若你信了我的大話 我就能聽見你的真話: 4. 突變 (中)
Macy長著一張漂亮的臉蛋和嬌小的身型。而這次為了早一點觀察和了解Macy是一個怎樣的人，我為我們的相遇花了一點心機。這天我戴著黑超化身為一個盲人，然後在一個附近比較少人的環境下，碰巧在她身旁絆倒。
「哎吔!」我因一隻腳被絆倒而跌倒在地上。
「先生你有無事呀?」Macy看見後立即上前問我狀況。
「應該無事…不過小姐可唔可以麻煩你扶扶我起身?」我裝作行動不便，單靠自己起不了身。
「好呀無問題，你小心D慢慢呀。」Macy用手慢慢把我扶起。
「小姐唔該晒你呀，你真係好人!」站起來後，我拍了拍褲上的灰塵，然後由衷讚了她一句。就憑這舉動我相信至少Macy應該是一個善良的人。
「唔駛客氣，你想去邊? 駛唔駛我扶埋你去?」把我扶起後，Macy還熱心的問道。
「唔駛麻煩你喇，我去前面個小巴站等小巴咋嘛。」
「幾步路啫，唔爭在啦。我陪你過去順便有車果陣話你聽呀~」說完Macy便直接扶著我走到去前面的小巴站
「咁唔該晒你喇~ 小姐你咁好人，第日娶著你果個真係好福氣啊~」我順勢試探地說。
「哈哈，可惜佢唔係咁諗呢…」Macy說得很細聲，但卻暪不過我的耳朵。
「下? 你講咩話?」不過我裝作聽不到。
「無野呀，我亂up廢話咋嘛…」Macy尷尬地輕輕帶過。
「哦… 我今日真係好彩呀，連續撞到兩個好人~」我開始拋磚引玉。
Macy:「點解咁講?」
「我今日晏晝唔小心跌左銀包，都係好彩有個後生仔話我聽仲幫我執返咋，唔係就有排煩喇…」這是我為她預備的大話。
「咁你今日真係有lucky star照住喎! 駛唔駛陪你去埋買六合彩先?」Macy說笑道。
「哈哈，小姐你唔單只好人，仲好風趣喎~」
然後我和Macy閒談了一會直至小巴到達她幫我上了車後自己才離開。
憑我的觀察， Macy是一個心地善良，十分可愛且充滿著小朋友特質的一個女仔，所以我相信她和Jonathan 的事，並不是我之前所想那樣，很可能還有很多潛在因素是我並不知道。在和她相處過一段短時間後，連我自己也很好奇到底事實的真相是甚麼。這亦是我喜歡自己能力的其中一個地方，就是我不會只能聽單一方面的言詞而是能同時間”聽到”另一方心底裏的辯解，因而能更客觀去看待和批判每一件事。
終於，到了揭露真相之日。
「老婆，你可唔可以老實話我聽到底我地之間發生左咩事? 你其實仲愛唔愛我?」
瞬間，Macy心入面所有的情感，記憶和答案全湧入我腦海中。
--------------------------------------------
Macy:「不如我地今日去廸士尼玩然後夜晚再去食燒肉呀~」
Jonathan:「今日咁曬唔好去廸士尼啦，而且又好貴，我地要儲錢買樓同結婚呀…不如我地係屋企睇套戲，然後去行下街，今晚再去樓下新開果間茶餐廳試下?」
Macy:「我都唔鍾意食茶餐廳…」
Jonathan:「咁一係KFC? 你鍾意食喇掛~」
「哦…咁好啦…」Macy不自覺地扁了下嘴說。
--------------------------------------------
Macy:「Honey我今個星期六去同事屋企打麻雀呀，你一唔一齊?」
Jonathan:「唔喇，我想係屋企抖下…」
Macy:「咁下星期同我D大學同學食飯呢?」
Jonathan:「都唔喇，同佢地又唔熟….」
Macy:「哦…好啦…」
--------------------------------------------
Macy:「記住廁紙一定要買衣隻牌子，其他唔好用架~」
Macy:「點解你又買錯架， 咪講左要買果隻囉! 你到底有無將我講過嘅野放過係心?」
「咪又係廁紙… 我都買埋返黎啦，買錯有咩咁大不了啫?」Jonathan不耐煩說道。
Macy:「唔係錯唔錯嘅問題，我係嬲你唔將我講嘅野放係心呀!」
Jonathan:「咁你自己又唔去買? 下次你自己比錢去買呀!」
--------------------------------------------
Macy:「BB，結婚我想去韓國影pre-wedding呀~」
Jonathan:「但我地岩岩比完首期又要裝修，黎緊結婚又要洗一大筆錢，真係afford唔到喎…」
Macy:「咁一係我地唔好擺酒就咁簽字?」
Jonathan:「但我屋企人好想我地擺，佢又得我一粒仔… 一係我地去深圳影啦，聽聞有個地方係整左好多其他國家唔同特式嘅theme架，價錢又平好多~」
Macy:「下… 但睇人地d相韓國影真係好靚喎…」
Jonathan:「鬼叫我窮搵得唔夠多咩…」
Macy:「咁我上網搵下深圳邊間好啦…」
--------------------------------------------
