因為個火山孝子，我識左對孖妹: Ch.54

我望著眼前的阿聰，感到有點尷尬…畢竟上次我與他有些碰撞，而且一度誤會他與淇淇的關係…

「二家姐，你幾日冇返過去啦，你洗唔洗返去沖個涼唞下先?。」阿聰問。

「唔洗。」蒂蒂搖頭說。

蒂蒂幾天沒回家?是為了留在這裡陪我嗎?

「蒂蒂…你都攰啦，你返去休息下先啦，我而家都醒返，冇咩事啦。」我說。



「唔得，點知你會唔會啱啱醒返又周圍走，我要睇實你。」她又說。

我們為此爭持不下，這時又有人走進來…是肥軒和Sandy。

Sandy看見我醒來就說:

「阿峰，你醒返冇事就好。」

肥軒則拋出一句:



「峰哥，一醒返就咁精神flirt女啊，咁即係冇事啦。」

「仆街仔，你出少句聲冇人當你啞。」我立刻反擊。

「蒂蒂，有佢地睇住我，我冇得周圍走，你返去唞下先啦。」我又順延剛才的話題。

「係囉，佢有我地睇住，唔會亂嚟架，你放心返去唞唞再返嚟啦。」聰明的Sandy見狀便幫腔。

蒂蒂在眾人勸服之下，終於不捨地先行回家休息，我又叫阿聰陪她回家。現在病房只剩肥軒、Sandy和我…



「你都幾仆街，人地好心陪你就係咁趕人走。」肥軒噴出一句。

「你就仆街，蒂蒂幾日冇返過去休息，我先叫佢返去。」我反駁。

「咁又係啊，你瞓足咁耐，人地就陪足你咁耐，日日照顧你仲幫你抹身，而家醒返就一句趕人走，多謝都冇句，唔知邊個仆街啲呢?」肥軒又說。

蒂蒂真的每天都照顧我?為甚麼要對我這麼好?為我這種人付出不值得…我確實是肥軒口中的仆街，醒來後就只顧自己的事，從來沒理會過蒂蒂的感受，甚至連一句道謝都沒有…

我被肥軒說得無言以對。

「以前追唔到人就喊苦喊忽，而家人地對你好就唔嗲唔吊。」肥軒連珠砲發過來。

「我…」我完全無法反駁。

「佢啱啱先醒返，你俾佢唞下先啦，呢啲野遲啲再講啦。」Sandy中斷了肥軒的攻擊。



「我地唔阻你休息啦…」說畢Sandy拉著肥軒離去。

剩下我一人躺在床上望著天花，回想著肥軒說的話。自從蒂蒂向我表明心意，我就無法接受她的好意，即使對我再好，我也視若無睹。我以為當初拒絕蒂蒂是將傷害減到最低，豈料我三番四次的拒絕她，變相成為對她的傷害。

從前我以為當個爛好人可以顧全大局，失去了最愛的人。後來又以為當個壞人至少不用欺騙感情，到最後我卻把兩個女生的心都傷透。

當你以為你盡力在當個好人時，不知不覺成為了大仆街…

究竟在哪一步出了錯?是我放任蒂蒂追她所愛的那一刻?還是我不肯承認我愛的是淇淇那一刻?可能我的每一步都是錯了才會導致這個結果… 還有辦法修正嗎…