《求婚嗰日，我發現我女朋友鍾意食屎》: 三十六
大概五十分鐘後，警察就嚟到舖頭，由於有閉路電視可以證明事件與我無關，所以警察都只係簡單問咗我成個事發過程就俾我離開喇。
就喺我要離開嘅時候，有個人就啱啱好嚟到舖頭。
係娟姐。
作為舖頭經理，從佢兩眼紅紅嘅反應，睇嚟佢已經知道發生咗咩事。
「你喺度等一等我，我有嘢要同你講。」娟姐用命令式嘅口吻同我講咗一句，然後就走咗入舖頭配合調查。
睇到娟姐呢個樣，我感受到佢將要有啲好重要嘅事要同講，所以我都唯有留停等佢。
等嘅過程裡面，救護員將翠姐抬咗上救護車，呢個時候嘅佢連面色都轉埋黑色，明顯係中咗毒。
雖然我同翠姐只係短短相處咗三個星期，但係佢一直都當我係仔咁照顧，算係咁多譚仔姐姐之中，對我最關心嘅一個。
我估唔到自己為咗調查，竟然會間接令佢中毒受傷。
同時間，我諗起佢成日同我提起嘅家人，我心入面更加覺得內疚。
「喂，我行得喇。唔介意嘅話，上嚟我屋企傾。」娟姐呢個時候從舖頭走咗出嚟，叫咗我上佢架車，然後就車咗我翻去佢屋企。
「廢話我就唔多講喇，入正題啦。你點解要打開萍姐個Locker？」
我入咗娟姐屋企，一坐低喺梳化，娟姐就已經開始問話。
「佢嘅下落，同我一個朋友有關，所以我需要搵到佢。」我嘗試用最精簡嘅方法去解釋我嘅處境。
「就係因為呢個原因，所以你先嚟到我哋舖頭做？」
「嗯。」
「唉，我其實一直留意到你問起萍姐，只係我估唔到你會咁大膽去開佢個Locker，如果唔係我一定會阻止你。」娟姐無奈咁搖一搖頭，然後反問我一句：「照我估，你應該唔識萍姐？」
今次，輪到我搖頭。
「嗯，所以你先敢咁大膽去掂萍姐啲嘢。」娟姐點一點頭，自言自語。
「大膽？」娟姐呢句說話引起咗我嘅注意。
「你朋友係咪有啲咩奇怪病？」娟姐無正面回答我，反而又向我問咗個問題。
「嗯。」對於娟姐呢個問題，我有啲意外。
「咁睇嚟，你應該唔會唔知萍姐嘅底蘊喎。既然知佢係一個養蠱人，又點可以唔事事小心啲呢？」娟姐一邊講，一邊索性點咗枝煙喺度食：「萍姐係我金蘭姊妹，佢走嘅時候曾經交代過，千奇唔好再同佢有關嘅講俾其他人聽，除咗……一個特別嘅人之外。所以，每次你向人問嘢，我都刻意阻止你，就係唔想俾你知太多關於萍姐嘅事。」
「娟姐你所講嗰個特別嘅人，係咪叫做『丘志傑』？」丘志傑，其實就係我外父，即係敏敏爸爸嘅名。
「我都估到，今時今日仲要咁認真去搵萍姐嘅人，一定多多少少同呢個賤男人有關。」娟姐聽到呢個名，個口微微張開，將手中嘅煙拎咗落嚟，吐出咗一口煙圈，「你係佢個仔？」
「唔係，佢係我女朋友嘅爸爸。我女朋友就係因為佢爸爸犯下嘅錯，而家仲受緊苦，所以我做咁多嘢，其實只係想幫我女朋友。」我誠懇咁同娟姐講，因為我覺得佢其實係一個明白事理嘅人，所以我情願講出真相，希望佢願意明白同幫我。
「因果因果，昔日惡因，今日惡果，只係惡果種喺後人身上，確實係唔公平嘅。」娟姐講出呢翻說話，似乎有多少唏噓，「今日我叫得你嚟，其實就係想講清楚成件事。既然你對我咁坦白，我都唔介意話你知，其實我同萍姐識咗好多年喇，我哋曾經一齊做過夜總會，之後有咁上下年紀就夾錢買個『譚仔』牌翻嚟一齊做下啲正行。」娟姐一邊講，一邊從銀包入面拎咗張相出嚟俾我睇。
呢張相係一張菲林相，睇張相甩色嘅程度都知道有翻咁上下時日。
相入面，有兩個著住小背心同喇叭褲嘅後生女。
其中一個女仔，我一眼就認得出係後生嘅娟姐。
而喺佢身邊，有一個身型瘦削嘅女仔，而呢個女仔最搶眼嘅地方就係右眼角邊有一粒痣，根據我記憶，呢一點同世伯形容向彩萍嘅外貌係吻合嘅。
換言之，喺娟姐身邊嗰個就係年青嘅向彩萍。
佢兩個都食住兩支煙，仲要搭哂膊頭，睇嚟世上真係有好多同凱婷一樣咁壞嘅女仔。
而佢兩個所企嘅背景後面，有一個大大嘅霓虹燈牌，寫住「金皇宮夜總會」。
「想當年，我都同見證住嗰個『丘志傑』點樣害到萍姐不似人形。嗰時丘志傑晚晚都嚟搵萍姐，有時仲會等埋萍姐放工。我嗰時聽萍姐講，佢哋甚至諗過想結婚，而萍姐亦為咗呢個男人默默儲錢想幫自己轉行。點知我聽萍姐講，就喺一晚，萍姐用佢嘅蠱術召喚啲蟲嚟幫呢個男人解決咗問題，點知呢個男人竟然反而嫌棄佢，仲二話不說就拋棄佢添。萍姐當年傷心到不得了，所以就經常靜靜雞對啲唔老實嘅男客人落蠱，令到班咸濕佬周身唔舒服。
當時我見到萍姐日日都以淚洗面都唔係辦法，所以後來就同佢夾錢開咗呢間『譚仔』。有咗間舖，佢好似都多咗啲新目標，亦都將份心機轉咗嚟搞舖頭嘅嘢，例如研發下湯底咁。當年開舖嘅時候，萍姐其實都係三十出頭，所以有唔少客人都想追佢，但係都俾佢一一拒絕，似乎係未放得低嗰個賤男人。
呢間『譚仔』，一做就係十年，直到五年前，佢突然話有事要離開，連去邊都無交帶一聲。大概喺佢走咗半年之後，佢先寄咗一封信嚟舖頭。內容講低咗三樣嘢。第一，佢已經翻咗雲南，應該唔會再翻嚟，所以將舖頭交咗俾我；第二，如果有任何唔係丘志傑嘅人搵佢，又或者有咩人搵舖頭麻煩，就帶嗰啲人去開佢舖頭個Locker。而我去到今日先知，原來Locker入面收埋嘅，係一條毒蟲。第三，如果我有一日重遇丘志傑，就請我話俾丘志傑知萍姐嘅香港地址。」
「聽娟姐你咁講，你知道向彩萍嘅香港地址？」我有啲驚訝咁講。
「我知吖。」娟姐噴出一口煙。
「你可唔可以就當我係代表丘志傑嘅人，將個地址話我知？」我用真摰嘅眼神望住娟姐，希望可以得到佢嘅同意。