［愛情純愛］我地之間嘅友誼純度絕對等於零！！！: 136. 急不及待

「呀⋯好想見邱旻顥⋯」李逸彤大字形灘喺床上望住天花板自言自語，此時手機一震，李逸彤一下子翻身趴喺床上

邱旻顥：做緊咩呀？

「發緊呆～」李逸彤見到係邱旻顥嘅message，就急不及待回覆，「你做緊咩？做完功課啦？」

一見到邱旻顥嘅message，李逸彤頓時叉爆電一樣精神飽滿，畢竟佢就係等緊邱旻顥嘅message

邱旻顥：陣間先做功課，啱啱食完嘢





邱旻顥：你食咗嘢未

「啱啱食咗個麵」李逸彤回覆道

邱旻顥：好想快啲到星期一

「咁突然嘅？雖然我都想快啲到星期一」李逸彤甜甜一笑，心入面從來都冇試過想星期一快啲嚟

李逸彤拎住手機，望住手機螢幕，心入面特別掛住邱旻顥，星期六、日對佢嚟講簡直就係一啖砂糖一啖屎一樣嘅存在





邱旻顥：聽日一唔一齊食lunch

「做咩呀？你想見我呀？」李逸彤明知故問，明明就知道邱旻顥係因為想見佢所以先約佢，但為咗要邱旻顥親自回答所以要追問

邱旻顥：唔想見你嘅話想見邊個？

「點知你仲想見邊個～」李逸彤回覆道，自從收到邱旻顥嘅message之後，李逸彤臉上嘅笑容就冇再消失過

邱旻顥：超想見你嘛～





「哦～我都想見你」李逸彤回覆道，「要等到星期一先再見嘅話太可憐⋯」

邱旻顥：我都覺得係⋯所以聽日要見你

「嘻嘻⋯」李逸彤將頭埋到枕頭，忍唔住笑咗出嚟，然後拎起手機又回覆：「掛住你」

收到李逸呢個直接表達想法嘅message，邱旻顥都忍唔住笑意，中意一個人嘅時候，笑意真係藏唔住，見到嗰個人嘅時候自然而然就會嘴角上揚

邱旻顥：我都掛住你

李逸彤坐起身行到書枱前坐低，將放功課嘅file從書包中拎出嚟，李逸彤打算今日好好咁做咗功課先，但都係會覆邱旻顥嘅message

邱旻顥：我陣間會去超級市場一轉，你出唔出嚟一齊？

「陣間？可以～」李逸彤頓時回覆，不禁有啲緊張，「幾點呀？」





邱旻顥：半個鐘後，陣間見？

「好！陣間見！」李逸彤欣喜地回覆，然後將手機放低喺枱上後起身去到床邊坐低

李逸彤向後灘低喺床上，一個轉身攬住枕頭，臉上嘅笑容完全係熱戀中先會有嘅甜蜜笑容

「太好啦～陣間可以見邱旻顥～」李逸彤喺心裏激動地講道

⋯

「我轉頭番嚟～」李逸彤喺出門口前同媽媽講一聲

李逸彤閂上木門、拉埋鐵閘便帶着小跳步行出去





「嗨～」邱旻顥見李逸彤行到出嚟，便探頭同佢打招呼

「你喺度等我呀？」李逸彤即刻微微跳起攬住邱旻顥，聲線中係滿滿嘅高興

「想快啲見到你嘛～」邱旻顥回擁李逸彤，熱戀期嘅情侶永遠都係一日不見如隔三秋，琴日番學先見完，今日又掛住啦

「好香⋯邱旻顥身上嘅味道⋯」李逸彤將頭埋喺邱旻顥嘅頸窩，邱旻顥嘅氣味頓時變得好濃烈

「我地去買咗嘢先⋯！」邱旻顥嘅手輕輕地拍李逸彤嘅背兩下示意要先鬆手

「好呀～」李逸彤一鬆手，邱旻顥即刻就將李逸彤嘅手緊緊地拖住，「你要買咩呀？」

「買零食買嘢飲～」邱旻顥對李逸彤微微一笑

「星期六都可以見你真係好⋯」李逸彤細聲地講道，手輕輕地握邱旻顥嘅手一下





「我都覺～」邱旻顥講嘅同時回握李逸彤嘅手一下，「星期六都可以見你⋯」

李逸彤行喺邱旻顥身旁，就算邱旻顥要拎嘢都唔會鬆開李逸彤嘅手，呢一點令李逸彤特別心動

「點可以側面都咁好睇⋯？」李逸彤嘅目光都冇離開過邱旻顥，望住邱旻顥嘅時候忍唔住會花痴一下

「做咩一直望住我？」邱旻顥其實都察覺到，佢無奈一笑

「嘻嘻～冇呀～」李逸彤搖搖頭，然後湊近邱旻顥之後將頭靠喺邱旻顥嘅膊頭上

「諗咩啫？唔同我分享下？」邱旻顥追問李逸彤，佢中意李逸彤靠喺佢膊頭上，因為感覺好似自己可以比到安全感李逸彤一樣

「諗緊點解你生得咁好睇⋯！」李逸彤無奈地笑道，雖然都係佢心入面嘅想法，但講出口始終有啲唔知點嘅感覺





「哦～」邱旻顥頓時笑逐顏開，「我都知我好睇～你咁識講嘢嘅？」

「對男朋友嘛～都要講多啲好說話嘅～」李逸彤喺旁邊攬住邱旻顥撒嬌道，然後探頭定睛望住邱旻顥，擺出一副等待讚賞嘅模樣，「你話係唔係～」

「係⋯」邱旻顥努力地壓抑着心動嘅感覺將呢個字講出口，因為心動帶嚟嘅重量差啲令佢連嘢都講唔到出嚟，「我都覺得係⋯」

「呢隻薯片好好食，推薦比你。」李逸彤指住喺貨架上嘅其中一款薯片，「好～好食！」

「既然你推薦嘅，咁就一定要試下啦～」邱旻顥隨即將購物籃遞比李逸彤，示意李逸彤拎一包放到籃中，邱旻顥望向李逸彤又道：「你眼光咁好，一定要信你。」

「邱旻顥⋯」李逸彤輕皺起眉頭，一個懷疑嘅表情，「你係唔係想兜個圈讚自己⋯？」

「嗯？冇啲咁嘅事。」邱旻顥一臉認真地回答，但當然，佢就係想讚自己




IG Link: https://www.instagram.com/nd_cotttoncandy/?hl=zh-tw