執到叮噹 殺死大雄: 14. 兩個大雄

14. 兩個大雄

“點啊！你無嘢好講啦嘛！”大雄一講完，就衝上嚟一拳打落我塊面到。

我痛苦咁“啊”左一聲。

“大雄啊！你冷靜啲先啦，你聽唔聽到佢講，佢話“明明係你話叮噹殺咗靜香”，你估...佢係咪見過嗰個大雄？佢可能係俾佢呃咗先會咁對叮噹。”又係靜香出手拉住大雄。

大雄好似恍然大悟咁“嗯”左一聲，無再堅持要打我。





靜香擋係我同大雄中間，佢踎低身慢慢對我講：“你見過...大雄？唔係呢個大雄，而係另一個大雄。”

我迷迷惘惘咁回應：“你咩意思？我...我好暈，你意思係想講有兩個大雄？”

忽然旁邊傳嚟一陣又哼又啊嘅掙扎聲，叮噹都終於醒返。

“叮噹！你無事啊ma？”大雄同靜香異口同聲咁問候叮噹。

叮噹輕微咁搖搖頭，搖頭有兩個意思－－－我唔得啦同我無事，唔知叮噹指邊一樣。





“你地啱啱講嘅嘢我都聽到，你地唔好怪陳強，佢唔係壞人嚟。”叮噹邊講邊掙扎坐起身。

雖然我手腳仍然被綁，但我都用咗我嘅方式坐起。我同叮噹面對面，四目相對。

“陳強，我啲記憶已經返晒嚟，我盡量講得清楚一啲，咳，你見到嘅嗰個大雄講得無錯，我的確係殺死咗靜香。但，你見到嘅嗰個大雄，同俾我殺死嘅靜香，佢地都唔係真正嘅大雄同靜香。”

叮噹指一指房內嘅大雄同靜香，繼續講：“真正嘅大雄，真正嘅靜香，係呢兩位。”

“我見到嘅大雄係假嘅？”我無辦法唔相信，我已經俾佢地綁住咗，佢地無必要再對我講大話。





“又唔可以話係假，佢地係複制人。而特別之處係，佢地都唔知自己就係複制人，佢地嘅記憶，思想，性格，所有嘢都同本人一模一樣。”叮噹認真咁向我解說。

係叮噹示意之下，靜香幫我鬆左綁。

我黑起塊面講：“成件事究竟係點？點解你地要咁做？你地整個複制靜香出嚟殺咗佢？然後你又因為咁而俾複制嘅大雄追殺？你地到底係到玩緊啲咩？”

叮噹同大雄對視咗一眼，大雄帶點慚愧咁低下頭，然後細細聲咁講：“係我衰貪玩，我偷用叮噹嘅法寶，複制咗我同靜香出嚟，諗住用佢地嘅經驗，研究下我同靜香點先可以相處得好啲。初初係幾有趣嘅，但去到後來，我地都認為唔可以再咁落去，於是我地開始諗辦法除去佢地兩個。”

“哈...除去，你當佢地係玩具？！”我越聽越嬲。

大雄默沉不語。

“佢地仲未知自己係複制人咩？照計佢地見到另一個自己嘅時候，點都會察覺到唔妥。”我追問。

大雄搖頭答：“因為道具說明講到明話唔可以見面，所以我俾佢地代替我地嘅日常生活，而我地就躲於暗處觀察，佢地一直都以為自己就係真正嘅大雄同靜香。你地唔好怪靜香，係我夾硬迫佢陪我癲。”





我唔再出聲，安靜咁聽大雄繼續講，去到後面，已經同我之前聽嘅大同小異。

總之就係，叮噹開始想幫真大雄除去假大雄假靜香，而假大雄因為咁而覺得叮噹開始有啲唔妥。去到最後爆發衝突，叮噹用空氣炮殺咗假靜香，而假大雄就搶走咗叮噹嘅百寶袋同空氣炮，並且反過嚟追殺叮噹。

我又嬲又無奈，我竟然會因為大雄嘅惡作劇搞到咁樣。而佢地有咁多種處理方案，竟然係揀咗呢種最低級嘅方法，明明有咁多法寶！

我深深吸左一口氣，問：“咁你地依家諗住點？”

“假靜香已經死咗，依家等我地解決埋假大雄，咁呢件事就可以告一段落。”大雄答。

“呯！”

我即時跳起，狠狠咁一拳轟落大雄塊面到，大雄俾我打到重重咁跌落地下。





我對住大雄大叫出嚟：“解決？告一段落？你估玩啊！人命嚟架！”

我承認我自己本身都係諗住殺叮噹，但我嗰時始終都相信自己係企係正義嘅一邊，所以先落得到手。

再加上，我同所謂嘅假大雄相處完，雖然佢係複制人，但佢都絕對係一個有血有肉嘅人，佢對我流露嘅憤怒同眼淚，我通通收到入心。

真大雄嘅呢一番說話，當假大雄係玩具，係垃圾咁樣，實在令我憤怒到極點。