［愛情純愛］我地之間嘅友誼純度絕對等於零！！！: 87. 省略
「你聽日唔同我食飯啦咩？」潘景諭笑問道
「我嘅意思係，我地單獨食飯⋯」沈心怡明明唔想講呢句出口，但最後都係講咗
「點解⋯？」潘景諭一怔，有啲疑惑，佢唔明白沈心怡嘅意思，「有咩問題？」
「好似唔係咁好嘛～」沈心怡微笑道，就好似平時一樣微笑，「陣間比人地以為我地拍緊拖就唔好啦～會影響到你。」
「影響我啲咩？」潘景諭聽出沈心怡嘅意思，佢感覺到沈心怡又一次婉拒佢嘅主動
「中意你嘅人呀。」沈心怡熟練地擺出平靜嘅表情，「陣間佢地以為我同你一齊咗就唔好啦係唔係？佢地會煩住我⋯我累你少咗女仔追就唔好啦～」
「我唔介意有冇人追我。」潘景諭一臉認真地望住沈心怡講道，「邱旻顥同李逸彤都可以單獨食飯，點解我同你唔得？」
「咁佢地咩關係個個都知㗎啦～」沈心怡一臉輕鬆地講道，「我地又唔係⋯」
「有咩關係？我地熟呀～」潘景諭講出沈心怡對佢嘅口頭禪，伸手托住沈心怡嘅下巴，掐住佢兩邊臉頰問道：「我地一定要有曖昧關係先可以單獨出嚟食飯咩？朋友食飯唔得㗎咩？」
「其他人會誤會呀！」沈心怡雙手輕輕地捉住潘景諭嘅手腕道
「誤會啲咩？」潘景諭追問道，「我又唔介意，你介意啲咩？你討厭我咩？」
「冇討厭你呀！」沈心怡頓時回答道，「討厭你嘅話仲得閒同你食飯？」
「咁唔討厭我即係中意我？」潘景諭笑問道
「睇下係指邊種中意。」沈心怡直接回答道
「咁唔知你對我有邊種中意呢？」潘景諭嘅笑意都要忍唔住，一臉好奇地問道
「朋友！得朋友嗰種呀！」沈心怡頓時回答，撥開潘景諭嘅手後便轉身走，「拜拜！聽日見！」
沈心怡嘅腦海中全都係琴晚嘅事，一諗起琴晚嘅事，大腦就好似要停止運作一樣
「冷靜啦沈心怡⋯！」沈心怡喺心裏就對自己大聲地道
邱旻顥同李逸彤喺番學嘅路上，同平日一樣一齊番學，唔尷尬亦冇唔自在
「好快就可以轉夏季校服啦～」李逸彤開心地講道，「好掛住夏季校服～」
「再過多個星期就轉季啦唔係咩？」邱旻顥諗一諗後講道，心裏默默地諗起李逸彤著夏季校服嘅模樣：「都好睇。」
「偷笑啲咩呀？」李逸彤留意到啱啱邱旻顥偷笑咗一下
「想快啲換夏季。」邱旻顥輕輕搖頭、臉上掛上淡淡嘅笑容道，「最近有啲太熱。」
兩人依舊行去買早餐後再學校，一同踏入課室，其他人對佢地嘅「一齊」都已經習以為常，基本上見唔到佢兩個一齊番學先奇怪
「心怡你咁快番到嘅？」李逸彤自然地向喺旁邊開緊locker嘅沈心怡搭話
「早你地小小咋嘛，都係啱啱番到嚟。」沈心怡將要用嘅書都拎出嚟放喺大腿上
「個嘢飲我地交換，我想飲你嗰個多啲⋯」李逸彤望住自己手上拎住嘅飲品對邱旻顥道，聲線裹夾雜着少許抱怨嘅感覺
「咁你啱啱唔買呢個？」邱旻顥亦冇拒絕嘅意思，將放喺枱上嘅飲品推比李逸彤，「嗱。」
「啱啱唔知飲咩好嘛～」李逸彤將自己嘅飲品放低喺邱旻顥嘅枱上，拎起邱旻顥嘅飲品就拆飲管
沈心怡望住兩人嘅互動時，淡淡嘅笑容掛喺臉上，拎住疊書起身
「話你兩個冇一齊真係邊個信。」經過李逸彤同邱旻顥嘅座位時淡然地講道
李逸彤望向沈心怡，比人咁講佢又冇咩所謂；邱旻顥卻下意識望向李逸彤
「我地又冇一齊。」李逸彤望邱旻顥一眼，輕哼一聲
「咁離我遠啲囉李逸彤。」邱旻顥反一下白眼後開玩笑地講道，同時輕輕地推李逸彤嘅膊頭一下，「調位囉。」
「我唔要囉！而且點解係我走？」李逸彤輕輕地打咗邱旻顥一下，「你唔走？」
「我就中意坐呢度。」邱旻顥講道，喺李逸彤收回手時，伸手同李逸彤碰一下拳
「即係佢中意你嘅意思。」沈心怡兩手空空地行番去李逸彤嘅座位旁邊，順便做個翻譯
「你唔好幫我省略某啲字⋯」邱旻顥無奈一笑，雖然沈心怡講嘅都係事實，但表白呢件事未到時候
「潘景諭番嚟啦喎～」李逸彤剛好抬頭望向門口時，見到潘景諭推開課室門行入嚟
沈心怡成個人頓時繃緊咗一下，微微耷低頭壓抑自己想要回頭望去嘅想法
「早⋯」潘景諭一臉疲倦地行過嚟，停低喺沈心怡嘅旁邊望一望沈心怡
「早晨⋯」沈心怡忽然間有啲尷尬，渾身唔自在嘅感覺又番嚟
李逸彤望住沈心怡尷尬嘅模樣，望住潘景諭一個知情人嘅狀態，心裏察覺到有異樣
「佢兩個做咩怪怪地咁⋯？」李逸彤喺心裏打咗個問號，「搞咩？」
「我去個廁所⋯」沈心怡連忙起身就行，急步行出課室
邱旻顥同李逸彤望住沈心怡行出去，直至沈心怡嘅身影消失喺佢地班嘅窗前，李逸彤望向準備瞓著嘅潘景諭
「你同心怡做咩呀？」李逸彤瞇起眼問道
「咩做咩？」潘景諭知道李逸彤講咩，但佢當唔知反問道
「你同心怡做咩咁尷尬？你對我嘅心怡做咗啲咩呀？」李逸彤一副懷疑潘景諭嘅表情，心裏肯定潘景諭係知道啲咩
「咩都冇做。」潘景諭講道，卻下意識迴避李逸彤嘅視線
「你地最近都奇奇怪怪咁⋯」李逸彤嘅疑心冇因為潘景諭嘅解釋而減少，反而增大咗
「有咩⋯」潘景諭若無其事地淡然道
「咦？嗰個咪心怡中意嘅男仔！」李逸彤嘅目光落喺窗外望向走廊
潘景諭下意識就向走廊嘅方向望去，但走廊一個人都冇，潘景諭即刻就意識到自己中咗李逸彤嘅小圈套；潘景諭望向李逸彤時，李逸彤托着下巴露出意味深長嘅笑容；邱旻顥完全係食花生嘅觀眾模式
IG Link: https://www.instagram.com/nd_cotttoncandy/?hl=zh-tw