: 64. 外套

「呼⋯」喺網站彈出submitted嘅字後，邱旻顥頓時鬆咗一口氣，「好彩趕得切⋯」

「邊個叫你咁遲先做⋯」李逸彤無奈地講道，語氣中夾雜着半點嘅抱怨，「明明前兩日就叫我地做⋯」

「好彩有你咋李逸彤⋯」邱旻顥慨嘆道，「冇你嘅話，我啲功課點算⋯」

「吓！？原來你係擔心你啲功課呀？」李逸彤衝口而出講出自己嘅心聲，「枉我仲開心咗一下⋯」

「咦～你開心啲咩呀？」邱旻顥嘅嘴角漸漸上揚，但卻裝作不在乎地問道





「冇呀！」李逸彤頓時否認，「我⋯冇開心啲咩。」

「係咩？」邱旻顥托着腮笑了笑，「不過，你同你啲功課都好重要嘅～我地係朋友嚟㗎嘛～」

從邱旻顥口中講出「朋友」呢兩個字，令本來笑盈盈嘅李逸彤瞬間嘴角下塌，扁一扁嘴

「邊個要同你做朋友⋯」李逸彤喺心裏不悅地講道，佢知道唔係所有心底話都可以講出口，特別係呢句

「喂？」邱旻顥見對面冇聲便喂咗一聲





「咩呀？」李逸彤壓抑着自己嘅不悅，但聲線裏仍然夾雜着少少唔高興嘅感覺，感覺有種無力感似的

「見你唔出聲。」邱旻顥講道，「嬲咩呀？」

「吓⋯我冇嬲⋯」李逸彤對於邱旻顥察覺到自己嘅小情緒有啲意外，但佢否認了

「哦⋯冇咩？」邱旻顥輕輕一笑，「仲以為你嬲添～」

「我做咩要嬲⋯」李逸彤裝作咩都唔知道地問邱旻顥





「我點知你點解嬲～」邱旻顥笑了笑，「不過你話冇就冇啦～」

「哦。」李逸彤嘅內心雖然好在意，但到嘴邊卻淡然地回答一個哦

「喂，李逸彤。」邱旻顥突然間叫咗李逸彤一聲，「你陣間係唔係要溫書？」

「呢兩日都冇測驗，我做咩要溫書。」李逸彤戴着耳機，一手托着腮，一手拎住無線滑鼠，雙眼盯着電腦螢幕

「咁你做晒功課未？」邱旻顥又追問道

「做晒啦～呢兩日要交嘅都做好啦～」李逸彤講道，心裏覺得有啲疑惑又有啲莫名其妙，「做咩，你又有功課要參考我？」

「哦⋯冇呀～」邱旻顥微微點頭，「只係有啲想去食糖水，上次食完之後搞到宜家心思思又想食咋嘛～」

「哦～」李逸彤聽出邱旻顥嘅意思，一下子就破防忍唔住笑，「所以你係想約我嘅意思？」





「咁你出唔出嚟呀～」邱旻顥嘅笑容毫不掩飾佢內心嘅想法，「你都冇功課做啦～又冇書要溫。」

「免為其難咁出嚟一下囉～」李逸彤輕輕抿一抿唇，甜甜嘅感覺喺心底蔓延，「幾點呀？」

李逸彤覺得邱旻顥就係特登，都唔知係唔係因為喺學校見佢做好晒功課先特登約佢出去食糖水，不過邱旻顥呢個「特登」似乎比糖水更甜

「你換完衫同我講。」邱旻顥將屋企著嘅T-shirt除咗，換上出街著嘅長袖衫、著上外套

「好呀～等我一陣。」李逸彤邊講邊將手機放低

「喂？」邱旻顥試探般喂一聲，電話裏傳嚟拉櫈嘅聲音，邱旻顥不禁紅了臉喺心裏道：「佢換衫都唔收線想點⋯？」

李逸彤拎起本來就搭喺櫈上嘅衫褲換上，然後同媽媽講咗一聲後，將銀包同手機放到外袋嘅口袋中





「我換完衫啦，宜家出門口。」李逸彤拎起手機道，然後就匆匆忙忙咁出門口

李逸彤早一步到樓下，一臉期待地推開大堂嘅門行出去，卻見唔到邱旻顥嘅身影

「死人邱旻顥⋯仲遲過我有冇搞錯呀⋯」李逸彤細聲地抱怨道，拎起手機打算send個message比邱旻顥，「質問」一下佢個人到底去咗邊

「你話邊個遲過你呀李逸彤？」邱旻顥喺轉角位行出嚟行到李逸彤嘅右邊，手繞過佢嘅背搭到佢嘅左邊膊頭上

「你幾時喺度㗎⋯！？」李逸彤比突然出現嘅邱旻顥嚇咗一跳

「喺度好一陣啦小姐～」邱旻顥收回手，轉身就行，不忘回頭望一望李逸彤，「食糖水啦～」

李逸彤望住邱旻顥嘅背影，悄然地喺臉上掛上甜甜嘅微笑，感覺邱旻顥永遠都唔會令佢失望一樣

李逸彤小跑起嚟追上邱旻顥嘅步伐，喺伸手要掂到邱旻顥時，李逸彤輕輕跳起，手打喺邱旻顥嘅膊頭上，然後若無其事地雙手插住衫袋，行喺邱旻顥旁邊





「你唔凍呀？」邱旻顥望咗李逸彤一眼，「著咁少衫，今晚好涼。」

「唔太凍，都Okay呀～」李逸彤笑一笑，插喺衫袋入面嘅雙手晃一晃，示意自己雙手插喺袋，唔太凍

「真係？」邱旻顥半信半疑地問道

李逸彤咩都冇默，默默地將手從衫袋抽出，然後手心向上攤開手

邱旻顥輕輕地握一下李逸彤嘅手，冰涼嘅感覺瞬間從手心蔓延，邱旻顥無奈地抬眼望一望李逸彤，然後輕嘆一口氣

「嗯。」邱旻顥將自己嘅外套除落嚟遞比李逸彤，李逸彤怔了一怔，邱旻顥若無其事地反一下白眼，「費是你出一出嚟就凍親。」








IG Link: https://www.instagram.com/nd_cotttoncandy/?hl=zh-tw