《求婚嗰日，我發現我女朋友鍾意食屎》: 五十七
自從呢一晚開始，丘志傑除咗偶爾會跟住老闆一齊嚟到夜總會之外，佢仲會周不時一個落嚟夜總會搵向彩萍。
而對向彩萍嚟講，丘志傑就好似一隻將佢從污濁嘅垃圾堆之中拉出嚟手，只有面對丘志傑，佢先可以做翻最原本、最純淨嘅自己。
所以，向彩萍開始每一晚都期待丘志傑嘅出現，當佢見唔到丘志傑，又會有一種幻得幻失嘅感覺。
「唔好沉船啊！夜場無真愛啊！」阿娟聽完向彩萍嘅女生心事之後，氣定神閒咁回應佢。
「我無沉船啊，純粹係覺得有個咁嘅客人幾好啫。而且佢講過，佢已經有一個拍咗好耐拖嘅女朋友㗎啦。」經過三個月，向彩萍嘅廣東話已經流利咗唔少。
雖然佢口裡說不，但係心裡其實很誠實，至少佢都好清楚自己會對丘志傑有種「掛住」嘅感覺。
「你係記得佢係客人就好喇。做我哋呢行呢，分得清楚好啲，如果唔係，到頭來受傷嘅都係你自己㗎咋。」阿娟睇穿咗向彩萍不安份嘅內心，但係亦都知道去到呢啲關口，旁人講咩都無用，所以唯有無奈咁樣笑咗一笑。
向彩萍同丘志傑嘅見面，由兩三星期一次，變到一星期一兩次。
佢兩個嘅距離亦都從面對面咁坐，變到好自然咁挨住對方。
對於呢一種不言而喻嘅親近，丘志傑無作出反對，向彩萍亦都樂在其中。
而直到某一晚，佢哋之間嘅關係終於出現咗突破性嘅發展。
嗰一晚，當丘志傑嚟到夜總會，向彩萍見到佢好少有咁已經飲到醉醺醺。
當向彩萍扶佢坐低嘅時候，丘志傑突然一手攬住咗向彩萍，將佢拉埋自己面前，兩隻眼半開半合咁問咗一句：「你答我，你覺得我係咪好廢？」
「唔係啊。」向彩萍望住呢個失常嘅丘志傑，有啲不知所措。
「我係你個客，你一定唔敢話我啦。但係我想你講真話啊！話我知，我係咪好廢？」丘志傑對住向彩萍大嗌一聲，吸引咗隔離枱嘅人都望咗過嚟。
好彩今日丘志傑嚟得比較遲，有幾間包廂房已經空咗，向彩萍趁無人發覺就將佢拉咗入房，廢事嚇親其他客人。
「你點會廢呢？你成日都咁有耐性聽我講嘢，又唔似其他客人咁會對我摸手摸腳，而且我聽你講你公司嘅嘢又講得頭頭是道，仲成日教我好多新嘢，咁你又點會廢呢？」向彩萍一邊講，一邊不自覺咁露出咗笑容，原來就連佢自己都唔覺內心收埋咗咁多對丘志傑嘅欣賞。
「如果你係講真，點解我外父從來都唔欣賞我？次次上佢屋企食飯，一係就窒我人工低，一係就串我無前途無出色！大佬，有邊個打工仔唔係由低做起！我日日忙到飯都無時間食先搏到個最佳業績翻嚟，我外父知道之後淨係冷笑幾聲，話咩『做埋哂啲細雞公司攞業績獎有幾出奇啫』。然後，我女朋友只係任由佢老豆話我，一句聲都唔出，我知吖，一定係連佢都咁諗我。點解，點解我做咁多嘢都無人會睇到！」丘志傑瞓咗喺梳化上面大吵大鬧，但向彩萍亦發現佢眼角流出咗兩行眼淚。
向彩萍踎咗去丘志傑身邊，望住呢個失落又頹廢嘅佢，向彩萍覺得有啲心痛。
向彩萍伸出手，慢慢咁為佢擦走流出嘅眼淚，然後好溫柔咁講：「我睇到啊，我知道你係一個好人。」
