因為個火山孝子，我識左對孖妹: Ch.36

因為各種原因，我心理上開始否定我對淇淇的心意。

「吓，唔好講笑啦，我當淇淇係朋友咋。」

「你要咁諗我阻唔到你，唔怕同你講埋淇淇應該都對你有feel。」Sandy繼續說。

我沒想過淇淇是怎樣看待我，她對我有意思嗎? 我們又是甚麼時侯開始變得親近…

我越想思緒越亂，我只好極力說服自己我們只是朋友關係…



我避開這個話題，再三詢問她們幫忙一事，她們最後也願意協助，只是眼神帶點可惜。

「你地頭先傾咩啊?」淇淇回來問。

「冇咩啊，問下跟住有咩做咋嘛。」我裝淡定的回應。

「我一陣想去食pancake，想去試下銅鑼灣新開嗰間。」淇淇雀躍的說。

「咁一陣你兩個去啦，我地仲要準備埋生日會啲野。」Sandy向Erica打眼色。



淇淇有點失落的道:

「仲諗住一齊去試新野架嘛。」

「你都知你個生日會多野搞架啦。」Erica隨即附和。

「我地行先，唔阻你地啦。」午餐後，Sandy和Erica拉著Julie離開…

我無奈的看著她們在當個無謂的媒人…可惜她們的好意，我沒法認領。



「我地都快啲行，聽講間野好多人架。」淇淇持續的抗奮。

到達pancake店的門外，只見一條無盡的長龍，再次展現香港人非常喜愛排隊的精神…

排隊期間百無聊賴，淇淇在滑著電話，我又在想方才Sandy說的話，到底我對淇淇的心意如何。

肥軒傳來訊息打斷我思緒，亦提醒我不能背叛肥軒，奪人所愛正仆街…

「淇淇啊，你覺得肥軒點啊?」我試探一下淇淇對肥軒的感覺。

「咩點啊?」她抬頭望我。

「我問你覺得肥軒份人點?」

「幾好啊，幾和善，對朋友好好咁囉。」



「吓，冇架啦?係得咁多?」我又問。

「仲有啲咩啊?你想問咩啊?」淇淇不解的望著我。

「冇野，想睇下你係咪仲當肥軒係水魚觀眾啫。」我隨便編了個藉口。

「咩水魚觀眾啊，我冇當過佢地係水魚囉!原來你一直咁睇我!」淇淇雙眼冒火的瞪著我。

我心知不妙急忙補救:

「我唔係咁嘅意思，你對fans好係人都知架啦，我係想問你當肥軒係普通觀眾定朋友。」

「阿軒係我嘅觀眾同時亦都係我朋友，冇衝突架喎。」看到淇淇息怒，我捏一把冷汗。



我趕快結束話題免得再說錯話…

經過漫長的排隊地獄，終於可以坐下，淇淇點了個souffle pancake，我跟著她點。四周大部份女性都是打卡多於品嚐，我對面的淇淇也不例外，至於味道如何，我的評價應該跟"餅有餅味"差不多。

「呢度啲pancake又幾好食喎，下次陪我再嚟。」淇淇食髓之味。

我望著她的嘴角沾有果醬，我示意她擦一下嘴角，可是淇淇沒有為意。我下意識伸手欲擦掉果醬途中，腦海閃過一絲理性。我伸手停在半空，淇淇留意到我的手:

「做咩啊?」

「你嘴角污糟左。」我把紙巾遞向淇淇。

我慶幸及時煞住，不然剛才的舉止太過曖昧令人誤會，我不想我倆的關係變得更曖昧不清…

天色昏暗，我送淇淇回家到她家的附近，一幕意想不到的畫面映入我眼簾…