《我老婆唔係我女朋友》【那些年／學界比賽／真人】 第四章至六章: 【第五章】 佢七省肥魚咋啩（３）
「阿兄叫我幫手執執你嘛，梗係有佢嘅原因嘅，噉佢嘅學生咪即係我嘅學生囉，我叫你坐你唔敢企啦。原本亞里仔呢啲已經有根基嘅泳手，我一律唔教，一來短期操練成效有限，二來佢本身有帶佢出身嘅教練，你話大家教嘅嘢有衝突時，佢會聽邊個講？唉～假力洗茶渣㗎（潮汕諺語洗極都唔乾淨——吃力不討好）。」肥直娓娓道來。
「咁點解你又教佢呢？因為以前個大陸教練叫？」我好生奇怪，明明街外人唔教又教？
「挑！我會聽嗰個哭父（潮汕話死老竇）講？我教亞里仔咪因為你個早死仔（潮汕話短命仔）囉，我哋啲細泳會點會有能力畀咁好環境你練習呀。」聽得出他跟那個「哭父」應該有很深的嫌隙。
我估不到肥直這麼有心，真的非常感動。「吓～阿直，乜原來噉樣㗎，其實喺麗池練都差唔多啦，唔使特登破例教街外人嘛。」
「唏，無所謂嘅，我又有錢收嘛，都幾和味㗎，而且我噉安排係有原因嘅，因為下星期開始高強度訓練，又真係要喺【灣仔池】做㗎。嗱，你到時要時刻留意住我對亞里仔嘅講解，因為佢先至係金主，你只係陪練啫，我唔能夠直接指正你嘅。」肥直諄諄告誡。
他頓一頓後又陰陰嘴的笑說：「嘿，不過邊個係邊個嘅『陪練員』都未知啦，佢帶住你喺前頭游，令你好似追『電兔』噉，漸漸地你會愈游愈快。呢～好似澳門嗰啲跑狗噉呀。」一副運籌帷幄、胸有成竹的模樣。