出租女友: 《第六話 深入的開始》

水原喺佢所屬嘅事務所雖然只係新人級，但係一個鐘頭收費已經承惠¥5000，再加埋車錢同飲飲食食，分分鐘都洗超過¥20000。

（和也喺腦內瞬間閃過户口嘅數字走勢，面上嘅肌肉不由自主咁抽搐，冷汗直冒）

我喺OpenRice揾咗間睇嚟唔錯嘅cafe send俾水原，因為淨係探病都唔會探好耐，探病之前揾個地方飲下嘢都好，所以就tg問水原：「探病之前先去呢間飲杯嘢好唔好？」

「好呀！我好期待呀！」水原係tg秒覆我。

（水原嘅無縫回覆令和也呆一呆，然後和也一臉滿意咁一抱住電話平躺係床上，喺佢腦內對回覆內容作出奇怪嘅補完，幻想住水原充滿笑容，滿心期盼咁對佢講：「我好期待呀！我好鍾意和也你呀！」）





（突然之間，和也激動咁彈起身，一手將個電話定落床度）

「唔係，唔係，我做乜鬼嘢喺度小鹿亂撞，嗰啲只係設定回覆，佢骨子裏只係個八婆，同小麻美嘅真心係冇得比㗎。」我如夢初醒咁叫喊出嚟，然後冷靜過後，又躺返落床，自言自語：「究竟（自我中心女）聽日會帶住咩表情出現呢？」

第二日

「和也，係咪等咗好耐呀！」水原喺不遠處笑臉迎人，揮住手咁對我講，話說水原今日著住條白色淺藍直間連身短裙，配上一對白色露趾高踭鞋，超夏日陽光氣息。

根本係人行過都忍唔住望水原兩眼，甚至可以聽到途人喃喃細語，「嗰個女仔係咪藝人嚟㗎？」，「佢男朋友就好啦，個女朋友咁靚。」，聽到咁攪到我只係低頭企係度，唔係好敢應水原。





（此時和也認為水原係超造作，但骨子裏和也臉紅耳赤，覺得水原可愛得一蹋糊塗）

「咁，我哋出發啦。」水原靠近我對我講，而我只係輕聲回應：「嗯。」，然後就起行，水原跟隨我身後。

我眼尾再瞄一瞄水原，縱然水原係一個善變造作嘅女仔，不過水原嘅頭髮也好，身型也好，外貌也好，都真係好似Model 咁，如果唔係靠（出租女友），我諗我呢世仔都無可能同一個咁有氣質嘅女仔一齊行。

（沿途都充滿艷羨嘅目光望向和也同水原）

去到cafe，坐低叫咗嘢飲之後水原第一時間做嘅就係兩眼發光咁數銀紙，「好嘅，啱數。」
水原點晒頭咁講。





（和也對住自己個銀包默哀，心諗呢個女人一講到錢就露出可怕嘅一面）

飲完嘢我哋就起程去醫院，一入到醫院，水原係度左望右望，唔知水原係咪好去醫院所以唔慣，我好奇問下少原：「唔，係咪有啲咩呀？」，水原睇落少少神經緊張咁話：「無，好似…」

「木之下女士，唔好跑呀！」
「媽媽，你等等呀！」

（突然前方發生一股騷動，細看木之下女士正飛奔向水原，後面緊隨住擔心木之下女士嘅和也父母同一眾護士）

「公主！」嫲嫲大叫一聲，然後飛撲攬實水原講：「係真㗎！係真實存在㗎！」

被嫲嫲攬到實一實嘅水原不知所措咁問嫲嫲：「請問嫲嫲你咁講係咩意思？」，嫲嫲好似貓仔撒嬌咁對水原解釋：「我一直都好不安，喺度諗其實千鶴公主你係咪幻覺嚟，只係我太渴望見到孫仔有拖拍而幻想你出嚟。」

（企喺一邊嘅和也有啲心虛，慨嘆嫲嫲嘅敏銳直覺同自己嘅不被信任）





經過係醫院大堂嘅一輪鬧劇，我哋一行人返上病房，而爸爸媽媽就識趣地先行離開，免得妨礙嫲嫲同水原相聚。病房剩返我，水原同嫲嫲，而嫲嫲首先開口問：「話說你哋兩個啪啪咗未？」

（和也聽完之後，啱啱飲落口嗰啖茶當堂噴咗出嚟，而水原就好似石化左一樣剩淨係得返捧住杯茶嘅雙手喺度震）

「嫲嫲！」我大感緊張，邊咳邊講，然而嫲嫲若無其事咁講：「怕咩醜啫，對你呢個世代來講就好似家常便飯咁咋嘛。」

「反正要結婚的話，呢一方面夾唔夾其實都好重要，因為只有和也你可以幫木之下家傳宗接代。」嫲嫲語重心長咁講。

我心諗水原係（租）返嚟㗎炸，我不敢正視嫲嫲心虛咁講：「講咩結婚呢。」

「我同和也其實有討論過下，做嗰樣嘢要好謹慎，始終和也係木之下家珍貴嘅獨子，要先得到嫲嫲你嘅認可先得。」水原自然流暢咁幫我打完場。

（和也對水原嘅闡述感到驚訝，驚嘆水原擁有何等嘅應變能力，而木之下女士就聽到眼泛淚光，一臉欣慰）





「做啦，做啦，日頭做又得，夜晚做又得，隨妳喜歡。」嫲嫲再一次抱緊水原撒住嬌咁講，而我就尷尬爆錶咁大叫一聲：「嫲嫲!」

嫲嫲鬆開水原之際，水原深情款款咁望住我講：「係咁，好啦。」

（和也心知水原只係Part-time，但係都阻止唔到自己腎上腺急升，塊臉紅到標煙，心裏不停唸演技…演技…黎冷靜自己）

我都未降完溫，嫲嫲就一支箭咁衝出病房話；「差啲唔記得，等我一陣，我去叫其他老太婆嚟。」水原一臉不解咁問我：「等等，係咩一回事？」

我即刻進入扮傻模式咁向水原解釋：「哎吔，嫲嫲好似話同其他病房嘅婆婆講咗佢孫仔識咗女朋友嘅事。」

(水原突然驚惶失措咁企咗起身）

「弊啦！點算好呀！？」水原六神無主咁講，水原個失神樣令我擔心起嚟咁追問水原：「欸！咩事咁弊？」

「其實，我嫲嫲…都係住咗喺呢間醫院。」水原相當凝重咁講。





（和也都彈埋起身，表現得比水原更大反應，更加驚訝）

「點解上次嚟醫院你提都唔提下嘅？」我激動咁問水原，然後水原擰歪塊臉細細聲咁話：「因為我無諗過會嚟兩次，同埋行事低調啲應該就唔會出事。」

「再加上我嫲嫲完全唔知我有（男朋友）。」水原擔憂咁對我講，我大失方寸咁回應水原：「咁真係好弊！如果俾你嫲嫲見到我嫲嫲，咁我哋唔係真情侶嘅事就會穿煲。」

「我咪話咗點算好囉。」水原唔耐煩咁講，然後轉身話：「總之我哋就襯依家離開醫院先。」

（水原一手攞起手袋就行出病房，而和也就慌亂尾隨，遺憾地木之下女士正帶同大軍逼近水原同和也，水原見勢色唔對就一手拉和也入去隔離間吉房。）