《我老婆唔係我女朋友》【那些年／學界比賽／真人】 第四章至六章: 【第六章】 宅の聖殿（３）
【信和】地庫基本上是「歌廳」，每間鋪都在獨家試播老闆自己的專業推介，所以你只需要每家鋪面企一陣，基本上就知道嗰期有甚麼新歌了，落電梯位有門口細細的【Echo CD】，街尾有獨家碟評的【鐳射唱片交易所】，扶手梯底橫跨走廊三鋪開放式設計的【CD經濟特區】…
而且專賣廣東碟的老闆大多是口水佬，就算唔幫襯都異常好傾，新碟有無貨幾多錢，隨口問就可以，根本懶得自己睇；如果手緊就上M層的【Sky Music】和【mini shop】，面懵懵可以講吓價嘅（睇人啦、睇老闆心情啦），但想買日本CD如我者，往往只能幫襯「威名遠播」的【賊船】和【黑店】了。
去到【黑店】門口，老奉在播片作招徠，日本劇集、動畫、演唱會，有時候甚至只是播放日本廣告，對於從未踏足日本的廢青（我是大鄉里，廿幾歲仔都未坐過飛機呢），是非常有吸引力的，今天在小電視上播放的是ZARD的現場演唱片段，ZARD是在兩年前（1991）年出道的日本組合，一開始人氣不怎麼樣，老實說我是因為清純樸素的主音坂井泉水才有注意到這個組合的，她演出時多是非常簡單的打扮，黑直長髮，永恆都是長袖恤衫牛仔褲（回想起來，瘦妹跟坂井泉水的形象有點相似呢，樸素的妝扮其實都可以好靚的，唔知日本妹有無港女咁野蠻呢～）。
今天聽到（看到？）她這首歌，節奏輕快非常動聽，聽了一會發現真的不錯啊，不如入去問問價錢吧；【黑店】之所以被稱頌為黑店，以及在【信和】名垂千古，是有其獨特原因的。一進門口見到一個西面大漢，我已經被佢嘅西氣凶得窒了一窒。