《我老婆唔係我女朋友》【那些年／學界比賽／真人】 第四章至六章: 【第六章】 有一種女生叫暖姊（３）
那時候在港灣道，除了美女目不暇給外，還會經常碰到「水陸兩路」猛人出沒，事關【灣仔池】是游泳港隊的搖籃，【灣仔場】就是田徑港隊的英雄地！
「哈哈，差唔多啦，有工咪做囉。」我知短時間都有理說不清了。
這時候班細路開始你一言我一語加把嘴，又話遲到呀，又話我係男朋友呀之類。
我還未來得及反應時，Lulu已經厲聲訓斥：「你哋唔見老師講緊嘢咩，有少少耐性，畀啲禮貌得唔得？仲有成半個鐘頭點會遲到呀！」
唉～你班小粉皮又係唔識死嘅，女生發言時你劖亂歌柄？就算我嗰隻小吱喳講嘢，我都要嚴守「不要問只要聽」啦。
我隱隱嗅到現場開始有煙硝味，都是快快幫佢打圓場，跟手鬆人返學校瞌返陣好過。「小朋友，我係『搣時呂』以前嘅補習學生，後來佢唔教我，我就讀書唔成，去咗對面泳池做清潔囉。」
吸引了班小粉皮注意之後，再苦著臉以低沉顫抖的聲線說：「仲有呀『搣時呂』罰人好狼死㗎，我以前高過佢㗎，因為多口畀佢罰企，企到條腰都伸唔直，你哋頭先都見我行路都拐下拐下，成個阿伯噉啦。所以千祈要聽『搣時』話呀，唔係好大鑊㗎。」親眼見到我寒著背䠋下䠋下的事實，配上似是而非的內容，嚇到班小粉皮臉如土色。
Lulu跺足嬌嗔：「仁呀！你嚇嚫啲學生呀！」
恐嚇完小粉皮後，擰轉頭乘他們不察，再低聲跟Lulu告辭：「第日再約埋『阿邊個』食飯先再傾啦，妳又週身唔得閒。」「阿邊個」自然是佢個老同、我個女友了，費事畀班細路聽到又多事。