［愛情純愛］我地之間嘅友誼純度絕對等於零！！！: 79. 落空

唔想安於現狀，意味住要踏出一步冒險⋯想要將關係拉近到一個距離，就要冒住比對方拒絕嘅風險而行⋯李逸彤感覺到邱旻顥對自己有好感，但又怕自己自作多情而唔敢肯定

李逸彤一下子轉身定睛望住邱旻顥，邱旻顥坐喺位百無聊賴地睇手機，忽然間感覺到來自前座嘅視線

「係⋯？」邱旻顥抬眼，遲疑地比反應

李逸彤咩都冇講又轉身坐番好，搞到邱旻顥一頭霧水，完全唔知發生咩事

「做咩事突然間⋯我激嬲佢⋯？」邱旻顥喺心裏一頭霧水地道，「我有講錯嘢咩？我講錯啲咩⋯定我做咗啲咩令佢唔高興？」





邱旻顥開始自我反省起嚟，認真又嚴肅地沉思着由啱啱落去拎簿開始自己做過嘅事，將所有事都默默地檢討一次

「我應該冇講錯嘢呀⋯」邱旻顥喺檢討完得出一個結論後，心裏更疑惑，佢放低手機，小心翼翼地伸手拉一下李逸彤嘅衫袖

「嗯？」李逸彤回頭望向邱旻顥，就好似平時一樣，「咩呀？」

邱旻顥見李逸彤好似同平時無異，又問唔出口佢係唔係嬲之類嘅問題

「叫完我又唔出聲做咩⋯」李逸彤無奈地反一下白眼





「今個星期⋯」邱旻顥遲疑地開口

李逸彤淨係聽咗前半句就回頭，一臉期待地望住邱旻顥

「你做咩咁期待？」邱旻顥笑問道，望住李逸彤期待嘅模樣，邱旻顥心裏有啲開心

「要解釋㗎咩呢啲嘢。」李逸彤微微聳肩，「你唔係又打算話冇嘢呀⋯」

「唔係。」邱旻顥笑着輕輕搖頭，「我想問你今個星期有冇測驗。」





「嘖⋯」李逸彤細聲地嘖一聲，本來嘅期待都落空了，李逸彤雙眸裏嘅亮光頓時黯淡咗落嚟，「嚟緊有默書囉⋯冇其他。」

李逸彤帶着失落同少少不滿嘅感覺轉身面向番前面

「咁⋯」邱旻顥輕輕吸一口氣後又道，「星期六出唔出去行下？」

微微將頭耷低嘅李逸彤聽到邱旻顥講出佢心中想要嘅答案，嘴角不自覺地上揚起嚟

「去邊度？」李逸彤假裝平靜，回頭淡淡然地問邱旻顥一句

「你想呢？」邱旻顥托住下巴，嘴角微微上揚着望住李逸彤，「你想去食嘢？睇戲？定周圍行下？」

「唔⋯」李逸彤認真地沉思起嚟，「最近又冇咩戲想睇喎⋯周圍行下食下嘢啦～」

「Okay。」邱旻顥微微點頭





「嘻⋯」李逸彤笑咗一笑，然後又細聲地問道，「星期六晚不如去食壽司呀～」

「哦好呀。」邱旻顥坐好起嚟，「你講嘢幾時咁細聲？」

「我怕其他人聽到⋯」李逸彤諗都冇諗就直接地講道

「怕其他人聽到？」邱旻顥挑起眉，「就唔怕其他人見到我地出街呀？」

李逸彤輕輕抿唇，抬眼定睛地望住邱旻顥，卻咩都冇講出口回答；李逸彤安靜地同邱旻顥對望着，好睇嘅五官再加上刻喺骨子般嘅體貼嘅性格，李逸彤毫不猶豫地沉迷喺佢嘅溫柔之中

「做咩望住我⋯」李逸彤輕抿一下唇後問道，語氣有啲愉快

「你都望住我呀～」邱旻顥輕輕一笑，托住下巴微微瞇起眼望住李逸彤，「你望住我做咩？」





「人就係中意望好睇嘅嘢呀～」李逸彤故作輕鬆地講道，但其實佢嘅小心臟早已緊張得要命，「你話呢？」

「噗⋯！」邱旻顥見李逸彤讚自己好睇，開心嘅笑容毫不掩飾地掛到臉上，「Okay，Okay！你啱，我都覺得係。」

邱旻顥根本就係繞個彎讚李逸彤好睇，李逸彤聽完之後，笑意更加藏不住

「啱聽～」李逸彤豎起手指公比咗個Like，「我都知我好睇～」

「星期六見～」邱旻顥伸一個懶腰後講道

「今日先星期⋯三，你咁快就講星期六？」李逸彤諗一諗後講道

「咁我地星期五先再約啦，拜～」邱旻顥講完就伏低喺枱上

「喂邱旻顥！」李逸彤伸手捉住邱旻顥嘅手臂搖咗兩下，再伸手將邱旻顥嘅頭髮亂撥咗兩下





「咩呀？」邱旻顥微微側着頭，頭靠喺自己嘅手臂上，李逸彤嘅心臟頓時緊縮一下

「起身啦！」李逸彤伸手再摸一下邱旻顥嘅頭髮，不自覺地柔聲道

李逸彤嘅小心臟又再緊縮一下，佢望住邱旻顥呆咗一下，然後回神後喺臉上掛上發自來心嘅甜甜笑容

望住李逸彤突然掛到臉上嘅甜美笑容，邱旻顥嘅心臟頓時被暴擊，佢深深地吸一口氣，喺將氣緩緩地呼出同時將視線一同移開，微微耷低頭、手摸一摸後頸

心動嘅感覺，總係嚟得好突然，不過呢份感覺大概只留比一個人⋯

⋯

放學之後，李逸彤因為有嘢做要留喺學校就冇同大家一齊走





「有啲尷尬⋯」沈心怡行喺潘景諭身旁喺心裏道，因為好少會得佢一個同邱旻顥同潘景諭一齊

沈心怡微微探頭望一望邱旻顥同潘景諭，心裏覺得自己應該一個人走，行喺佢兩個隔離總覺得有啲格格不入

「你今日又去買嘢呀？」邱旻顥見潘景諭一同拍卡入閘，淡淡地笑了笑後問道

「哦係呀⋯」潘景諭微微點頭，見到沈心怡望住自己，不禁有啲心虛地將視線移開

「你要買咩呀？」沈心怡好奇地問道




IG Link: https://www.instagram.com/nd_cotttoncandy/?hl=zh-tw