「嘻…講吓笑啫,嗯~我都係運動白癡啦,我唔係好識你以前訓練嘅情況,不過你記唔記得你以前練咗幾耐,先至第一次去比賽吖?」
 
「吓,老年咁耐唔係好記得囉喎…」我真的忘記了。
 
「唔緊要嘅,大約呢,3個月?半年?」心媽循循善誘。
 
我回憶是放暑假時,開始游免費水的,到第一次比賽都應該超過4個月。「我諗最少都三四個月囉。」
 
「好吖,就當你三個月啦,好唔好?小朋友,請問你而家復操咗幾耐呢?」她總能看到我所忽略了的角度。
 


我愣住出不了聲,好一會才道。「四個星期…」
 

 
她溫柔的說:「咪係囉,你會唔會畀太大壓力自己呀。」她放開牽著我的手,然後拉我翹她的手臂。「挨落我膊頭吖,你記唔記以前去唱K,你畀我挨住取暖呀,今日你挨返我吖。」
 
我有點奇怪又尷尬,一般都是女挨男吧…無所謂啦,反正練完水都好攰,依言睡在她肩上。
 
她靠攏我的頭髮,大力索了一下:「嗯~頭先洗頭用乜嘢洗頭水㗎?都幾香喎。」
 


我又何嘗不是聞著她的體香,感覺稍為放鬆了一點,順口答道:「黃色嗰隻嬰兒洗頭水囉,我哋練水時順便用嚟捽泳鏡防霧。」
 
她喜孜孜的笑說:「哈,噉我以後叫你小BB喇。」
 
「喂,唔得呀。」我掙扎抗議。我開始明白Lulu她們給她的暱稱,呢條囡啲母性簡直是洶湧澎湃,幸好她現在是專屬我一人的「心媽」。
 
「好好,殊~唔叫唔叫~殊,嘻嘻…」她頓了一頓,輕聲的繼續說:「你知嘛,由細到大我從來無做過學校代表㗎,所以我覺得代表學校啲人好叻嘅,無論學術又好,體育又好,佢哋一定有過人嘅才能。你又從來無話我知你以前啲嘢,隨隨便便就已經可以代表學校喎,乜原來你咁叻㗎咩,我都嚇咗一跳。」

已有 0 人追稿