［愛情純愛］我地之間嘅友誼純度絕對等於零！！！: 96. 例外
「今日邱旻顥好好睇⋯！」李逸彤喺心裏有少許激動地講道，明明已經見過邱旻顥著便服嘅嘢，但李逸彤都覺得邱旻顥特別好睇
「又偷笑啲咩⋯」邱旻顥眼睛嘅餘光留意到李逸彤自己喺度偷笑，不禁喺心裏好奇地問道
有女仔路人喺旁邊經過時望咗邱旻顥兩眼後竊竊私語，李逸彤嘅耳仔唔知點解會突然間咁靈敏，聽到後內心全是不滿
「望咩喎！」李逸彤喺心裏不滿地講嘅同時朝邱旻顥行近咗兩步，「前世未見過靚仔咁！」
李逸彤毫不猶疑地伸手挽住邱旻顥嘅手臂，邱旻顥對於李逸彤突如其來嘅舉動感到疑惑
「好凍⋯」李逸彤同邱旻顥對上視線，李逸彤有啲心虛地道
「好凍？」邱旻顥半信半疑地講道，因為外面完全唔係大風，只係吹緊微風，不過邱旻顥都係當無事一樣問李逸彤：「咁宜家仲凍唔凍？」
「唔凍。」李逸彤搖搖頭
邱旻顥拎咗自己嗰兩包麵行出樓層，李逸彤塞多咗包燒烤味嘅薯片比邱旻顥；李逸彤暗自高興，咁樣都可以撞到邱旻顥
李逸彤番到屋企之後將排朱古力先拎咗出嚟放喺書枱，其他零食掛喺房門後
李逸彤隨手影咗張朱古力嘅相放喺IG story，邱旻顥剛好刷新一次IG見到李逸彤po咗story，隨即reply：「朱古力好食？」
李逸彤：未食，不過一定好食
邱旻顥不禁一笑，佢自己都覺得自己好似明知故問咁，但總係會忍唔住就reply李逸彤
⋯
潘景諭病好後終於番學，佢一踏入課室，女同學嘅視線自然地落喺潘景諭身上，但潘景諭由踏入課室嘅一刻開始，目光卻只落喺沈心怡身上
沈心怡正溫緊今日嘅測驗範圍，完全冇留意到潘景諭番到嚟課室
潘景諭行番埋位放低書包後直接就去開locker，馨馨見潘景諭起身去locker嗰邊，馬上就跟過去自然地關心一下
「你好番啦？聽佢地講話你病咗。」馨馨柔聲地關心道
「哦係呀，好番咪番學。」潘景諭禮貌地微微一笑，淡然地回答道
潘景諭不自覺地回頭偷瞄沈心怡一眼，馨馨冇留意到啲咩，聽到潘景諭話病好，佢都不禁微微一笑
潘景諭好快手就開完locker拎完嘢番埋位，馨馨嘅內心仲想同潘景諭講多兩句
「潘、潘景諭⋯！」馨馨見潘景諭打算番埋位，連忙將佢叫住
「嗯？」潘景諭回頭望向馨馨
「你有嘢跟唔上嘅話可以問我㗎⋯！」馨馨主動地講道，「我可以教你～」
「唔洗啦，邱旻顥佢地會教我。」潘景諭禮貌地講道，「而且我都應該跟得上。」
「哦⋯好呀⋯」馨馨有啲失望，佢聽出潘景諭話裹直接嘅拒絕，但佢都只可以強擠出笑容
或者喺其他女仔嘅眼中，潘景諭就係一個高冷而不失禮貌嘅人，面帶微笑嘅禮貌回應最容易比人一種距離感，但總有人會成為一個例外
可能冇人想像過潘景諭會有撒嬌可愛嘅一面，可能都冇辦法想像佢有呢一面，可能連沈心怡都係第一次見到潘景諭呢個模樣同狀態
對某一個人表現出其他人無法想像嘅一面，或者係代表嗰一個人嘅特別之處
潘景諭番到埋位坐低，正想將剛從locker拎出嚟嘅書放到櫃桶時，佢見到櫃桶裹整齊地放咗一疊功課，應該係呢兩日嘅功課
「係心怡嘅字跡⋯」潘景諭望住放喺面頭嘅功課簿上貼住嘅memo紙，悄悄地望一望埋頭溫書嘅沈心怡，「連要做邊度都寫埋⋯我仲邊有機會問你⋯？」
喺memo紙上，係沈心怡工整嘅字跡，清楚地寫明邊一日有咩功課、幾時交、做邊度
潘景諭拎出筆袋，一打開筆袋就見到一枝唔屬於佢嘅筆
「沈心怡。」潘景諭叫咗沈心怡一聲
「嗯？」沈心怡抬起頭望向聲音來源嘅方向，「阿諭你幾時番嚟？」
「啱啱。」潘景諭無奈地講道，然後將原子筆從筆袋中拎出嚟遞比沈心怡，「你枝筆，應該係嗰日漏咗喺我度冇拎走。」
「哦⋯」沈心怡望一望潘景諭，心裹有啲擔心其他人會聽到潘景諭啱啱講嘅嘢，「唔該⋯」
沈心怡伸手想接過潘景諭手上嘅原子筆時，潘景諭卻拎住原子筆縮起手
「嘻⋯」潘景諭對沈心怡調皮地笑了笑
「笑咩？」沈心怡見到潘景諭，佢都不禁輕輕一笑問道
「冇呀～」潘景諭笑了笑講道，佢感覺喺佢病完之後，佢同沈心怡之間嘅關係好似close咗一樣
潘景諭嘅左手托着腮微微側着要望住沈心怡，右手將筆遞比沈心怡；沈心怡忽然間臉一紅，迅速地接過筆後又耷低頭繼續溫書
「一同阿諭對到眼就會諗起佢嗰日講嗰啲嘢⋯」沈心怡喺心裏講道同時，心臟都噗噗跳
沈心怡想要當咩都冇發生過，但一見到潘景諭，心臟同大腦就會提醒佢，搞到佢到渾身唔自在
企喺不遠處嘅馨馨見到潘景諭對沈心怡嘅態度時，心裏羨慕又妒忌：羨慕潘景諭對沈心怡嘅態度同其他人唔一樣，妒忌沈心怡可以一直喺離潘景諭咁近嘅距離
「沈心怡。」潘景諭叫咗沈心怡一聲，沈心怡便抬頭望向佢，「多謝你嗰日幫我買退熱貼。」
「吓⋯？哦⋯唔洗呀，你病好就得啦～」沈心怡先係一怔，然後微微一笑講道，就好似對佢嚟講唔係啲咩重要事一樣，「而且大家咁熟嘛～幫個小忙啫～」
潘景諭聽到呢度，心裏唔高興了⋯明明啱啱先覺得自己同沈心怡嘅距離近咗，但宜家又覺得距離又拉遠咗⋯
IG Link: https://www.instagram.com/nd_cotttoncandy/?hl=zh-tw