［愛情純愛］我地之間嘅友誼純度絕對等於零！！！: 89. 密碼
邱旻顥嘅指尖一直喺屏幕上滑着，望住李逸彤每一張相只覺得李逸彤好靚，每一張相都好好睇
「李逸彤。」邱旻顥嘅上身前傾，細聲地叫咗李逸彤一聲，「你用我手機影咗好多相啵～」
「你睇到啦？」李逸彤臉頰紅紅的回頭望向邱旻顥，卻喺言語中又表達出佢嘅興奮同期待達成，「刪咗佢唔比你睇先！」
李逸彤伸手想拎邱旻顥嘅手機，邱旻顥瞬間將手機鎖上收到褲袋
「你就想。」邱旻顥微微側着頭望住李逸彤講道，微微吐舌，「留番嚟做手機wallpaper。」
「我張相你用嚟做咩wallpaper呀！？」李逸彤聽到之後臉頰更紅，「手機比我，我要刪咗佢⋯！」
「比你囉～」邱旻顥聽話地將手機交到李逸彤手上，「你都唔知我手機密碼～」
李逸彤試探性地入咗邱旻顥嘅生日日期做密碼，但卻顯示輸入失敗
「我點會用我嘅生日嚟做密碼？」邱旻顥無奈地笑起嚟，「咁個個知我生日嘅人咪開到我部手機。」
李逸彤諗咗一陣之後，悄悄地輸入自己嘅生日，當然開唔到邱旻顥嘅手機
「你打咗啲咩？」邱旻顥好奇地問
「冇！」李逸彤頓時紅着臉回答，心裏道：「點可能會係我生日呀⋯！」
「佢唔係試佢嘅生日呀⋯」邱旻顥見到李逸彤嘅反應，心裏更加好奇，「點可能咁光明正大set佢嘅生日做手機密碼⋯」
「密碼係咩呀？」 李逸彤放棄猜想，直接問邱旻顥
「你覺得我會唔會講比你聽？」邱旻顥無奈地反一下白眼，伸手拎手機，將手機收番入褲袋，「交換，你講你手機密碼比我聽，我就講我嘅比你聽。」
「我嘅手機密碼？」李逸彤拎出手機，猶疑咗一下之後將手機從裙袋拎出嚟放到邱旻顥嘅枱上，「我手機密碼係你生日。」
「吓⋯」邱旻顥頓時愣住了，「我生日⋯？」
「你試下。」李逸彤將手機推到邱旻顥面前
邱旻顥嘗試用自己嘅生日日期開鎖，李逸彤忍着笑意，一臉期待地望住手機嘅螢幕
邱旻顥愣住了，佢抬頭望向李逸彤，李逸彤嘅臉頰都紅紅的，都唔知係因為害羞定熱
因為手機，解鎖了⋯！
「What the⋯」邱旻顥差啲衝口而出講粗口，「你啱啱改㗎？」
「你估下～」李逸彤講道，當然係啱啱先改
「一定係啱啱先改啦～」邱旻顥忍唔住笑意講道，耳根都紅透了
「咁梗係啱啱先改啦！」李逸彤笑道，然後拎番手機放番入裙袋，「我咁有誠意對你咁好，你係唔係都應該⋯」
「你想我改手機密碼做你生日？」邱旻顥抿一抿唇後道，佢估到李逸彤嘅用意，「哦⋯」
「唔改就算囉～我改番自己個密碼。」李逸彤輕哼一聲
「數字嘅嘢又唔一定要順住排嘅⋯」邱旻顥聽到李逸彤話要改密碼頓時講道，然後不急不慢地將手機從褲袋中拎出嚟放到枱上
「嗯？即係點⋯？」李逸彤不解地微微側着頭
「呀～唔知呀～」邱旻顥伸咗個懶腰後拎起放喺枱上嘅手機，緩緩地輸入密碼
由尾往前睇，密碼係⋯
「即係點呀⋯？」李逸彤一頭霧水地望住枱上嘅手機，完全唔明邱旻顥講緊咩，「唔順住排唔通倒轉⋯倒轉⋯？」
「開locker。」邱旻顥起身行去旁邊開locker拎嘢，佢故意將手機放喺枱上冇拎走
李逸彤嘅目光落喺邱旻顥嘅背影上，又將視線移到放喺枱上嘅手機
李逸彤拎起手機，諗一諗自己生日日期倒轉後嘅數字排位，快速地輸入
手機解鎖了⋯！
「開到⋯！」李逸彤雙手拎住手機，不禁愣住了，「佢幾時set㗎⋯？唔會係一早就係我嘅生日呀嘛⋯」
邱旻顥開完locker，閂上locker門前回頭望向李逸彤
「睇嚟佢開到啦⋯」邱旻顥喺心裏講嘅同時，嘴角不禁上揚，然後捧住疊書行番埋位坐低
「你⋯幾時set㗎⋯？」李逸彤稍微望邱旻顥一眼，眼神裏除咗愕然，全都係甜甜嘅感覺
邱旻顥聳一聳肩，故意唔講比李逸彤聽，然後收起手機
邱旻顥直接伏喺枱上小瞓片刻，陣間仲要上堂，趁仲有少少時間休息下，補充一下體力
「原來手機密碼真係我生日⋯」李逸彤坐喺位一人沉思着，淨係咁樣諗都覺得成件事好瘋狂，「佢真係一早就set咗呢個做密碼⋯？」
李逸彤回頭望向伏低喺枱上嘅邱旻顥，心臟一直強而有力地噗噗跳
「真係發夢都冇諗過⋯」李逸彤喺心裏細聲地道，「佢會set我嘅生日做手機密碼⋯比人知道嘅話點算⋯！」
李逸彤拍咗拍自己嘅臉頰，唔係發夢⋯！
「嘻⋯」李逸彤嘻嘻一笑，總覺得唔真實
李逸彤又悄悄地回頭望咗邱旻顥一眼，有時覺得兩人之間係心意相通，只係大家都唔開口將關係同感情釐清
有啲問題嘅答案其實大家都知道，心裏有數，只係覺得唔需要開口，所以先要選擇當下⋯
⋯
「喂邱旻顥！接波！」
「得得得！」
今日嘅PE堂，男仔嗰邊打緊波，李逸彤去洗手間前經過操場
李逸彤下意識地朝邱旻顥嘅方向望咗一眼，比其他面向住佢呢邊嘅男仔見到
「邱旻顥，你女朋友望你喎！」先留意到嘅嗰個男仔對邱旻顥講道
邱旻顥回頭望，心裏大概知道九成係講緊李逸彤；邱旻顥一回頭，就同李逸彤對上視線
「嗨～」李逸彤對邱旻顥揮一揮手，細聲地講道
「哦～」見到嘅男生們即刻就起哄
IG Link: https://www.instagram.com/nd_cotttoncandy/?hl=zh-tw