《我老婆唔係我女朋友》【那些年／學界比賽／真人】 第四章至六章: 【第五章】 牛津跌打佬（３）
「Oh, it is nothing。OXFORD嗰個Clinical Neurosciences Ph.D. 唔關事嘅，我做CN研究Neuropathic pain時，發現中式跌打原來對治療痛症有另類幫助，後來愈嚟愈有興趣，所以就轉咗研究方向，你睇therapy嗰兩張嘛。」米叔不慌不忙的指正我「錯重點」。
「哦～真係sports喎。」我只好含糊應對。老老實實，另外嗰兩張都淨係認得個American同個sports字，有幾勁我唔知，我只知我仍未從「牛頭角津小」的震撼中復原過來…
「Awesome me, isn’t it？我專登由英國飛去美國考㗎。」可能他是指那張American乜春吧。
看來他看重那個運動治療的資歷，比擁有世界最高學府的博士銜頭更珍貴吧，唯有吹捧兩句然後扯開話題好了。「嘩，噉我真係搵到個專家救命喎。係呢，你同大妹爸爸好似好熟噉？」我都轉口跟佢叫大妹。
「Well，我同阿森係同學啦。（我插口：大學同學？）Nope, secondary school，佢畢業後好早結婚，我睇住大妹出世先去英國啦，aight, let’s get back to business，你嘅傷…」米叔跟心爸原來是「中同」，難怪老友鬼鬼了。
「誒…可唔可以出去搵埋大妹先一齊講？佢拉我嚟見你，佢仲緊張過我呀。」見他轉向講返我的傷勢，反正心爸走了，不如叫他出外面先講，我情願黐住阿心。
「Aight, fair enough，你著返衫先。」他帶頭出了治療室。