Macy:「黎緊間屋裝修我要整到好似酒店咁靚~ 要有特色牆，d櫃頂同底全部要有燈射出黎!」
Jonathan:「特色牆? 咁咪浪費左成幅牆? 會唔會做大d個電視櫃好d呀? d櫃為左條燈帶落唔到底咁咪又少左d位? 第日唔夠位擺野架…」
Macy:「邊有咁多野擺啫!買少d野咪得囉~ 有衣d成間屋靚好多架!」
Jonathan:「其實有幾可無啦啦會開櫃底d燈呀… 而且明明最多係你d衫又唔肯扔! 可唔可以少d花巧野多d實用野呀?」
Macy:「唔得呀，我一定要!」
Jonathan:「點解裝修費就全部我出，但話事就全部都唔係我架…」
Macy:「我有嘅都拎晒出黎啦! 咁我係搵得少嘛…」
Jonathan:「咁你搵得少係我嘅錯囉…」
Macy:「點解你乜都要計住D錢? 你有無當過我係你老婆呀?」
Jonathan:「唉，你鍾意啦…」
--------------------------------------------
Macy:「老公，我今日比老細鬧唔開心呀…」
Jonathan:「咁老闆鬧得有無道理先? 亂鬧你定佢都話得你岩?」
Macy:「咁佢實有道理格，但都有D係亂鬧囉…」
Jonathan:「咁咪淨係聽有道理果part，無道理嘅自動filter走囉，做野係咁架啦，你唔可以下下一比人鬧就唔開心唔聽，唔係邊有進步啫…」
Macy:「你到底明唔明女仔需要d咩? 我講你聽係想你安慰我，聽我訴苦支持我而唔係講道理話埋我一份呀!」
--------------------------------------------
Jonathan:「老婆呀，我地結左婚都三個月，有無諗過我地幾時開始努力生BB?」
--------------------------------------------
很多段回憶片段和對話突然湧入我腦海，而去到最後一段，我感受到這就是那個讓一切改變的轉捩點。一直以來，Macy和Jonathan一起，其實心入面都有很多的不滿或不如意，例如她覺得Jonathan總是拒絕自己的提議，很多時不把自己說的話放在心上，對錢斤斤計較，不太關心自己感受等等… 簡單來說她一直覺得Jonathan其實並不是真的很愛自己，甚至有點看不起自己。
不過一來她覺得自己可以遷就和接受，認為兩個人結婚相處也沒有太大問題，二來自己年紀漸大又對對方投放了數年的感情，加上二人早有共識，所以Jonathan求婚那刻，她沒特別怎樣想便答應了對方。直至結婚後，當Jonathan提出生小朋友的計劃時，一個問題突然浮現在她腦海中。
(我係咪真係可以一世都咁樣? 衣家衣種相處係咪真係我想要嘅野?)
一有小朋友，所有的事情便再沒有轉彎餘地，不然只會害了小朋友和自己的一生。而且自問，她亦覺得自己沒做好當媽媽的準備。
那天後她一直問自己這個問題，然後她最後得出的答案是- 不可以。
霎時間，她就像得道高僧突然得到頓悟一樣，她發覺自己對Jonathan的感覺瞬間產生了翻天覆地的變化，一直以來累積的所有不快和不滿像缺了堤一樣全部湧現出來，原來心淡是真的可以發生在一瞬間。她開始不想見他，想逃避他，想自己一個人能好好地靜下來。
不過隨著時間流逝，慢慢地她又好像適應了自己的感覺。對Jonathan，她不是沒有感情，只不過感覺不再是那種充滿依戀的愛情。所以她和他有回正常的溝通和接觸，大家繼續像沒事一樣地相處，只是不知為甚麼她心裏總會排斥和對方做一些情侶間才會做的親匿行為，這是她自己都不知道原因，或許只能歸究於身體的反應往往才是最誠實的行為吧。
(反正Jonathan都唔係咁愛自己，以前都係自己主動要求先會拖手，佢應該都唔會點介意啦…)
她用這想法，說服了自己這樣的相處方式沒有問題。直至一段時間後Jonathan終於把不滿爆發了出來，然後她亦把自己一直以來所有的不滿表達了出來。其實這些不滿，她不是沒有說過，只是說了一段時間她發現對方都沒有甚麼改變，所以她便沒有再說，反而是讓自己慢慢妥協和接受。不過結婚後生小朋友的話題讓所有問題再一次蘇醒然後浮現在她的腦海中。自此，她改變了，她不再想逼自己去妥協。
「我不嬲都係咁，如果你係接受唔到，咁點解當初又要接受我嘅求婚?」Jonathan說道。
Macy:「我以為自己得，但我發覺原來我係唔得…」
Jonathan:「咁衣家你想點? 接受唔到係咪要離婚?」
Macy:「衣個就係你嘅反應? 我地咁多年感情，你咁容易就放棄? 其實你到底係咪真係鍾意我?」
Jonathan:「衣家變果個係你，我從來無變過… 係你玩我呀!」
那晚，Macy流了不少眼淚，但同時間，她亦終於意識到二人原來真的一直都不是走在同一條直線上。