《我老婆唔係我女朋友》【那些年／學界比賽／真人】 第四章至六章: 【第四章】 翻閹泳法（１）
翻閹泳法
自從那天試閘之後，肥直就知我堅係廢。
有一晚我返到麗池，被他召到一旁：「阿仁，今晚我叫啲細路跟筆記游，你成晚跟我，我執你一劑先。」看來他想及早糾正我的問題。
肥佬…你知唔知乜嘢叫「執你一劑」㗎…
既然他那麼有心，我當然不敢哼一聲：「哦，唔該你喎，阿直。」
入場後，他安排了一條獨立的泳道給我，讓我無障礙的自己一個人練習，而他就專注在岸上觀察我的狀況。其他細路就交由鴻輝按筆記分配堂課，讓他們自行練習，鴻輝是他們當中年紀較大的細路，有時肥直開小差行開一陣，都會事先寫下練習內容，交給鴻輝作分配，所以他的角色有點像班長。
「喂，喂，停～停呀，你隻手踭提高啲，推水推盡啲嘛。」肥直在岸上叫停我訓話。
「吁…哦～」我唯唯諾諾。
大佬呀，而家耐力有限，游咗幾轉都攰㗎，隻手無力嘛，點遞都遞唔起㗎啦，做得完成個動作都好彩嘞，仲話推到盡喎。
「欵，等吓試試全力游個50嚟睇吓，我順便睇睇你啲呼吸，記得用返你『平常』比賽嘅頻率喎。」肥直不忘提醒我。
今晚落水前，他有跟我提過，說懷疑我太長時間停了訓練，所以氣量和體能都負荷不了以前養成的習慣，所以今晚主要是拉近「以往的我」跟「今天的我」的落差，因此一切行為應該以我的日常習慣為準，不要因為今晚的特別安排而有顧忌。