《一個訂婚書生嘅出軌故事》: 愛情泡菜（上）
注：以下文章包括大量劇透。強烈建議未睇過大學故同書生故嘅讀者睇完舊作再繼續。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
「不如起身散下步。」我牽著鍾美嘉的手，在西九龍海濱公園隨意遊走。
「到我問返你問題啦。」鍾美嘉說。
「好阿。」我回答。到底她想瞭解我的什麼事呢？
「你之前話自己食鹽多過我食米，咁到底你拍過幾多次拖？」
我聽到她的問題後忍俊不禁。
「笑咩阿你，有咁好笑咩？」
「我笑緊我地做過愛，拖住手拍拖散步，而家先嚟瞭解大家，啲Steps掉轉晒。」
我舉起十指緊扣的手：「你覺得我拍過幾多次拖？」
「我七年拍七次，你年紀大我七年⋯按返比例最少十四次？」她認真計算。
我心中數著：林敏兒、溫梓柔、Michelle、江柏琪，原來我的認證女友只有四個阿！
「四個咋，少過你。」
「車！得果四個，講到自己幾咁經驗豐富！」
「咁又真係唔及你多。」
「得啦，即係話我公廁。」她好像很介意別人覺得她是公廁。不過正常女生也會介意別人說她是公廁。
「喂，我咩都無講過阿。」我補充：「四個係正式拍拖。其他拍唔成拖、曖昧、SP果啲就唔計啦。」
「其他果啲，又有幾多呢？」
「真係數唔到啦。」
鄰居丁丁、師姐阿婷、網友Aka、組媽的朋友Candience（她的名字是不是咁寫的？）、宿友Hailey、在宿舍飯堂認識的PTGF Maisy、沒能交往的Stephanie⋯還有拒絕了的小學同學王家欣、酒吧客人張翠珊、宿友Carmen、蘭桂芳裡想找人破處的女生⋯End game數齊角色了嗎？
如果沒有漏記，和我擁有朋友以外關係的女性，真的剛好有十四個。
我的年青時代總算沒有白過，集郵人數在和江柏琪一起後便暫停了上升的趨勢。
年輕時醃製的愛情泡菜，現在慢慢回味。
「有無二十個？」鍾美嘉問。
「應該無，十幾個啦。」
「咁多人入面，邊個對你嘅影響最深、印象最深刻？」
「呢條問題有啲難答。」我認真思考：「其中四個人對我嚟講比較深刻。」
她們分別是林敏兒、Michelle、Stephanie和江柏琪。
「咁阿，你由最早果個講起。」
「有排講喎。」
「唔緊要，你講我聽。」
「我第一個女朋友係喺小六嘅時候認識，追咗佢成年，中一先拍拖。佢係我第一個鐘意嘅女仔，我每日返學都會買冰紅茶哄佢開心，為咗同佢升同一間中學而發奮讀書，佢想點我都會盡力滿足。我地約定填同一間男女校中學做第一志願，放棄本來諗住入傳統男校或女校嘅意向。點知到升中派位果日，我先知佢屋企人迫佢填咗間女校做第一志願，結果我地入咗唔同嘅中學。」
「咁你地係點樣一齊㗎？」
「因為呢件事，我同佢嘈咗場大架，由Last day到中學開課，一共冷戰咗四個月。」
「咩料呀，四個月咁耐？」
「果陣好戇居，覺得四個月時間唔會改變我地嘅關係，臉皮太薄所以四個月後忍唔住先搵佢。好在佢都仲鐘意我，接受咗我嘅表白，就開始拍拖。」
「後來佢慢慢疏遠我，成個月都唔肯見我，俾我發現咗佢瞞住我同另一個男仔去自修室。我雖然好嬲，都仲拎晒身家去買禮物去哄佢。佢口中講我地仲係男女朋友嘅關係，但語氣同表情好冷淡。我知道佢對我無晒感覺，喺無真正講過一句分手嘅情況下就完咗。過咗無耐，佢就同咗果個自修室男仔一齊咗。」
「所以你中一嘅時候已經體會到我所講，所謂嘅名份只係其次。」鍾美嘉說。
「可以咁講。佢係令我情竇初開嘅對象，改變咗我整個人。我同佢分手果時傷心到同朋友唱K都忍唔住匿埋喺廁所喊，身上某個部分嘅林書生已經死咗。可能自我防衛機制令我麻木，後來我無再試過因為女仔而喊，係一次都無。」
「咁下一個女朋友呢，你好鐘意佢㗎？」
「同初戀分手之後，我貪玩Flirt坐我隔離嘅同學，佢對我有意思，玩玩吓咁就一齊咗。」我續道：「不過我對佢好仆街，我根本一啲都唔鐘意佢，青頭仔呃蝦條破處。所以佢係對我人生無乜影響嘅一個對象。」
「就係你呢啲呃人蝦條嘅仆街，搞到我喊咗幾多晚！」鍾美嘉有點憤怒。
「係，我都認自己係仆街。初戀嘅失敗，加上青春期強烈嘅性慾掩蓋咗我嘅同理心，我整個初中生涯都係食女、搵SP，無拍過拖。付出咗咁多心血，對方都唔識欣賞；反而搵把口哄吓女仔，就有一堆女仔排隊俾我食，點解我對感情仲要咁認真呢？」
「可能係你未遇到一個真心鐘意嘅女仔姐。」
「嗯，直到中四嘅時候，我認識咗而家嘅未婚妻。」
「吓？你地中四就識？」
「無錯，我對佢一見鍾情，死纏爛打。佢因為屋企問題，而剛好我父母要離港發展公司業務，我就偷偷叫佢搬入嚟，我地同居咗四年，直至升大學。」
我才察覺，自己對於喜歡的對象也可以很長情，即使被拒絕，也能堅定不移地追求。
「咁你地咪一齊成十幾年？」
「我同佢識咗十年，不過其中我地先拍拖三年。」
「即係同居果四年都無一齊過？」
「係，追咗四年佢都係唔接受我。」我續道：「講出嚟你都未必信！同居四年我無同佢搞過嘢，因為佢，我仲主動斷晒初中嘅SP關係，高中乖到食自己。」