［愛情純愛］我地之間嘅友誼純度絕對等於零！！！: 92. 燒壞腦

「哦⋯」沈心怡淡然地回覆道

潘景諭：唔係可以約邊個？你又唔同我食飯

「我點知你約邊個」沈心怡無奈地回覆道，「我唔係唔同你食飯，只係話下次啫」

潘景諭：下次即係幾時？

「前幾日先一齊食完飯，你好想同我食飯咩？」沈心怡問道，心裏不禁抱有一絲期望





潘景諭：幾啦，你唔同我食飯嘅話，就冇人同我食飯㗎啦

「搵其他女囉」沈心怡回覆道，當然只係講係咁講，實際上佢先唔想潘景諭約其他女仔食飯，「個個都有求必應」

潘景諭：咁你係唔係都有求必應？

「唔係（反白眼）」沈心怡立馬回覆道

沈心怡望向窗外，望住雨水打喺玻璃上





「雨天真係令人煩躁又不安⋯」沈心怡細聲地喃喃自語道

邱旻顥行去拎咗張飛後又行番去李逸彤嘅身旁

「幾多號？」李逸彤自然地湊近邱旻顥，望向佢手上拎住嘅飛，「仲有幾多？」

「兩張。」邱旻顥將飛遞比李逸彤，用將飛輕輕地拍咗李逸彤嘅臉頰一下

「呀⋯」李逸彤下意識向後縮咗一下，「做咩打我呀⋯！」





「冇打你。」邱旻顥笑咗一笑

兩人入座後坐喺迴旋帶前，李逸彤望住遠方運緊過嚟嘅壽司，等到壽司過嚟後，毫不客氣地伸手拎

望住李逸彤食得開心嘅模樣，邱旻顥心裏都自然而然地覺得高興，彷彿只要同李逸彤一齊，每一日都係開心日一樣

⋯

星期一

一大清早嘅天空陰陰沉沉，外面落着大雨，密集嘅雨點打喺地上後反彈着

李逸彤將雨遮掛喺課室門外牆邊嘅扶手上，一到雨天，扶手上就會掛住滴着水嘅雨

邱旻顥將冷衫從書包中拎出嚟著上，因為落雨嘅關係，邱旻顥怕會整濕件冷衫，唯有番到學校先著





「今日又落雨⋯！」李逸彤抱怨道，「好討厭呀又落雨⋯」

「好過琴日落大雨，琴日仲大雨。」邱旻顥坐低整好衫領，「今日都算⋯好過琴日？」

「點解會係疑問句？」李逸彤疑惑地問完就行去開locker

「早晨⋯」啱啱番到嚟嘅沈心怡放低書包就直接行去開locker

「早晨～」李逸彤對沈心怡笑了笑

「今日咁大雨應該唔洗喺樓下早會啦。」沈心怡嘅手打開locker，眼睛望住窗外嘅雨絲

「咦⋯」睇緊手機嘅邱旻顥忽然咦咗一聲，李逸彤稍微回頭望佢一眼，「潘景諭唔番。」





「點解唔番？」李逸彤問道

沈心怡閂上locker門，手捧住疊書，但卻冇番埋位，佢都想知潘景諭唔番學嘅原因

「佢話佢發燒喎。」邱旻顥望住潘景諭啱啱send比佢嘅message講道

「發燒⋯？」沈心怡嘅心裏有一絲擔心閃過，「做咩突然間病咗⋯？」

⋯

上堂嘅時候，沈心怡總係不自覺地望向潘景諭嘅座位，平日都有潘景諭喺度，但今日一個人都冇

「所以潘景諭點解病？」李逸彤望向沈心怡嘅方向，細聲地問邱旻顥

「佢喺最大雨嘅時候淋雨番屋企，然後就病咗⋯」邱旻顥細聲地講道





沈心怡望住旁邊空空嘅座位，心裏滿滿嘅擔心⋯忍唔住擔心嘅感覺，令佢自己嘅內心忐忑難受⋯

喺最後兩堂前嘅小息嘅時候，沈心怡坐喺自己執嘢，正當佢打算起身打算去個洗手間時，忽然感覺到放喺裙袋嘅手機震咗一震

沈心怡拎出手機一睇，見到係潘景諭嘅message

「佢唔係瞓咗咩⋯？」沈心怡喺心裏道，明明喺啱啱上堂前先話佢自己要瞓陣休息

潘景諭：瞓唔著，想見你，信唔信？

沈心怡嘅心臟迎嚟一下強擊，佢冇諗過潘景諭會對佢講啲咁曖昧嘅說話；雖然心甜，但都係覺得有啲太突然，嚇親心臟

「係唔係燒壞腦」沈心怡回覆道，「想點？（反白眼）」





潘景諭：冇

正當沈心怡諗緊要點回覆之際，潘景諭又send咗一個message：放學之後得閒？幫我買個退熱貼

「阿姨唔喺度？」沈心怡回覆道

潘景諭：番咗工

潘景諭：幫我買退熱貼

沈心怡本來想拒絕，但潘景諭又病緊又冇退熱貼，如果自己連一個小忙都唔幫好似有啲衰

「食咗藥未？」沈心怡關心地問道同時轉移話題

潘景諭：食咗，但都係好攰

潘景諭：幫我買退熱貼

「叫邱旻顥幫你買都⋯」沈心怡嘅回覆打咗半句，又默默地刪去成句，然後回覆：「考慮下⋯」

沈心怡鎖上手機螢幕，將手機收番入裙袋後起身行出課室

潘景諭灘喺床上，望住同沈心怡嘅對話，佢都覺得自己有啲燒壞腦

平時自己點會敢對沈心怡講出「想見你」之類嘅說話？

「我真係燒壞腦⋯」潘景諭細聲地講道，然後將手機放喺枕頭邊，蓋好被轉個身又繼續瞓




IG Link: https://www.instagram.com/nd_cotttoncandy/?hl=zh-tw