我接通了來自陰間的電話: 第二十八節

即是說，我和李泳兒因為誤會而分開，而我今次的靈異事件是因為墮了胎的惡靈找我報仇，一切一切的罪魁禍首就是傻強！
 
「點解！點解！」傻強不是我最好的朋友嗎？他還因為要救我而被我踢傷一腳，而家還躺在醫院裡面，點解佢要咁做？
 
「唔得！我一定要搵傻強問清楚佢！」我轉身便走。
 
「你唔好咁激動住啦！我怕你太過激動而做出傻事呀！」李泳兒緊緊的拉著我的手臂。
 
「你知唔知，因為佢我地個小朋友冇左，而家佢地要搵我報仇呀！我點可以放過傻強！」
 




「邊個要搵你報仇呀？係啦！你之前講你兩日之後就會死，咁究竟係咩意思？」李泳兒不停的搖動著我的手臂，並露出了一副著緊的神色。
 
看著李泳兒為我著緊的樣子，腦海裡泛起了十年前與她一起共度的美好時光，就像走馬燈一樣，片斷流暢而迅速，我還記得我們倆個的第一次接吻是在地鐵站，第一份情人節禮物是一條牛仔褲，還有我們大家最重要的第一次「愛之初體驗」是在那裡進行，很多很多的第一次。
 
常聽人說，初戀總是最刻骨銘心，或許我們彼此在心底裡還是愛著對方，所以我們這十年內還是不能放低這段感情。因愛而互相仇恨，如果我們不再愛對方，十年後的見面或許只是淡如水的噓寒問暖，而不是十年後我們還在糾纏於那無稽的分手理由。
 
我愛李泳兒，那管我只是一個月入八千的普通打工仔，或許配不上大學畢業的李泳兒，可是我發現十年過去，我從來沒有嘗試去捉緊自己的幸福。
 
不知道是因為死亡的恐懼，或是因為誤會而錯失了十年的時間，我哭了，失控的狂哭。
 




我唔想死！我還想生存下去！
 
「李泳兒，我唔知我兩日後會唔會死，不過如果兩日後我冇死，我一定會追返你！」我說。
 
「你成日都話自己會死，咁究竟點解？你又唔同我講！」李泳兒說。
 
「一切一切都係因為我接通左來自陰間既電話！」接著，我一五一十的把這兩日的遭遇告訴了李泳兒。
 
或許，對其他人來說，我接通了陰間的電話，因為夢境而避過了一場交通意外的劫是一件不可思議的事，可是，這件事的的確確發生在我的身上。
 




「你咁講，隻鬼即係因為我墮胎而變成既鬼？隻鬼其實我地既仔女？」李泳兒說。
 
「現階段黎睇，係！」我說。
 
「咁點算呀！唔關你事架，係都我落仔啦，點解佢地要搵你報仇唔搵我？」
 
「可能係因為我嗰時唔要你，佢地覺得因為咁令到你要墮胎，所以佢地覺得係我既責任都唔定。」
 
「其實，講黎講去，你都係因為聽左個電話先有呢啲靈異事件，如果你唔要個電話，咁佢地咪搵唔到你囉！」
 
「搵唔到我又唔代表佢地唔存在，而家佢地搵到我，我仲可以同佢地講到野，知道佢地想點，係咪？」
 
「咁不如你而家試下用電話打一次俾自己，之後我同佢地講叫佢地唔好搵你報仇咪得囉，我點都叫做佢地阿媽，應該可以說服佢地架！」李泳兒站起身，並伸身從我的褲袋裡拿走電話。
 
李泳兒按下了電話號碼。