執到叮噹 殺死大雄: 9. 真相

“咩話？靜香死左？”我差啲忍唔住叫咗出聲，好彩忍得住。我四周望望，仲未有人留意我地呢邊。

“就係俾呢枝空氣炮打死。”大雄指一指我收埋係心口嘅空氣炮。

“係叮噹做嘅？”我倒吸一口涼氣，實在係好難相信。

“嗯。”大雄雙拳不自覺咁握緊。

“點解叮噹佢要咁做？”我問。





“我都唔知點解...”大雄答。

我心諗：“又唔知點解，下下都唔知點解，真係令人好鬼死火滾。”

大雄雙手抱頭，繼續慢慢講：“係靜香死之前，其實我地已經發覺叮噹變得有啲唔妥。我唔知...我覺得呢個唔係叮噹嚟...佢由初初淨係做啲無傷大雅嘅小惡作劇，到最後，佢竟然當住我面，用空氣炮打死咗靜香...”

我坐係大雄側面，佢抱住頭遮住左佢，但望住地下嘅淚滴，我知道，大雄已經淚流滿面。

最好嘅安慰，就係成為一個好嘅聆聽者。我默默咁聽大雄講埋落去。





大雄聲音變得嗚咽咁講：“我地真係好失敗，我地眼見叮噹變得越嚟越壞，一早就應該行動，一早就應該先搶走叮噹個百寶袋再講，我地偏偏要等到静香出左事先識開始郁手...而到最後，搶返嚟嘅百寶袋竟然仲拎唔到任何法寶出嚟...”

我點點頭講：“叮噹佢講過，佢個百寶袋可以上鎖，除非係佢本人，或者佢死左...如果唔係，其他人唔會係裏面拎到任何一件法寶出嚟。”

大雄擦擦眼淚，嗯左一聲表示知道，講：“我地知道咗後，我用由叮噹手上搶返嚟嘅空氣炮指住佢，佢都唔肯合作，佢都唔肯拎法寶出嚟救返靜香！最後我實在係無辦法，我開炮打咗叮噹一下...叮噹佢反應好快，受左傷都仲衝到去櫃桶到用時光機逃走...”

我心下默然，原來成件事係咁樣。

“我真係好蠢，如果唔係衰心軟，叮噹唔會咁易走得甩。我真係好蠢...只要用到法寶，靜香...甚至即使打死叮噹...佢地都可以救得返晒！所以，既然迫唔到叮噹合作，咁叮噹一定要死！”大雄咬牙切齒咁講。