丘志傑聽到呢句說話忍唔住抬起咗頭，半醉嘅表情好似變得有少少清醒。
就喺呢一刻，向彩萍同丘志傑嘅距離變得好近，好近。
一直以來，向彩萍對丘志傑嘅掛念、期待、欣賞、全部都化成一把聲音，喺心底鼓勵向彩萍踏前一步。
於是，向彩萍合上咗雙眼，慢慢將頭靠近呢一個喺夜總會入面唯一會尊重自己、聆聽自己、關心自己嘅男人。
兩對嘴唇，就係咁樣接上咗。
丘志傑喺酒精驅使之下，被喚醒咗按捺不住嘅激情；
向彩萍相反地係俾內心嘅傾慕所鼓勵，每一個接吻都係豐富嘅感情。
兩個人，都各自有唔想將嘴唇分開嘅原因。
丘志傑需要呢份擁抱嘅溫暖同關心，向彩萍需要眼前呢個人嘅關注同愛護。
喺夜總會嘅一角，情與慾就咁開始互相糾纏。
當向彩萍已經迷失喺呢一場熱吻嘅時候，丘志傑突然停止咗所有動作，好冷靜咁講咗一句：「不如我哋出去啦。」
呢句說話，向彩萍曾經喺夜總會聽過好多次。
最初佢並唔明點解翻工可以突然離開，直到阿娟解釋俾佢聽，「出去」就即係客人想包你過夜。
當向彩萍明白之後，佢從來都無答應過任何一個客人呢個要求。
只不過，當丘志傑咁講嘅時候，佢二話不說就應承咗。
於是，丘志傑準備埋咗張單離開夜總會，而向彩萍內心就變得小鹿亂撞，因為有一件佢知道將要發生，但佢又唔知可以點樣發生嘅事情，將會喺今晚出現。
就喺丘志傑攞出銀準備俾錢嘅時候，向彩萍留意到佢面色一變。
順住丘志傑嘅眼光，向彩萍就知道咗點解佢會有咁嘅表情。
因為丘志傑望到嘅，係佢銀包入面女朋友同佢嘅合照。
大約三秒之後，丘志傑好冷靜俾咗錢。
當佢同向彩萍出到街嘅時候，丘志傑笑住咁話自己飲酒飲到有啲頭痛，所以想翻屋企休息。
向彩萍當時無拆穿丘志傑嘅大話，只係笑住咁送佢走。
當丘志傑走咗之後，向彩萍去到一個公園坐低，想要處理一下心入面複雜嘅感覺。
甜，係因為今晚第一次同自己鍾意嘅人情不自禁嘅接吻。
苦，係因為知道自己唔可能擁有呢一個自己鍾意嘅人，至少目前唔得。
向彩萍自問自己唔係一個壞心腸嘅人，雖然佢鍾意丘志傑，但係就從來都無想要搶走佢嘅心。
因為要搶，就代表住有失敗嘅可能性，到時候，向彩萍就可能永遠都再見唔到丘志傑。
但其實對向彩萍嚟講，好似今晚咁，可以偷嘗到一次同佢接吻嘅機會，已經足以令佢心滿意足。
向彩萍知道自己呢個願望好卑微，但係相比起喺夜總會所做嘅一切，其實能夠有一個自己真心鍾意嘅人去錫自己，呢件事感覺上反而算係彌足珍貴。
作為一個夜總會小姐，向彩萍無咩願望，佢只係求可以喺丘志傑，呢個得唔到嘅男人身上獲得更多嘅關心同照顧。
身心俱疲嘅時候，向彩萍總會特別容易掛住自己嘅媽媽。
而呢一刻，向彩萍諗翻起媽媽俾自己嘅叮囑，「嚟到香港，記得要帶眼識人。」
向彩萍望向天空，不自覺咁露出咗一個釋然嘅微笑。
媽媽，喺呢個地方，我已經搵到一個好好嘅人喇。
一個，我唔可能擁有，但係我可以放心咁留喺佢身邊嘅人。
雖然係咁，但係你放心，我都一樣覺得幸福。