《求婚嗰日，我發現我女朋友鍾意食屎》: 五

由呢一刻開始，我就明白，有一個會食屎嘅女朋友原來真係一啲都唔簡單。
而為咗用好我同敏敏所定下嘅呢一個月「思考期」，我每日都努力咁為自己「擁有一個會食屎嘅女朋友」呢件事做好心理準備。
 
「屎，我係一督屎～你食香蕉，我做屎～」
喺Staycation之後，每當我翻工，我所看管嘅廚房，每時每刻都係播住「屎撈人」呢首歌。
「Sir，話哂我哋係廚房，播呢首歌會唔會唔太適當呢？」有一個煮緊咖哩嘅印度廚師皺住眉頭問我。
「咩唔適當？生老病屎都係人必經階段，而我哋做廚師嘅，煮一餐美食，到最後都係會變做屎，然後屎又會化成肥料，再滋養翻食材㗎啦。呢個係『道學』之中嘅『周而復始』，我打算一邊俾大家翻工，一邊思考人生，咁有冇問題吖？如果你咁都接受唔到，唔該你翻印度食蕉。」我大條道理咁講。
「你高級過我，你咁講，實無問題嘅。」咖哩廚師無奈兩手一攤，繼續被迫陪我喺「屎」嘅音樂之下工作。
 
除咗工作環境之外，我亦唔放過日常生活嘅一分一秒去令自己更加接受「屎」呢樣嘢。


所以呢一刻放工嘅我，一邊坐喺巴士上面，一邊專心咁睇緊Youtube。
「你咁講係因為你懶係受過高等教育，出入又懶係上流社會，係你嘅懶係學識認為屎就係無聊同污穢嘅。就等於你老母或者大姨媽，由細到大話你聽鬼係恐怖嘅一樣，所以就算督屎唔臭，你都一樣睇佢唔起。鬼唔埋嚟咬你，你都一樣會驚。如果我哋能夠反轉呢個觀念咁就得喇，夠膽埋嚟逗下佢吖。」Youtube入面《回魂夜》嘅周星馳咁講。
「你咁講係因為你懶係受過高等教育……」而我，就好似一個學緊外語嘅人一樣，跟住佢一句一句咁講，希望可以催眠自己，屎係並唔恐怖嘅。
而坐喺我隔離嘅乘客，成程巴士都係用奇怪目光望實我，仲刻意同我保持住半張櫈嘅距離。
 
當然，除咗呢啲睇落有啲不切實際嘅行動之外，我亦都有做一啲相對地現實嘅嘢。
其一，係我去咗搵一位中學同學兼死黨，光頭王。
光頭王，同我一樣都係廿六歲，而家係一位醫生。
中學嘅時候，佢依然擁有同一般人無分別嘅髮量。
但聽聞後來因為大學醫科壓力太大，佢竟然喺一個學期之內甩哂啲頭髮。


但係上天係公平嘅，佢失去咗嘅頭髮，化為咗佢GPA嘅養份。
所以，時至今日，佢已經係一個光芒四射（尤其頭頂）、判症出色嘅醫生。
搵佢，我嘅目的當然係想了解多啲敏敏嘅病情，睇下有冇咩可以醫到佢嘅辦法啦。
 
聽完敏敏嘅病情之後，光頭王好似捽碟咁一直摸住佢個光頭，但係就係無出聲。
「點啊？有冇得醫？」睇住佢呢個反應，我有啲唔耐煩咁問。
 
「嗯，呢件事呢，情況有啲複雜。我首先解釋下，所謂異食癖，係被收錄喺『精神疾病診斷準則手冊』入面，亦都被稱為『異食症』，算係精神病嘅一種。嗱，一般情況嚟講呢，異食癖嘅出現，通常係患者不自覺咁想要彌補一啲童年創傷而引發嘅病症。
 
你女朋友病發時間係五歲，而以你所認知，佢無經歷過咩童年創傷事件，而且父母關係又好。而且最有趣嘅地方係，根據佢嘅描述，佢每次被引發出食屎呢個行為，竟然係因為朱古力，而唔係一啲激發情緒嘅事情，所以同一般嘅異食症相比，你女朋友情況係有啲特別。


 
而最奇怪嘅一點，根據『精神疾病診斷準則手冊』，患者出現異食症，通常都會維持一段時間，而且見親嗰類物件都會想食。但係睇你女朋友，除咗遇上朱古力之外，其他時間佢對屎係完全無特別嘅食慾，而且又唔會自己刻意走去搵屎嚟食。呢一點，係更加令我諗唔通嘅。」光頭王捽住自己個光頭咁講，我開始明白點解佢個頭可以咁光鮮。
 
「不如你試下講重點吖大佬。」光頭王長篇大論咁解釋完一輪，我好似明，但係又好似唔明。
「如果以我嘅專業判斷呢，我會大膽作出一個假設。」光頭王終於放低咗喺頭上面嘅手，好認真咁望住我，「我會估，你女朋友食屎嘅原因，其實可能同異食症一啲關係都無。」