因為個火山孝子，我識左對孖妹: Ch.21

轉眼間，溜冰的時光過去…

離開時肥軒滿臉笑容，剛才他跟淇淇的互動甚密。旁邊的Nicholas因為追不上淇淇的速度而有點鬱悶。

而我因為蒂蒂的教導下從抗拒溜冰變成不討厭，但談不上喜愛…

「蒂蒂，今日多得你教我，唔係你嘅話我應該仲係成個傻仔咁係到行。」

蒂蒂說這是一樁小事，不用重覆道謝…



「呢件事唔小架，你幫我克服左一個陰影喎，起碼都請你食返餐飯啦。」

「你咁講好似誇張左啲喎，係咪想借啲意約我啊?」

我純粹是想答謝蒂蒂，沒有多想這是約會的邀請，被她一說，我露出尷尬的表情解釋:

「你唔好誤會啊，真係想多謝你咋。」

「我講笑咋，有人請食飯我唔拘啊。」蒂蒂笑著說。



「不如交換contact先，遲啲再約個時間啦。」

跟蒂蒂交換了聯絡方式後就與肥軒歸家，至於孖妹還有約，在溜冰場解散就各自離去…

「頭先同淇淇一齊溜冰嗰陣勁近距離，有幾次仲差啲掂到。」肥軒在回家路上炫耀著…

「差啲即係未啦，咁都攞嚟打飛機。」我說。

「佢話下次再約，下次可能會掂到呢。」



「仲有下次都未必約你啦，你睇唔到頭先Nicholas係咁出擊架?」

「挑，條友溜冰咁弱雞，係隔離陪跑就有佢份。」肥軒又擺出阿舜般的自信。

「人地叫Nicholas個樣真係同謝霆鋒有得揮，你自稱咋，照下鏡先啦。」我沒說出這句心裡話。

雖然是多年朋友，說真話並不會傷感情，但人始終有自尊心，我不忍出重拳把肥軒的自尊擊碎。



我問肥軒是否真的想追求淇淇…

「係啊，唔得咩，佢都約左我一次啦，證明我唔係冇機。」

「又唔係單獨約你，會唔會諗多左啊你。」



「今日唔係啫，約多幾次就變單獨架啦，同埋仲有你幫我啊嘛。」

我回應肥軒他要追淇淇與我無關，為甚麼我要幫他。

「你幫我追淇淇，咁我咪幫返你追蒂蒂囉。」

「你痴線架，我幾時話要追蒂蒂啊。」

「扮咩啊你，頭先見你連排都抄埋，出手快到。」

我無奈地解釋只是想報答蒂蒂的指導…

「想約人食飯，仲話唔係想追人?」肥軒露出詭異的笑容。



「屌，冇你咁好氣。」我翻了個白眼。

我想追蒂蒂嗎?我沒想過這問題，但的確有出於朋友的好感，至少比淇淇的印象好…