傳說一班X基地誕生

逆風中學係一間好平凡嘅學校，成績大約係 Band 2中至 Band 2 尾，但校長經常對內宣稱自己係 Band 2 頭，仲話學校嘅成績遠超同區中學嘅水平，每次聽佢咁有自信講大話，我都好想俾個反白眼佢，心諗：佢講夠未呀？

而我作為一個中五嘅學生，冇邊科係特別叻，但天生我材必有用，我最勁嘅就係打羽毛球，我曾經橫掃學界羽毛球比賽冠軍，至今仍然係一個不敗嘅傳說，羽毛球係我嘅靈魂，每次拎住球拍嗰一刻，我都會感到全身熱血沸騰。

「尚進傑，你唔使帶書包返學㗎咩？」

唔了解我嘅人，都會問我同一個問題，我已經好耐冇帶書包返學，我將所有書本、功課同埋筆袋，全部都放喺學校個locker，因為我最怕麻煩，唔想將啲嘢拎黎拎去，我返學，只係帶塊羽毛球拍就夠啦，點啊，係咪突然覺得我好型呢？

「你幾大呀，仲喺度玩玩具槍？」施雨婷無奈地問。





「你理得我啫，我將來係要成為一個黑手黨大佬嘅男人。」雷培自信地說。

「得啦，得啦，知你勁啦，邊個叫我入咗奇奇怪怪嘅一班。」施雨婷只好返到座位上，繼續做今日要交嘅功課。

我哋係中五K班，班上只有七個學生，可以話係小班教學，真正嘅原因係我哋太難搞，放喺正常班房成日嘈住人哋上堂，於是老師就將我哋放埋一班，正所謂痴痴呆呆坐埋一枱，我哋可以話係物以類聚。

世人眼中嘅好學生同壞學生有咩分別？好學生就係讀書好勁嗰啲高材生，而壞學生就係嗰啲成日唔讀書，成績好差嗰啲學生，但係我哋唔食煙、唔飲酒、唔賭錢，喺老師眼中，我哋仍然係問題學生，被放棄的一群。

當你喺課室搵唔到我嘅時候，咁我都應該好大機會喺訓導室出現，除咗課室，呢度就係我哋經常出入嘅地方。





「尚進傑，又係你呀，今個月已經第幾次啊？我都已經數唔清啦。」

冇錯，又係我，練波嘅時候，我唔小心用力得滯，擊碎左禮堂個玻璃窗，賠錢已經唔知賠左幾多次。

「你留喺度好好面壁思過。」

張老師又再次將我獨留在訓導室，安靜嘅環境令我聽到時鐘滴答滴答嘅聲音，我百無聊賴咁喺訓導室四處遊走，呢五年都唔知有幾多時間喺度度過，行吓又坐下，坐吓又行吓。
就係呢個時候，一件神奇嘅事情發生啦，我竟然發現一道神秘嘅門，睇落似係裝飾多啲，但話唔定真係可以打開呢。

我懷着半信半疑嘅心態，用力咁扭開道門，入面居然係一個密室，而且係一個金庫，唔通呢度就係傳說中嘅書中自有黃金屋？我察覺到門外有動靜，好快咁偷咗一條金條，然後扮乜事都冇，迅速咁關返道門。





「你反省完就返上課室啦。」張老師將我趕走。

「你哋知唔知我喺訓導室發現咗啲乜嘢？」

「發現咗啲咩啊？」雷培冇心裝載地問。

「我發現咗黃金，我知你哋唔信㗎啦，登登登登，我偷咗一條出嚟。」

「呢條金條係真定假㗎 ？」令文陽走過來睇。

「當然係真啦，咬極都咬唔爛。」

為咗求證真偽，我哋唯有將金條拎去金鋪，被專業人士來判斷。





「100%純金，咁靚嘅黃金你哋喺邊度買入㗎 ？」老闆雙眼發光地問。

「喺邊度買唔係重點，重點係佢值幾多錢？」

「初步估計應該值幾百萬至幾千萬，但係你哋冇保證書，而且又着住校服係中學生，我點知你哋係咪偷返嚟㗎 ？」

「你唔要就算，出面大把人爭住要。」雷培使出必殺技。

「等等……我冇話唔要。」

就係咁，老闆俾咗三箱現金我哋，我哋真係仲開心過中六合彩，睇來以後唔使讀書，唔使再返學，可以去環遊世界啦。