［愛情純愛］我地之間嘅友誼純度絕對等於零！！！: 127. 勇氣

「下一站灣仔，Next station⋯」

喺提示音響起嘅同時，邱旻顥右手提起，一鼓作氣地繞到李逸彤嘅腰後，將佢朝自己攬過嚟

「噗噗⋯！噗噗⋯！噗噗⋯！」

李逸彤有啲反應唔嚟，成件事發生得太快，喺佢回神嘅時候，已經係感覺到臉頰滾燙嘅時候

「噗噗⋯！噗噗⋯！噗噗⋯！」





邱旻顥微微將頭耷低，臉頰稍微地掂到李逸彤嘅太陽穴⋯邱旻顥覺得自己捉住扶手嘅手都出緊手汗

「噗噗⋯！噗噗⋯！噗噗⋯！」

兩人心跳嘅聲音好似打通一樣，兩個心跳聲混合一齊，都分唔清到底係邊個嘅心臟瘋狂跳動

李逸彤嘅雙手提起放到邱旻顥嘅腰上，佢微微耷低頭，將額頭靠喺邱旻顥嘅膊頭上⋯喺距離心臟咁近嘅位置，邱旻顥嘅心跳聲對李逸彤嚟講特別嘹亮

「小蒼蘭⋯原來係咁嘅味⋯」邱旻顥喺心裏道





一靠近李逸彤，就會聞到陣陣嘅小蒼蘭香水嘅味道⋯香水味比平時更濃烈⋯平時一直都係好淡嘅味道，但今日嘅香水味好濃⋯

「因為距離⋯？」邱旻顥心諗道，「所以平時先會咁淡⋯」

靠着邱旻顥膊頭嘅李逸彤喺邱旻顥嘅頸中蹭咗兩下，柔軟嘅髮絲令邱旻顥嘅頸有啲痕；邱旻顥將李逸彤攬得比啱啱更緊

「噗噗⋯！噗噗⋯！噗噗⋯！」

李逸彤感覺到邱旻顥嘅鼻息，令佢嘅心跳都不自覺地加快起嚟





「喂李逸彤⋯」邱旻顥忽然壓低聲線呢咗李逸彤一聲

「嗯？」李逸彤用喉嚨發聲，輕聲地回應

「冇嘢啦⋯」邱旻顥猶疑咗兩秒後搖搖頭，李逸彤不滿地直皺着眉頭

「又冇嘢⋯到底叫我做咩？」李逸彤喺邱旻顥嘅胸膛上打咗一拳，但只係好細嘅力度

「就係⋯」邱旻顥欲言又止一樣，稍微諗一諗之後講：「純粹想叫一叫你。」

「哦⋯多謝晒⋯」李逸彤毫不掩飾自己嘅無奈，直接反咗個大大嘅白眼

李逸彤雙手攬住邱旻顥嘅腰，邱旻顥對於突然親密覺得有啲愕然同唔習慣；邱旻顥想向後行一細步，但李逸彤察覺到佢想後退，即刻收窄雙臂之間嘅範圍

「哼⋯」李逸彤細細聲地哼邱旻顥一聲，抬頭同邱旻顥對望





邱旻顥笑而不語，打消咗後退嘅念頭，本來已經向後行咗半步嘅腳默默收回，將李逸彤緊緊地抱喺懷中

「走去邊呀？」李逸彤鼓起兩泡腮問邱旻顥

「冇走去邊，只係有啲唔慣⋯」邱旻顥顯然係有啲唔自在

喺咁近嘅距離望李逸彤，總覺得有啲唔慣⋯不禁紅了耳根，佢望住李逸彤嘅眼神都悄悄地改變

「唔慣啲咩？」李逸彤好奇地問道，佢想知道邱旻顥嘅所有，「我本來就中意痴住人，你唔知咩？」

「真係唔知～」邱旻顥輕輕一笑，小幅度地聳肩，「你之前又唔會咁樣痴住我。」

李逸彤同邱旻顥對視，兩人相視而笑，對彼此露出發自內心嘅甜笑，好似一切都變得有啲⋯唔一樣⋯





⋯

「呃⋯我到啦⋯」沈心怡有啲唔自在，畢竟喺潘景諭表白之後，佢都好少同潘景諭獨處

「咁星期一見。」潘景諭淡然地講道，佢心入面都唔想沈心怡尷尬

今日沈心怡肯同佢一齊食飯，肯同佢周圍行一陣，對潘景諭嚟講已經係賺咗

潘景諭喺沈心怡行入大堂前先一步轉身走，佢唔想望住沈心怡走，佢內心覺得沈心怡會毫不猶疑就轉身走，唔會回頭望多佢一眼⋯

沈心怡望住潘景諭今次轉身就走，心入面唔習慣嘅同時亦格外難受⋯明明星期一都會見，但呢一刻心入面就係有滿滿嘅不捨

「我係唔係應該叫住佢⋯？」沈心怡不禁問自己，佢嘅心想開口，但喺沈心怡微微張開口想要開聲時，但想講出口嘅兩個字就卡喺喉嚨

望住潘景諭真係頭也不回咁走，沈心怡有啲討厭自己嘅欲言又止，亦討厭總係拎唔出勇氣嘅自己





「阿諭！」沈心怡嘅手捉一下自己嘅裙擺，好似為自己加油一樣，然後喺勇氣聚起嘅一瞬間開口對潘景諭叫咗一聲

潘景諭頓時停低腳步，有一刻以為係自己嘅錯覺，愕然嘅表情毫無保留地擺到臉上，然後回頭望向沈心怡

「係⋯？」潘景諭嘅聲線夾雜着未散去嘅愕然

「呃⋯」沈心怡忽然間又講唔出其他嘢，但為咗唔好咁尷尬，沈心怡擠出笑容，「星期一見⋯」

「嗯。」潘景諭笑了笑，佢覺得沈心怡好似有一刻有啲咩想講但唔知點開口同佢講一樣，但佢冇追問嘅想法

「拜拜⋯」沈心怡將心事吞番落去，對潘景諭揮揮手後緩緩地轉身

「心怡！」喺沈心怡行咗兩步後，潘景諭忽然間又將沈心怡叫住





「係？」今次輪到沈心怡停低回頭，疑惑地望住潘景諭

潘景諭同沈心怡相比，潘景諭更加直接，佢嘅中意就係好明顯咁傳達比對方知道

「你有冇，中意嘅人⋯？」潘景諭企喺原地問離佢四、五步遠嘅沈心怡

沈心怡輕皺一下眉頭，潘景諭突如其來嘅問題直接剎佢一個措手不及




IG Link: https://www.instagram.com/nd_cotttoncandy/?hl=zh-tw