《求婚嗰日，我發現我女朋友鍾意食屎》: 二十二

當敏敏父母分別向左右兩邊跑嘅時候，我同敏敏即刻交換一個眼色，各自跟住一個。
世伯一個箭步，跑咗入去洗手間。
而伯母就走咗去佢哋房入面嘅套廁，「砰」一聲就閂埋咗道門。
「而家點算啊？」敏敏從佢媽媽睡房度伸咗個頭出嚟，用口型問我。
「睇多陣先！」我冷靜咁企喺世伯洗手間外面，思考下跟住落嚟有咩對策。
 
時間就咁過咗兩分鐘，敏敏喺呢個時候Send咗個message俾我：「以我食屎咁多年嘅經驗，兩分鐘通常係啱啱好自己痾完屎準備食翻嘅時間。如果我哋再唔諗辦法，一旦錯過呢個時機，佢哋到底邊個食咗屎我哋都唔會知㗎。」
「既然係咁，無辦法啦，唯有格硬嚟啦！」我覆咗敏敏message，然後攞出咗一張信用卡。
通常屋企嘅門，只要你有一張信用卡從側邊攝入門鎖位，你都可以喺唔開鎖嘅情況之下將道門打開嘅。
我同敏敏為咗知道真相，決定孤注一擲，各自都係兩個廁所門外使用呢招絕招。


 
信用卡插入。
鎖，「嗒」一聲就打開咗。
我帶住極度緊張嘅心情，慢慢將廁所門打開……
 
第一眼，我望到世伯。
而世伯，亦都喺座廁上面坐得非常端正咁望住咗我。
無食屎嘅畫面，手同口亦都無屎跡。
我哋兩個男人，就咁樣對望咗幾十秒。
 


「點解會咁嘅呢？」世伯好冷靜咁問咗一句。
「因為……」呢一刻，我唯有極速腦筋急轉彎：「因為我都好想去廁所，所以睇下呢度會唔會多個座廁咁啫。」
世伯望左望右，然後好認真咁答：「似乎就未有喇，如果你真係好急，我都唔介意借個洗面盤俾你先嘅。」
「我份人都幾有耐性嘅，當然等得啦。真係唔好意思啦世伯，打攪哂你嘅雅興。你慢慢啦，Enjoy。」我補上咗一個笑容，然後九秒九衝出廁所，閂翻道門。
雖然頭先場面真係尷尬到尷尬癌咁，但係而家至少發現，食屎嘅人既然唔係世伯，咁即係伯母啦！
 
正當我咁諗嘅時候，敏敏啱啱好就從佢媽媽睡房走咗出嚟。
「我媽媽好正常啊，我打開門嗰刻，佢坐咗喺座廁度，幾尷尬啊！」敏敏搖住頭講。
「咁奇怪？我頭先見你爸爸嘅時候都係咁喎！」我摸一摸下巴，非常認真咁思考，似乎，成件事並無咁簡單，「我懷疑，佢兩個係夾埋嘅。」
「夾埋？」敏敏睇嚟唔太明我嘅意思。


「從佢哋聽到今晚飯餸有朱古力開始，佢兩個就已經有意識一齊唔食嘢。然後一齊去洗手間，一齊有相同反應，我估，可能佢哋其中一個係有問題嘅人，而另一個，係為咗唔俾我哋知道真相，所以極力配合去掩護嘅人。始終，我相信作為你爸爸媽媽，佢哋都唔想自己個女同女婿知道自己食屎掛。」我講出我嘅推測。
「咁我哋仲可以點啊？」敏敏皺起眉頭。
「放心，我仲有一招。」我胸有成竹、氣定神閒咁笑咗一笑。
 
過咗十幾分鐘，世伯同媽媽各自從洗手間度走咗出嚟。
「一定係今日下晝食咗間餐廳唔乾淨啊，嘩，痾到我吖！」伯母坐翻嚟飯枱，率先講嘢。
「係囉，唉，痾得咁辛苦搞到個人無咩胃口添，阿博，睇嚟今晚啲餸菜都係唔食得住喇，我哋雪好佢，聽日再食啦。」世伯咁講，意圖好明顯就係想避開唔食呢一餐充滿朱古力嘅嘢食。
「好吖，無所謂啊，身體要緊啊，咁你哋坐下先，我同敏敏幫手執碗啦！」我好熱心咁幫手，其實，係準備要為下一步計劃而努力。
 
當晚餐枱執好哂之後，敏敏父母都坐咗去梳化睇電視。
呢個時候，我同敏敏就從廚房出咗。
「爹哋媽咪！我同阿博最近學咗種按摩方法啊，有啲似你哋以前做嗰啲熱石按摩㗎，你哋專心睇電視吖，我同阿博幫你哋按幾下！」敏敏一邊講，一邊同我一齊拎出咗一樣嘢。
一隻啱啱煮熟嘅雞蛋。
呢個就係我嘅秘密武器。