如果讀者喜歡此故事,希望你能正評+留言,或到penana點「喜歡」,謝謝你的支持!
 
https://www.penana.com/story/90093/輕鬆-校園-只有一年回憶嘅高中生涯
 
==================================
 
11章 - 睇戲心態
 
「書銘,呢條我唔識呀。」我隊咗本筆記去書銘面前。
 




「喂!類似嘅嘢你求先先問過!」書銘開始唔耐煩。
 
「係呀!你睇番求先嗰條再諗諗先啦!」
 
睇書,又係睇書。其實讀埋讀埋啲書有咩用?唔通以後番工會用咩equation of circle覆個客?定係落街市買餸要D佢一次、in佢一次先?
 
「唉…」
 
好撚攰。
 




咔啦啦啦啦啦───
 
集中力開始跌嘅時候,出面有拉鐵閘嘅聲。
 
屌,竟然有人番,仲以為就快可以掃佢兩條友走!
 
鏘。咔嚓。
 
呢種拉閘、開門嘅節奏,我認得係邊個。
 




「你家姐番喇?」書銘有啲期待。
 
屌你,剩係掛住我家姐!
 
「我阿媽呀,我個仆街家姐邊會咁開門,佢開門開到追債咁架嘛條仆街。」
 
「咳咳。」突然,有一把唔係我老母嘅嗓門喺附近出現。「我諗,你講嘅仆街就係我喇。」
 
聽到一把年輕女人聲,書銘同皮蛋表情凝重起嚟。
 
你兩個唔好好似嚟相體咁得唔得呀!
 
我︰「家姐,咁早番嘅?」
 
真係估唔到。




 
家姐︰「行到攰咪番嚟。」
 
家姐一甩長髮,閂埋木門,一道風掃過佢眼前,揚起佢嘅長髮。對面兩個咸濕佬好似聞到髮香,望住大門方向望到神魂顛倒。
 
「喂,真係唔錯喎。」皮蛋壓到把聲好低咁講。
 
佢出完街梗係唔錯喇,女人出街邊有唔打扮架?
 
「溫書吖?」見到我哋對住一本二本書,家姐除住口罩問。
 
「我想要原味口罩!」皮蛋又細聲講。
 
我一嘢打落去皮蛋大脾。
 




「唔係吖,我哋打緊牌呀。」我答家姐。
 
「打牌?三個人打牌?唔夠腳喎?等我吖?」家姐進擊。
 
「好吖,嚟吖。」我轉住筆講。
 
家姐冇理到我,走咗入房。
 
書銘︰「你同你家姐咁溝通架?」
 
我︰「條友未發癲咋,上次佢約朋友上嚟,要我做阿四!」
 
皮蛋︰「真係得意。」
 
我︰「得意啲咩?不如你都得意吓吖?你今日做我阿四!」




 
皮蛋︰「我…做你家姐嘅阿四得唔得?」
 
「皮蛋…」我呼咗一口氣。「你照吓鏡先喇。」
 
家姐喺房搞咗一輪,我哋三個男仔溫到又攰又悶,喺廳一直吹廢水。
 
「咦,又話溫書嘅?成晝傾偈。」家姐丼咗幾件衫落衫籃,換咗短衫短褲出嚟。
 
天寒地凍著到咁,女人果然勁過北極熊。
 
我望去嗰兩個變態佬,果然望住我家姐。屌,真係好撚噁心。當見到有人對自己細妹家姐有興趣,就只會覺得重口味,心諗︰平時咁不修邊幅嘅人點解都有男人鐘意?
 
我︰「都話我哋嚟打牌。」
 




家姐向反抗緊嘅我打眼色,好似講緊︰「反抗我?一陣你就知味道!」
 
「阿輝家姐,聽阿輝講,你讀書唔錯,係咪呀?」皮蛋好正經咁問家姐。
 
家姐︰「唔算好勁嘅,做咩呀?」
 
你個八婆!對我又唔見咁溫柔!
 
皮蛋︰「我哋呢,有啲課題唔係好識,而家冇人俾我哋問,好頭痕呀!」
 
咁又俾你搵到理由搭訕喇。
 
家姐︰「阿sir呢?唔係有網課咩?」
 
皮蛋︰「一日得嗰少少時間問,有唔明梗係想快啲解決,多啲時間鞏固吖嘛。」
 
家姐︰「咁又係,而家時勢真係同冇老師分別唔大,要靠吓其他人都好正常。我幫吓你哋喇。」
 
我屌─────!!!我平時問你,次次都唔理我;我啲friend講一個擺明老作嘅理由,你就即刻手把手教佢,手指拗出唔拗入!下次叫我斟水,我溝啲水喉水俾你!我唔止冇老師,冇埋家姐呀!
 
「邊度?」
 
家姐長髮飄逸咁坐喺我哋三個佬中間,少少化妝品嘅味,芬芳而不造作,抹走佢平時嘅重口味感覺;將鬢髮輕輕一撥,條頸若隱若現,睇到對面兩個佬J充血。
 
皮蛋︰「呢度。」
 
家姐︰「俾埋答案我。」
 
皮蛋︰「吓?未睇題目就睇答案?」
 
條八婆識唔識架?
 
「梗係睇咗答案先喇,搣時阿sir咪又係對住份答案答你哋,你估佢哋真係識咩?」家姐伸手拎答案。「俾你哋做嘅練習,佢哋都睇過晒架喇;額外練習分分鐘答唔到你哋,咪又係睇答案!」
 
有道理,啲阿sir成日都叫我哋影條題目俾佢睇,第二日答番我哋。
 
我同皮蛋對望咗一眼,情不自禁咁笑咗。
 
都係嘅,求學不是求分數係呃人,冇上過堂嘅肺炎期,咪又係要入考場求分數?
 
由題目搵答案?不如由答案估下一次嘅答案好過啦!