經過西客疲勞轟炸一天後,回家躺在床上,眼皮正要合上時,床邊的電話傳來一陣鈴聲...

「峰哥!」一把噁心的聲音從電話另一則傳來。

聲音的主人是肥軒—我的豬朋,我從中學就認識肥軒,跟他相識多年,他每次用上噁心的語調時代表他有事求我。

「今次又搞邊科。」我用帶著倦意的聲線從喉嚨呼出。

「冇啊,你聽日得唔得閒啊?」他支支吾吾的道。



「唔得閒喎,冇野就咪阻住我瞓覺!」我不耐煩的拒絕。

 其實明天我是放假,但由於每次幫肥軒都是自找麻煩。難得假期當然不能被他打擾,我當然立刻拒絕。

「大佬咪住,真係十萬火急先搵你幫手,搞掂請你食飯。」

「軒哥,你餐餐都話請,有邊餐你請左啊。」

「今次真係唔同,最多咁你上次睇中支Martin我出一半,咁夠未?」



肥軒所指的Martin是幾個月前我在琴行閒逛時看中的結他,由於Martin是老品牌,加上那支結他用的木頭算上等,因此價值不菲。肥軒肯出一半價錢,代表事情對他來說有一定重性。

「軒哥你會咁好死,單野一定唔容易啦。」

仆街啦,肥軒提出的條件引誘著我,下意識回應了他。

「件事好容易咋,只要你聽日幫我去……」肥軒交代我要做的事,我聽完之後臉色一沉。

原來肥軒明天有個實況台台聚要出席,而出席條件是在donate排行榜前十名,他要我代替出席。





沒錯,肥軒是一名火山孝子,肥軒追實況台就眾所周知,想不到他會淪為火山孝子。忘了提及,肥軒是名富二代,所以他要在排行榜前十名可以說是手到拿來。
我不為他的荷包擔憂,但他淪為火山孝子一事我極為鄙視。

實況台近幾年在網上瘋行,但近年卻衍生出一類實況台,基本上這些實況台在直播期間有意無意釋出與性相關的暗示,
當然這些實況主一定是女性,他們在直播上遊走灰色地帶,卻令肥軒這類男性帶來興奮。
Donate換來似有幻無的互動,但有一堆男性願意不斷砸下金錢。

或者他們是享受其中,雖然我無權責罵,但我亦有權鄙視。因為在我眼中這行為是慘過嫖妓,因為你連人家的手都觸不到。

 肥軒成為火山孝子我沒動怒,我只冷冷的回應

「你恨到啦,又洗咁多錢,自己唔去搵我去咁搞笑。」



「你估我唔想咩,搞左咁耐先可以同女神睇戲, 我老虎蟹都狗衝啦,但係我病到床都落唔到啊。」

肥軒病了? 病還有餘力求我,他九成是瘋了。

「屌你咩,病就早啲瞓啦,呢啲台聚下次都有,同埋我冇咩興趣去。」

「我就係驚我聽朝瞓醒都未好返,先叫你幫我,聽日除左睇戲,仲有得同女神單獨影相,仲要係即影即有嗰隻,所以你聽日一定要幫拎到張相啊!」

「吓,咁我去同佢一齊影張相有咩意義,我唔想你對住張相打J嗰陣張相上面有我個樣囉!」

 一想起肥軒一定會用這張相作出自瀆行為,不禁打了個冷顫。

「邊個話用嚟打J,我用嚟收藏架,你聽日就咁影佢張單人相拎返嚟俾我咪得囉。」

「咁假嘅大話你都講得出,同埋一張爛鬼相值唔值半支Martin啊?」



「你識條鐵咩,總之我一定要張相架啦,半支Martin都有你著數啦,一陣我send埋啲時間地點俾你,咪撚唔去啊!」

 我來不及回應,肥軒已經掛掉通話,不久他又傳來台聚的資料。

雖然我極度不情願出席,但看在半支Martin的份上,唯有忍辱負重。
已有 0 人追稿