(木部轉身就雙手合十向和也請罪,表示自己對於麻美嘅出現係一無所知)

(同場嘅一個大學前輩見麻美對和也且不轉睛就問麻美係咪同和也認識嘅)

「呀,係呀,和也係我嘅前男友。」麻美亳不忌諱咁向大家說明。

(前輩見狀就尷尬向麻美道歉,自此之後大家嘅氣氛變得好沉重,和也都只係默默咁飲酒)

呢個時候我真係超級想返屋企,不如借尿遁,唔得!就咁留低水原,佢一定會嬲到爆。





(和也瞄一瞄斜對面嘅麻美,只見麻美都係默不作聲,一個人起勁咁㩒電話)

麻美唔通係嬲咗我?都係嘅,分手都未夠一個月就有新女朋友,唔係啵!明明係麻美飛我㗎,無理由嬲我呀,唔通係妒忌水原?

(和也喺度亂諗嘅同時,麻美都忍不住向大家發言)

「大家唔洗就我啵,氣氛好沉重呀,我依家都有男朋友啵,反正我同和也都過去咗啦,大家開開心心盡情飲就得㗎啦。」麻美都有男朋友?都啱嘅,麻美之前都有提過下佢係鍾意咗第二個先飛我。

(大學前輩聽到麻美咁講就放下芥蒂,叫大家重新高興地暢飲,之後和也一不留神飲得太快,不得不去廁所一趟)





(和也又未真係人渣到借尿遁,返到包廂一打開門,水原眼神凌厲咁啤咗和也一下,而和也都打咗個突,事關麻美竟然趁和也去廁所期間主動接觸水原)

「歡迎返嚟呀,和也同學。」麻美向我表示友好,我都扮到一臉自然咁坐低:「坐埋一齊嘅?傾緊啲咩呀?」

「無呀,我見女朋友同學咁靚女,稍微有啲妒忌咁啦,所以咪想了解下佢係咪做model之類咁囉。」麻美佢一路托住鰓一路打量住水原咁講,之後麻美就長驅直進咁問水原:「不過咁,水原同學咁可愛,要應承同和也同學拍拖應該都唔容易呀可。」

(和也其實唔係好明麻美咁問水原嘅用意何在,不過水原就好冷靜咁面對住麻美,麻美見水原無咩反應,就開始一臉無辜起勁自圓其說)

「點解我會咁問呢,你知啦,和也同學佢無咩戀愛經驗,有陣時心情唔好啲眼神又好可怕。」麻美嘅發言開始吸引到大家去聽。





「仲有呀,有時我著條稍為短嘅迷你裙,和也佢就會不停偷望,錫過一次嘴之後,就再無避忌食啲重口味野,嗅到死,夜晚出去食飯,就去埋晒啲地痞餐廳。」麻美果然係嬲我,不過都唔使喺咁多人面前人身攻擊我。

「果然和也同學只係個大細路嚟。」麻美全程都面對笑容咁攻擊我,真係可怕,連我老死木部都睇唔過眼話:「等等呀麻美同學,不如就到此為止啦。」

「吓,點解呀?我有講錯咩,和也同學!」今次麻美直接挑釁我,不過我只係打算用苦笑敷衍麻美就算,不過係我身邊嘅水原就啤住麻美嘖咗一聲,然後就話:「真係聽到火都嚟埋!」

(麻美依然托住鰓面帶微笑咁望住水原,水原就一臉不爽咁拍枱企起身)

「唔該你唔好再講我和也嘅壞話。」水原嬲爆爆咁斥責麻美。

(聽到水原竟然坦護自己,和也由本來苦笑嘅嘴臉變得更尷尬,不過麻美就表現得無辜咁向水原道歉)

「對唔住呀!我原全無係講和也壞話嘅意思㗎。」麻美耍手扭頭咁向水原解釋,不過水原似乎就唔多接受麻美嘅解釋:「將拍拖時候嘅事唱俾人聽,正常人都唔會咁做下嘛,你咁講法,你有無諗過和也會好可憐㗎。」

「誒?女朋友同學,嬲親你真係好對唔住,不過其實和也同學喺我哋個圈子不嬲都係咁。」麻美好無奈咁再向水原解說,但係水原已經嬲到火遮眼:「就算和也真係不嬲係咁就代表可以隨便唱出嚟?」





(和也已經尷尬到一個極點)

「你喺度講咩呀,千鶴?事實就係,我一直都係麻美所講嘅咁。」我真係唔想水原再為一無是處嘅我辯護,因為麻美所講嘅都係事實,根本無爭議嘅空間。

(水原𣊬間就將目光移到和也身上,似乎唔敢相信和也竟然咁無出色,而麻美就繼續一臉我無講錯咁對住大家)

「我走先啦!」水原拋下一句轉身就離開,但係我嘅身體真係俾唔到反應,連木部都睇唔過眼話:「喂!和也你唔去追?」

(麻美喺一個緊張嘅氣氛下㩒服務鐘叫侍應,然後就追加一杯生啤,在場所有人都無言以對,唔通麻美本身就係咁率直。)
已有 0 人追稿