因為前世一個承諾，令我今世三十歲都仲係青頭仔: （19）

「慧真大師正在閉關，不能見你們。」廟祝將我地拒之門外。

「大師唔係早幾日先出關，咁快又閉關？咁今次佢要閉幾耐？」我問完，Samuel用國語翻譯一次。

「大師把自己三份之一的功力傳了給你，導致他老人家元氣受損，估計這次要閉關一段時間，才能夠恢復元氣。」

跟住廟祝遞左張紙仔俾我：「這張紙條是大師閉關前留給你的。」

紙條上面寫住：你已經掌握了氣形合意功中的「氣」和「形」，剩下的就是「意」





「意」代表意想，就讓你的想象力成為你的武器，去打破命運的阻擋。加油;)

慧真大師惜字如金，只係留左短短兩行字，句末仲留左個笑臉符號。

我明啲又唔明啲，一知半解：「想像力？即係點？大師仲有無其他指示？」

「想像力，imagination，你回去自己慢慢參透吧。」廟祝係咁趕我走。

慧真大師傳授左自己啲功力俾我，導致元氣大減，咁睇嚟佢應該要閉關修養一段時間，一時三刻都出唔到關。





既然係咁，我都別無他法，唯有返香港。

隔日，我就同Samuel、Lily一齊搭飛機離開台灣。

經過咁多日，屋企火燭完，應該都已經解封左。

落機後，Samuel同Lily陪我返去屋企睇下。

嚟到門口，推開門一刻，忽然我隱約感受到一股莫名嘅寒意。





「咦？乜你終於肯蒲頭啦？搵左你幾日都唔見人，仲以為你死左。」

一打開門，就見到欣欣。

「你上嚟做咩？」我問。

「嗰份嘢我已經搵律師寫好，拿拿臨簽左佢。仲有，家下個廚房燒左，橫掂都要裝修過，不如順便拆曬成間屋，重修裝修一次。」

欣欣當正自己係呢間屋嘅主人：「我早兩日已經揾人上嚟睇過架啦，我諗住個廳放多兩張梳化，呢套音響咁阻埞就揼左佢，留個中間位俾我放套按摩椅…」

我直接打斷佢嘅發言：「份嘢我唔會簽，間屋唔會重新裝修，音響亦都唔會揼。」

「唔想簽？乜除左我之外，你仲有得揀咩？你唔簽以後成世都無得扑嘢架喎，你接受到咩？」

「接受唔到，但我遲早都會諗到辦法突破障礙，同其他女人做愛。」





「講到尾原來係想搞其他女人，明明上一世誓神劈願對住我講，今世都只會愛我一人，點不知一轉世就變曬樣，唉，男人果然係信唔過。」

「收皮啦，係上一世嘅我憨居先會俾你氹到，而我就唔同佢，亦都唔係佢，我係唔會輕易屈服！」

「即管睇下點！上天安排得你今世，只可以同我一個人搞嘢，咁已經證明左我同你根本天生一對，我地兩個喺埋一齊更加係無法逃避嘅命運，我勸你都係認命吧啦！」

「食蕉啦你，我先係同傑傑天生一對呀八婆！」Samuel即刻反駁。

「你唔好站亂歌柄住。」我話返Samuel，跟住再同欣欣講，「就算係命運安排又點？我就唔信自己改變唔到命運，我一定可以同其他女人搞嘢！」

「哈哈哈，好呀！我就放長雙眼，睇下你點樣改變命運！」欣欣哈哈大笑。

佢笑嘅時候，我感覺到佢身上，隱隱然散發住一股陰森嘅氣息。





欣欣一邊高聲大笑，一邊行出間屋：「哈哈！就憑你想改變命運！哈哈哈！」

當佢擦肩經過嘅時候，個心寒一寒，不由自控咁起左雞皮。

「頭先嗰個，係你嘅宿世情人？」Lily問。

我點點頭回答：「無錯，佢就係我嘅宿世情人。」

「啱啱當你話要改變命運嘅時候，我感覺佢好似突然變左另外一個人咁。」Lily對我講。

而我其實都有類似嘅感覺。

但點都好啦，我唔可以俾條友睇死，我一定要證明俾佢睇，我係有能力衝破力場，打破宿命！