我接通了來自陰間的電話: 第五十三節

我把頭面向嚴國旋，只見他神情緊張的望著沈震龍他們一動也不動。
 
究竟嚴國旋有些什麼過去或苦衷要讓他收山？他與太太離婚和女兒分居，是否也是因為某些特別原因？
 
我望著嚴國旋，希望他可以有一個合理的解釋。
 
可是，嚴國旋還是站著一動也不動。
 
「你唔想講，定係唔夠膽講呀？你唔講出嚟對天佑唔係咁公平喎，不如我幫你講啦，好唔好呀？」沈震龍說。
 




「唔駛，我自己會講！」嚴國旋搭著我的膊頭說：「天佑同李泳兒，接落嚟我會講出我收山嘅原因同我兩年前嘅經歷，你哋聽完之後再決定係咪搵我幫你手啦。」
 
我和李泳兒點頭表示明白。
 
「兩年前，有一個人因為玩碟仙而招惹到惡靈，隻鬼話要搵事主做替死鬼，嗰個時候，事主嚟搵我幫手，惡靈嘅怨氣好重，我同佢過咗好多招之後再說服佢唔好再搞事主，我會幫佢超渡等佢可以早啲投胎，隻鬼當時答應咗我，所以我放咗佢同開始每日同佢唸經超渡，點知.......」
 
「點知隻鬼呃你，之後害死咗搵你幫手嘅事主，而你因為責怪自己害死咗人，開始靠賭博去舒緩自己嘅壓力，但係最後染上咗賭癮，仲欠落幾百萬嘅債務，你老婆同個女因為咁而離開咗你，我有冇講錯呀，嚴國旋。」沈震龍說。
 
「冇，你冇講錯.....」嚴國旋說。
 




即是說，嚴國旋因為一念之慈，而把那個求救的人害死了？我的心有一刻動搖著，我找嚴國旋幫忙的決定正確嗎？我會否和那個求救的人的下場一樣會被鬼仔奪去我的生命？
 
「所以天佑，我哋之前叫你唔好搵嚴國旋就係因為咁嘅原因，話唔定佢救唔到你仲會害死你！你要記住無怨不成鬼，所有嘅鬼都係因為怨念而形成嘅，佢哋始終都係有害人之心，如果我哋唔打散佢哋，佢哋最後都會害其他人！」沈震龍說。
 
「唔係！唔係所有鬼都會害人架！鬼同我哋一樣都有好壞之分，佢哋只係因為對陽間嘅事放唔低先至會變成鬼，絕對唔係你所講所有鬼都會害人嘅，我哋呢個世界裡面夠有殺人犯啦，咁唔通所有人都會殺人？」嚴國旋回應著。
 
究竟那一個人所說的道理才是真正的道理？
 
有些男人說香港的所有女人也是港女，有些人說現在的年青人全部都好高騖遠，不切實際，不是嗎？我們也會為自己的定義下了主觀的決定，而否決一切與自己理念相背持的事物。
 




或許在兩個不同的信念之間，根本就不存在著任何的共存。
 
沈震龍的信念是所有鬼也有害人之心，只要把所有的鬼魂也弄得灰飛煙滅，就可以確保求助人的安全。
 
嚴國旋的信念是鬼和人一樣也有好壞之分，透過斡旋和超渡，也可以在安全的情況下確保人和鬼的安全。
 
一個決定，足以影響我的生存機會，我應該如何是好？
 
可是，如果不是嚴國旋，天樂一早已經被沈震龍他們弄得灰飛煙滅，我也不是因為天樂的報夢，而讓我避過了一場嚴重的交通意外嗎？
 
「李泳兒，我決定都係搵嚴國旋繼續幫手，好嗎？」我說。
 
「你嘅決定我一定支持，如果最後有事嘅話，我都會嚮你身邊陪你。」李泳兒說。
 
「多謝你！」




 
我行過去沈震龍和蔣大師的身邊，態度誠懇的說：「我想向兩位講聲多謝，我要多謝兩位咁熱心嘅幫忙，我亦都知你哋做嘅所有嘢都係為咗我好，但係.......我最後都係選擇搵旋哥幫手，因為我係被天樂報夢所救，所以我同意佢嘅理念多啲，我嘅決定唔代表你哋嘅理念係錯，希望你哋明白，對唔住！」
 
「天佑，呢個真係你嘅決定？今次件事唔簡單，你係俾鬼仔害架，我哋已經諗到方法點樣救你架喇！」蔣大師說。


「我知道你哋係真心想幫我，我要再一次同你哋講聲多謝。」我向沈震龍和蔣大師鞠了個躬。
 
只見他們無奈的接受。
 
我很幸運，在我的生命裡遇到了沈震龍、蔣大師和嚴國旋，沒有他們的幫助，我根本不能夠可以去到今日也安然無恙，而且還有機會去找尋拯救自己的方法。
 
對他們來說，我的決定或許會令他們任何一方感到顏面無存，這個決定，我實在是無可奈何。
 
「旋哥，我哋走啦，下一步要做嘅就係麻煩你幫我想辦法搞掂隻鬼仔喇！」我說。




 
只見李泳兒聽到鬼仔兩個字後，神態有點不自然。
 
「走啦，有咩你一陣再慢慢同我講。」我拖著李泳兒的手便準備離開。
 
「天佑，如果有咩事就記住打俾我哋！」沈震龍說。
 
「知道，我會架喇！多謝你哋！」與蔣大師和沈震龍道別後，我們三人便向著嚴國旋的家走去。