《我老婆唔係我女朋友》【那些年／學界比賽／真人】 第四章至六章: 【第五章】 火杯的考驗（４）
食下午茶我可以有乜嘢選擇呢，咪又是二人共享一份雞肶餐，瘦妹包底吧了。「頭先見到妳老竇喎，無乜嘢嘛。」醒起剛剛見到心爸時她有點緊張。
「嗯…佢有問吓你點整嚫囉，又問吓係咪成日送我返嚟嗰個囉，我諗佢見你正常運動整嚫，應該無嘢嘅。」阿心面無表情的答我，看來仍有點憂心。
「我一直都無問妳，佢哋會唔會反對我哋拍拖㗎？」我見她忐忑不安，以為是佢老竇唔鍾意個女拍拖。
「噉成日有人送我返上樓，又久唔久有男仔打電話搵我，佢哋都應該估到嘅。一陣返去如果佢哋問咪講吓囉，無事嘅。」她輕聳兩肩。
「哦，無事就得啦，乜妳好多人送返屋企咩？又有男仔打畀妳咩？」我故作輕鬆的逗她。
她白我一眼：「有無其他人送你知𠺝。今日無心情講笑呀，你今晚唔好去練水嘞。」
「嘻嘻，知道喇，肥佬教練一早批咗今晚休息嚕。」早上已經跟她說了一次，可能今天太忙亂，她忘記了我今晚已有批准可以缺勤。
「你呀，仲嬉皮笑臉喎，以後每晚練完水都要嚟搵我，我要睇吓你有無事呀。」女王下達指令。
「哦～知道～王教練…」以後晚上在麗池收工，都奉旨去找阿心報告。
原來傻妹擔憂我的傷勢，比憂慮老竇知道她拍拖還要緊張。