《我老婆唔係我女朋友》【那些年／學界比賽／真人】 第四章至六章: 【第五章】 初見成效（１）
初見成效
「你隻手覺得點呀？」在回家的路上，阿心關心的問我。
我稍稍郁動一下肩膞。「好似無乜事喇，其實頭先喺水度抱妳時都已經唔痛嚕。」
她伸手輕輕拉著我耳珠，作狀扭我耳仔。「哼～第日唔准咁曳呀。」
知道她在這方面一向都相當保守（所以先要調教嘛），被她識穿我想抽佢水，都有點尷尬。「嘻嘻，想睇吓肥妹有無重到啫。」
幸好她似乎未有再怪責的意思，話題一轉她繼續問：「其實你哋以前係唔係日日都咁樣自製比賽㗎？」
「係呀，日日比，時時比，咪唔會怕比賽囉。」我理所當然的答道。
「但成日都整啲不利條件出嚟，噉樣千方百計都要令佢哋輸，會唔會打擊佢哋信心㗎。」阿心似乎想為小朋友所面對的不平等欺壓，打抱不平。
「哦？我又無諗到咁深入喎，就算無頭先嗰啲古靈精怪理由，根本每日操到謝晒先嚟比賽，對身心都好大負擔㗎啦。不過啲教練講得好聽啲，話從遊玩中競賽，目的除咗煉成對比賽壓力免疫外，更重要係學會接受失敗，明白到再接再厲嘅道理，保持鬥心，跌低咗再企起身，繼續訓練再挑戰。哈哈，我細路時受訓，佢哋成日都叫我輸完又嚟賭過，有賭未為輸喎。」我自己就不知道這些道理是真是假，反正我就是吸收這種似是而非的理論長大，而又未去跳樓的。
她沒好氣的說：「激死，明明練游水，點解講到開賭檔噉，不過又真係可以訓練吓抗逆能力嘅。」