《我老婆唔係我女朋友》【那些年／學界比賽／真人】 第四章至六章: 【第五章】 調教我女友（２）
我沒好氣的說：「挑～你有錢買汽水咩？」你條冚家祥想趁地淋？我睇死你無賭本啦。
「欸～一支汽水錢我哋幾個夾埋就夠，你夠唔夠薑先？」細豬毫不猶豫的秒回。吖，醒咗喎。
「好～一陣睇吓有無時間先。」我一於拖字訣。
「嗱，一言為定呀，咪走數呀。」肥滯自信滿滿。
「我話睇吓點呀，換好衫就去熱身啦，成日掛住吹水！」我不耐煩提高聲線的薄斥。
嘿，做教練其實是咪可以奉旨恰細路嘅呢。
出到池面，望到阿心已經在對面池邊落水，她遠遠見到我還跟我揮手，又指指妹豬示意會跟著她，見她倒也自得其樂，我也放心開始指導工作了。大半小時後，肥直吹雞集隊衝塘，這表示我的小組指導也結束了，放監！
趕快去到阿心她們在玩水的角落。妹豬見我過來，忙不迭的邀功：「我教咋喳游蝶式呀。」
我失聲的問她：「妳教姐姐游蝶式咁勁？喂唔好講喇，妳去教練度集隊先。」梗係盡快駛走個電燈膽先。
望向阿心，她笑著解釋：「佢教我向水面撲落去，跟住順勢潛游一陣，好似嗰啲水中健體操噉，幾得意吖，佢話你教佢嘅喎。」
哦，原來是我之前教他們體驗蝶式，以遊玩的方式學最基本動作，有助熟習海豚式腰腿運作，難怪妹豬自己未學懂游蝶式都可以教人。
「吓，噉都得呀。妳凍唔凍呀？」乘機拖著她的手，順勢就將她拉過來緊貼著我。