執到叮噹 殺死大雄: 5. 青山依舊在

望住載住大雄嘅警車越開越遠，我終於收拾心情，踏上回家嘅道路。好彩我有孭住個斜孭袋，輕鬆收埋咗個空氣炮。

返到屋企入埋房，我見到叮噹仍然靠係我牀角，郁都唔郁下，果然十分聽話。

當我關埋房門時，叮噹就立即對我講：“你返嚟啦。”

“嗯，叮噹啊，你估下我頭先見到邊個？”我小心咁放低我個斜孭袋。

“你見到邊個？唔通...你見到大雄？！”叮噹跳起身咁講。我望向門口，再示意叮噹冷靜啲，然後先講：“無錯。”





叮噹碌大佢原本已經夠大嘅眼問我：“咁佢衣家？你...有無...”

我心諗：“你地有無咁大仇口啊，一見面就想問大雄死左未。”諗還咁諗，我咳一聲，答：“無，我見到佢時，佢已經俾差佬塔左上車。同埋佢唔似有帶百寶袋係身。”

叮噹繼續碌大佢雙眼，表示不能理解。

對此，我花費左一段時間同叮噹解釋返“差佬”，“塔走大雄”嘅意思，再繼續講下呢邊世界嘅一啲基本常識諸如此類。講咗唔知幾耐，叮噹終於點頭表示清楚明白。

叮噹來回踱步，然後講：“既然唔知大雄幾時放返出嚟，放返出嚟又唔知會去咗邊，咁唯有順其自然。我仲有另一樣嘢想搵。”





我坐上張牀到問：“嗯？你搵緊咩？”

叮噹答：“我搵緊時光機嘅入口，返去嗰邊世界嘅入口。如果大雄百寶袋無跟身，咁我要返去嗰邊世界。”

“時光機入口？”我有啲疑惑。

“係，我有少少失憶，已經唔記得左個位置。可能要麻煩你同我一齊去附近搵下。”

我唔係好明時光機原理，聽得唔係十分之明白，總之，我同叮噹有兩樣嘢要做，第一就係搵大雄，第二就係搵時光機入口。





星期六，一朝早，我用架車仔推住叮噹，係屋企樓下附近隨便兜一兜，搵左半日，一無所獲，仲收到好多怪異嘅目光。

實在太攰，因為叮噹實在太重，我決定結束今日嘅行程，返屋企休息。我沖完個靚涼，癱係牀上look手機，突然係某討論區見到個標題，九個大字，刺激我拿拿林禁入去睇。

“大雄俾人捉左入青山！”