薯仔日記

19-01-2022 星期三 陰天

每日坐巴士嗰陣，係我諗嘢最多嘅時間。我會諗吓今日發生嘅人同事，有時會睇吓連登仔出嘅post笑吓，或者去諗吓香港嘅未來。

以前嘅我從來都唔會覺得自己會係個憂國憂民嘅人嚟，而家講起都覺得有啲好笑。

而今日嘅我喺坐巴士嗰陣突然有寫日記呢個諗法，去記錄返每日發生嘅新聞、我所遇到嘅人同事、仲有吹吓啲無聊水。

簡單用幾句講返今日嘅新聞，銅鑼灣寵物店有女店員確診變種新冠病毒Delta，而且舖裡面有倉鼠驗到呈陽性。成2000幾隻倉鼠、龍貓、兔仔要畀人道毀滅，都即時停止咗倉鼠嘅入口。





由細到大我都好鍾意小動物，曾經養過倉鼠、免仔、狗仔等等唔同嘅動物。但自從我隻狗仔離開咗之後，我都冇再養過任何嘅寵物。

前一段時間我都考慮過想養返隻倉鼠，一嚟自己真係好鍾意小動物，二嚟又可以教吓屋企嘅其他小朋友點樣去愛同照顧小動物。最後因為有屋企人唔鍾意，我都係決定放棄咗呢個諗法。

雖然係有啲唔開心，但我都可以理解呢位屋企人嘅諗法。養小動物就有責任去照顧佢一世，我都願意負起呢個責任。不過我始終啲驚，所以養倉鼠呢個諗法未到好堅定。

我驚自己喺付出咗愛之後，係咪可以接受到佢嘅離開呢？

當初我隻狗走得好突然，我一直坐喺佢隔離，望住佢好辛苦我自己都唔好受。我知道佢已經好老，知道佢會離開我，但我一直都選擇唔去面對。直到佢走嗰日我先意識到，臨時臨急去搵寵物善終。





我搵完先見到間嘢好似好多負皮，因為呢件事我自責同喊咗成個禮拜，直到睇住佢火化咗之後我先冇再喊。

喺嗰刻我明白養寵物最辛苦同痛苦嘅唔係照顧佢，而係學識去面對同接受佢嘅離開。

以前隻狗仔一見我喊就會用佢自己隻手塞住我把口，食到我成口毛。呢啲寵物陪住我大，當中雖然有覺得佢哋煩嘅時候，但都好多開心嘅回憶，佢哋對於我就係家人嘅存在。並唔係得我一個單方面照顧佢哋，佢哋都教識咗我好多嘢，點樣去照顧？咩係責任？點樣去面對死亡？

今日我睇到片裡面嘅細路仔因為唔捨得隻倉鼠而爆喊，其實我都身同感受，覺得好心酸，好想去救啲野倉鼠。

之前政府殺野豬嗰陣我已經有好多諗法，但一直唔敢去做，因為知道做完都係唔會有好結果。喺新聞見到個男仔想保護啲野豬想為佢哋發聲，最後都畀班黑警拉埋。





我呢啲賤民，又可以做到啲咩呢？我坐喺巴士嘅窗口位，一邊聽歌一邊望住外面嘅風景諗好多。

無錯，我一直覺得自己係賤民，相信班高官都覺得我哋係。好似我呢啲冇錢又冇地位嘅普通人唔係賤民係咩啊？賤民有咩權去發聲啊？

文宣？唔得。

聯署？唔得。

集會？唔得。

新聞自由？冇啊！冇啊！冇啊！

而家連出行食個飯，去唱K去玩嘅自由都冇啊，仲諗噉多做咩，呢啲更加唔會有可能喇。哈哈......恐怕突出少少個頭已經畀班黑警咬。

今日都係天琦，祝佢平平安安。





疫情之後我嘅生活都係得返返工同放工，有時寫吓文、睇動漫同睇啲搞笑同新聞post為主。雖然算係噉，但又覺得自己好悶。

今日都係平平淡淡噉過，唔係做咗好多嘢。因為呢兩日我基本上清曬手頭上啲文件，所以都開始拖慢嚟做拖吓時間。

臨放工先發現份嘢有啲出奇位，做到我腦閉塞。最後決定去柯個屎先，聽日再做。通常我遇到啲唔識嘅嘢就會拖到聽日先，到第二日轉換咗個心情就會易啲去搞啲難搞嘢。

日記寫住噉先，希望聽日都堅持到，早抖。