《我老婆唔係我女朋友》【那些年／學界比賽／真人】 第四章至六章: 【第四章】 出得嚟行 點都要還（３）
阿心疑惑的問我：「你…以前頭髮真係有染highlight？」她的表情有點凝重，彷彿好像想起些甚麼。
我見她樣子嚴肅，有些少擔心她怪責我唔講嘢佢知，只好苦笑：「我俾啲泳池水浸到頭髮甩色，我媽仲笑我好似個廣告噉，染咗啲咩呀，黃黚黚噉，中學時出街又被雜差逗，唔係太過癮咋。」幸好她沒有再說甚麼，也就不了了之了。
我繼續問Leon：「阿蝶王乜嘢事呢，死得未？」
「未死喎，仲撈得𠶧過你呀，人哋入咗【灣大】，今年做咗『聯校體育事務委員會』嘅學生委員。」Leon一輪嘴的說。
「哦…佢讀【事頭婆中學】嘅，就知佢咩嘢料啦，入到【灣大】有幾出奇呀？」我不以為然，佢間學校根本就是【灣大】的中學部，入唔到才是奇聞。
「嘿，聽重點先得㗎，人哋係做咗【灣大】『聯體委』代表，而小弟就係敝校嘅『聯體委』代表。」他清了清喉嚨說道。
「哦…噉我都知，你呢輪成日開呢啲會，無得去巡視業務嘛。」
「我同佢喺『聯體委』度撞返，噉大家以前都游水嘛，梗係傾吓聯校水運會啦。你知唔知呀，原來近年各院校參加嘅人數愈嚟愈少，我哋【建橋】舊年直頭無參加呀，你諗吓？係無人代表出席參賽呀。」Leon愈說愈肉緊。