［愛情純愛］我地之間嘅友誼純度絕對等於零！！！: 115. 陌生
李逸彤忽然間回頭望向後方，喺將視線收回嘅時候，邱旻顥剛好準備鬆開手，李逸彤用力握咗邱旻顥嘅手一下後就由得邱旻顥將佢嘅手鬆開
邱旻顥感覺到李逸彤握住自己嘅力度，佢望向李逸彤，佢臉上嘅笑容意味住佢同李逸彤有着同樣嘅想法
「你太奸茅啦⋯！」李逸彤若無其事、理直氣壯地講道
「你唔茅咩？」邱旻顥用膊頭輕撞咗李逸彤一下，「李逸彤，你咪一樣～」
「唔好咩？」李逸彤露出甜甜嘅笑容，聳一聳肩
⋯
喺落堂之後，李逸彤企起身伸咗個懶腰
「借一借。」邱旻顥拎住兩本書起身打算開locker，但李逸彤剛好擋住咗佢成條路
「哦⋯」李逸彤默默地行開，喺邱旻顥經過咗佢嘅身旁後，李逸彤跟喺邱旻顥身後行，「借咗幾時還？」
「你想我點還？」邱旻顥瞄李逸彤一眼後彎腰打開locker門，「星期六食唔食飯？」
「咁突然嘅？」李逸彤愕一愕然
李逸彤雙手放喺身後、面向住邱旻顥嘅方向企，眼眸裏就只剩下邱旻顥嘅身影
「想食咩呀？」李逸彤等唔切邱旻顥回答就直接問道
明明有時覺得女仔唔應該太主動，但面對邱旻顥嘅主動走近，李逸彤就會忍唔住主動多啲；邱旻顥主動行一步，李逸彤就會忍唔住主動行兩步
「你想食咩？」邱旻顥企好後閂上locker門，雙手交叉抱喺胸前 ，上身微微傾斜靠喺locker上，「定你想睇戲？」
「Why not both？」李逸彤側一側頭問道，然後露出甜美嘅笑容，「唔可以食完飯再睇戲？又或者睇完戲再食飯？」
「得～你想點都得。」邱旻顥笑一笑同時企番好，然後行番埋位
「真係？」李逸彤問道，邱旻顥回頭望向李逸彤，「真係點都得？」
邱旻顥望住李逸彤臉上嘅笑容，心裹冒出嘅第一個想法係：「有弦外之音？」
「我嘅意思係你想睇完戲再食飯得、食完飯再睇戲又得、食完飯再睇戲然後再食飯都得⋯」邱旻顥無奈一笑回答道，「我係呢個意思。」
「我咪呢個意思囉！」李逸彤頓時講道，佢收起佢嘅小心思，正經地回答邱旻顥，但明明心入面想表達嘅係其他意思
「哦。」邱旻顥輕輕一笑，佢先唔會特登踢爆李逸彤嘅心思，「你再諗下啦！」
李逸彤帶着輕快嘅小跳步行到沈心怡嘅座位，沈心怡剛好企起身
「心怡你得未呀？」李逸彤拉住沈心怡嘅手問道，「得嘅話我地去食飯啦～」
「哦好呀⋯」沈心怡點一點頭，然後從座位行出嚟
此時潘景諭企起身，沈心怡頓時窒咗一窒，下意識向後踏咗一小步；潘景諭一頓望向沈心怡，沈心怡同潘景諭對望嘅目光中，夾雜着一份微微嘅尷尬
「你先⋯」潘景諭提一提手示意沈心怡行先，沈心怡猶疑咗一下之後先邁步行出座位
李逸彤有啲困惑，琴日佢地兩個就開始怪怪地，今日點解突然咁生疏？
沈心怡行出座位後下意識就伸手挽住李逸彤嘅手臂，幾乎係痴喺李逸彤身旁；邱旻顥望一望潘景諭，潘景諭只係聳聳肩
「你好攰？你琴晚好夜瞓？」邱旻顥問潘景諭，眼見潘景諭一個疲倦樣
「嗯⋯都幾夜⋯」潘景諭打咗個喊露，感覺啱啱上堂嘅時候咩都冇聽到，大腦處於半休眠狀態，「5點幾先瞓⋯」
「搞咩咁夜瞓？」邱旻顥有啲愕然，畢竟平時就算佢地打機都唔會打到咁夜先瞓
「冇咩⋯瞓唔著⋯」潘景諭又打多個喊露
行喺前面嘅沈心怡有啲心虛，佢自己知係因為自己所以影響到潘景諭，但沈心怡選擇咗沉默⋯
「你唔洗覺得為難，我唔會逼你做決定⋯」沈心怡諗起琴日潘景諭最後同佢講嘅嘢，「當冇事發生過啦⋯」
「點當冇事發生⋯」沈心怡耷低頭喺心裏道
但點可能當冇事發生？被表白嘅沈心怡做唔到，更何況係表白嘅潘景諭？佢可以當冇事發生嘅話，琴晚會瞓唔著？
去到餐廳坐低，一如既往地係邱旻顥對住李逸彤坐，潘景諭對住沈心怡坐，但潘景諭同沈心怡一直迴避對方嘅視線
「心怡你食咩？」李逸彤拎起餐牌就遞比沈心怡，忽然間腳一縮，「邱旻顥你踩到我⋯！」
「我邊有踩你？」邱旻顥往後靠耷低頭望向枱底，「係你隻腳放太前。」
李逸彤調皮地伸出腳輕踩邱旻顥一下，邱旻顥稍微抬眼望咗李逸彤一眼，無奈地笑咗一笑，又輕輕地踢咗李逸彤一下
李逸彤輕輕抿唇，淡淡嘅笑意掛喺臉上，佢同邱旻顥之間嘅距離，一直都咁近，但亦只差一步⋯！
李逸彤拎起手機，悄悄地send咗一個message比邱旻顥：「星期六一齊食飯然後再睇戲？」
李逸彤見邱旻顥冇睇手機，便輕踢咗邱旻顥一腳，邱旻顥望向李逸彤，見到李逸彤嘅目光落喺自己放喺枱上嘅手機上，便拎起手機
「好的好的，你中意」邱旻顥回覆道，然後抬眼望李逸彤一眼，嘴角微微上揚
喺食完飯番到學校之後，沈心怡番課室將銀包放番去書包後便行出課室去洗手間
「心怡呢？」獨自喺小食部買完嘢飲番嚟嘅李逸彤見只有潘景諭同邱旻顥喺度，便上前問佢地
「去咗toilet。」潘景諭講道
「哦⋯」李逸彤望住潘景諭嘅反應，心裏覺得今日嘅潘景諭同平日嘅佢有啲違和感
IG Link: https://www.instagram.com/nd_cotttoncandy/?hl=zh-tw