［少甜］同女神喺校長室扑嘢，點知畀我發現咗學校嘅秘密…: 楔子（二）

楔子（二）

「喂！你哋三個喺度做乜？快啲停手呀！」唐三藏見到孫悟空將兩隻天兵綁起，豬八戒同沙悟淨仲要喺隔離幫拖，一個攞棍一個攞摺凳，好似要將天兵置於死地咁樣，馬上喝止佢哋。

 「師父！呢兩隻天兵唔係好人嚟㗎！佢哋係收到指示下凡害你㗎！我同大師兄啱啱親眼睇住佢哋想喺你化緣化返嚟嗰袋橙度落毒呀！」豬八戒見唐三藏好人當賊扮，反而指責佢哋三個，忍唔住委屈大叫。

 「呢兩位天兵大哥係天庭派落嚟了解我哋取經進度嘅，又唔係妖精，點會存心傷害我哋呢？快啲放咗佢哋！」 

「師父！」孫悟空好唔耐煩，「有冇搞錯呀？你連三個徒弟都唔信，信呢兩個外人？」 





「當中一定係有誤會！你哋快啲放人先！」唐三藏堅持係三個徒弟有錯，悟空同八戒都反晒白眼，心諗屌又係咁，師父永遠都啱晒？ 

「師父⋯⋯我⋯⋯我哋冇冤枉佢哋㗎，佢哋真係想害你，大師兄先至捉住佢哋㗎炸！」沙悟淨雖然好驚師父，但係都決定講句公道說話。 

「講咁多做咩吖？等我一棍扑穿佢哋個頭先講。」孫悟空已經忍唔住舉起佢枝金剛棒。 

「畜生！你而家即刻停手！如果唔係就以後都唔使叫我做師父！」唐三藏已經嬲到火遮眼。 

「⋯⋯你話咩話？」孫悟空以為自己聽錯。 





「我話你夠膽吽落去，為師就逐你出師門！」唐三藏當正孫悟空係劣性難馴嘅妖精咁，睥到佢實一實。 

兩個師弟以為師兄會大發脾氣，仲驚佢打埋師父一份，點知孫悟空耷低頭心灰意冷咁答：「我唔打呢兩件蛋散，」唐三藏微笑，以為悟空肯聽話，點知佢下一句竟然係：「但係我亦都唔會再叫你做師父，唔使你趕，我自己走！」 

孫悟空用力掟走支金剛棒，跟住唸咒召喚筋斗雲，一陣風吹過就唔見咗猴影，唐三藏氣急敗壞咁鬧：「孫悟空你同我即刻返嚟！」 

八戒睥咗唐三藏一眼，然後就跟住悟空飛走咗。

唐三藏好震驚，睇到眼都突埋，悟淨喺旁邊諗咗一陣，咬實牙關，跪喺地下叩咗個響頭，「對唔住呀師父！」就跟埋兩個師兄一齊走。 





唔識法術嘅唐三藏，唯有成碌木咁企喺度，咩都做唔到。

 —————————————————— 

三年之後—— 

「弟子玄奘，拜見如來佛祖。」唐三藏著上佢最靚嘅一件袈裟，終於嚟到雷音寺，見到佢夢寐以求嘅西經，就放喺佛祖座前。 

「唐三藏，你經歷九九八十一難，終於由大唐嚟到雷音寺，有咩訴求呀？」佛祖問。 

「回佛祖，弟子遠道而來，係希望佛祖可以賞賜經書俾我帶回中土，藉此弘揚佛法，普渡眾生！」唐三藏心諗，一開始明明係你條𡃁觀音叫我嚟取經，搞到我咁辛苦，而家先嚟扮唔知，唔係玩嘢下嘛？

「唐三藏⋯⋯當初本座賜你三個徒弟，叫佢哋沿途護送你，而家佢哋三個去咗邊？」 

唐三藏心諗唉條仆街真係玩嘢，唯有硬住頭皮答：「⋯⋯弟子自問修為尚淺，和三位施主師徒緣薄，冇能力管教佢哋，幾年前已經請佢哋返去本來嘅地方，希望三位喺凡間繼續行善積德，無負弟子當初教誨。」 





「唐三藏，你連區區三個徒弟都管教唔到，憑乜嘢普渡眾生？」 

「弟子⋯⋯」 

「本座再一次畀機會你，要重新搵返呢三個弟子，仲要感化佢哋，用盡任何辦法令佢哋聽教聽話，否則，你唔使旨意再返東土傳經！」 

「⋯⋯弟子真係做唔到呀！佢哋而家各散東西，仲好憎我𠻹！點會再俾機會我管教佢哋呀？」唐三藏好崩潰，佛祖使唔使玩到咁大呀？ 

佛祖陰陰嘴笑：「咁好簡單啫，我帶你去另一個時空，等佢哋三個重新認識你，今次你要把握機會，教好佢哋喇！」 

「吓？」唐三藏完全呆咗，「咩意思呀？呀～」 

眼前閃過一陣白光，唐三藏又發同一夢紮醒，時間嚟到2021年，而家嘅佢，係一間中學嘅老師。