因為前世一個承諾，令我今世三十歲都仲係青頭仔: （15）
我同Samuel分工合作，一個上網揾，一個打電話周圍問人，最後經過一晚通宵，成功刮到慧真大師嘅住址。
天一光，我地就事不宜遲，去機場即日買機票，飛過去台灣。
到埗之後，我地要轉車，幾經轉折先嚟到台中郊外一間寺廟。
慧真大師就係住喺呢度。
入到廟，我地搵個廟祝出嚟問，求佢帶我地去見慧真大師。
點知對方卻回答：「慧真大師正在閉關修煉，不見外人。」
「我地係專程從香港，山長水遠過嚟台灣搵慧真大師，我有啲好緊要嘅嘢想求佢幫手，麻煩你可唔可以通融一下，帶我去見一見佢？」
個廟祝沉默左兩秒，諗一諗，先開口：「不好意思，我聽不懂廣東話，能講國語嗎？」
Samuel隨即幫我用國語翻譯一次。
個廟祝聽完就話：「大師閉關期間，任何人都不得騷擾，包括我在內，所以我不能帶你們進去見他。」
「那大師大概什麼時候出關呢？」Samuel幫我追問。
「這點我也不知道，恕我無法回答。」
「傑傑，佢話大師閉緊關，睇嚟我地今次白行左一趟。」
「既然一場嚟到，我地唔可以就咁放棄，一於喺度等，等到慧真大師出關為止！」
「但唔知要等幾耐，先等到大師先出關架喎？」Samuel話。
「等幾耐都要等，我相信大師只要感受到我地嘅誠意，好快就會肯見我地！」
於是乎，我同Samuel由中午十二點，等到夜晚十二點。
廟祝行過嚟勸退我地：「兩位還是回去吧，慧真大師這次閉關不知道要閉多久，你們這樣等是沒用的。」
「我地唔介意繼續等，因為真係好想見大師一面！」
「對，我們真的想見慧真大師一面。」Samuel用國語對個廟祝講。
對方嘆一口氣，然後好認真咁同我地講：「好吧，既然你們這麼有誠意，那麼就......繼續等吧，我先下班了。」
「咕—」成日都無嘢落肚，呢個時候個肚餓到打鼓。
「傑傑，不如我地都走囉，聽日先再嚟過啦。」Samuel提議。
呢附近渺無人煙，咁夜留喺度感覺唔太安全，加上個肚又餓，睇嚟都係走先，聽日再嚟過比較好。
我地決定就同廟祝一齊離開廟宇。
啱啱一步踏出門口，耳邊就傳來一把男聲：
「你們找我有事嗎？」
我一聽就認得出呢把聲！
係慧真大師！
我地三個無一個人開口講嘢，所以一定係大師用傳心之術傳話俾我地。
「老楊，麻煩你帶他們進來。」慧真吩咐廟祝帶路。
「幹！被你們害得我要加班了！」
廟祝一臉唔情願，帶我地嚟到寺廟內一間密室。
裡面四個角落頭分別放置一尊金佛像，慧真大師就坐喺正中心位置打坐，面前則放住一爐香。
「大師，多謝你肯見我。」因為對方識聽廣東話，所以我唔洗轉channel。
慧真大師雙眼閉合，神態自若：「你有什麼需要我幫忙的嗎？」
「大師，早排我終於遇到左嗰個宿世情人，真係如你所講，我果然只可以同佢做愛，但問題係我同佢兩個人完全都唔夾，而且遇到佢之後，仲發生好多唔好嘅事，點解會咁嘅？」
我吞一啖口水繼續講：「我仲以為所謂嘅宿世姻緣，會係一段美好而浪漫嘅邂逅，點知結果卻完全同想象中嘅相反。」
大師沉默片刻，然後以不快不慢嘅語速答我：「你和她之間，既是一段宿世姻緣，同時也是一段孽緣。」
「孽緣？」
「沒錯，我想你應該恢復了上輩子的記憶，那你記得上一輩子的你，是怎麼死的嗎？」
我回帶諗返嗰啲上一世嘅畫面：「我記得我同欣欣俾一班拎住斧頭、類似係黑社會嘅人追殺，最後走投無路，我就同嗰班人搏命，結果好似就咁樣俾班人劈死左。」
「那你還記得，你是因為什麼而被那些人追殺？」
喺大師循循誘導之下，我逐一喚醒返嗰啲前世嘅畫面以及片段，並重新整合一次。
「我記得啦！係欣欣！因為佢偷左幫會啲珠寶！」
將凌亂嘅記憶整理一次過後，我終於搞清楚來龍去脈：
我上一世生活喺舊上海，係一個黑幫成員，而欣欣上一世就係一名舞女。
我地結識於夜總會，只係相識無耐，上一世嘅我就被欣欣迷得神魂顛倒，唔小心透露左幫會收藏金銀珠寶嘅地址。
結果，對方一個唔該偷走曬所有珠寶，我亦因此得罪左幫會，所以就俾佢地追殺，最後仲死埋。
難怪大師話我地呢一段係孽緣，原來欣欣隨時會累死我，更唔怪之得，自從我同佢一齊之後，最近發生咁多衰嘢，又俾人斬又屋企火燭。
再諗返起第一次同佢見面，仲爭啲被車撞死。
除此之外，我亦都回憶返上一世嘅我，點解會發一個只愛佢一人嘅誓。
原因就係出於鹹濕兩個字。
當時我同欣欣上床剝曬衫，準備埋牙之際，對方卻突然要求我發誓，先肯俾我入。
欣欣上一世就已經咁鐘意利用自己嘅身體操控人，呢世嘅佢都係本性難移。
上一世嘅我精蟲上腦，為左扑嘢，因此就發左個咁嘅誓，導致到今世嘅我，無得同其他女人做愛。
性慾，有時可以係男人最大嘅動力，亦可以係男人嘅最大敵人。
「現在你應該明白了吧，以後是否要跟她繼續在一起，那就看你選擇了。」慧真大師對我講。
「我梗係唔想同佢繼續喺埋一齊，但問題在於，假如我唔同佢一齊，咁我以後都無得做愛，所以請問大師，你有無方法幫我消除嗰道貞操力場，令我可以唔受限制，同欣欣以外嘅女人做愛？」
「你說的那股力量，源於上一輩子你許下的誓言，是命運強加在你身上枷鎖，正所謂天命難違，恐怕它是無法破除。」
「無可能，我信大師你一定有辦法嘅！或者你施個法送我返上一世，只要我令到自己唔發嗰個誓，咁咪一天都光曬。」
「不行，過去的事情是無法逆轉。」
「一係揾辦法轉移嗰道力場？」
「不行，它附身在你身上，根本不能轉移。」
「咁求求大師你諗下其他辦法啦！我聽講你地學佛嘅人，好鐘意教人打破宿命架？」
大師無出聲，沉默左兩分鐘之後，問我，「你真的想打破宿命？」
「係！我要改變命運，打破宿命嘅枷鎖！」我答得非常堅決。
「可是，一旦宿命被打破，隨時可能遭到命運的反撲，可能會招致嚴重的後果，你有這個心理準備嗎？」
「我唔理咩後果，總之我就一定要衝破嗰道力場，我要自由戀愛、自由扑嘢！一句講曬，我要自由！」
「好吧，既然你有這麼大的決心，那我就傳授我畢生的秘訣給你。」
「秘訣？係咩秘訣？」
「氣形合意功。也許它可以幫你衝破那一道命運的阻力。」