《我老婆唔係我女朋友》【那些年／學界比賽／真人】 第四章至六章: 【第六章】 元洲街邨的邪神傳說（２）
此時妹豬煞有介事般過來問我：「仁呱瓜你識唔識倒立呀？」
我怔了一怔，失驚無神妳問我識唔識倒立？「我倒垃圾就識，咪阻Q住我睇公仔書啦。」
她卻鍥而不捨的追問：「唔係呀，我想練定呀。」
我剛揭開本公仔書內頁，隨口敷衍：「咩呀～倒垃圾返屋企練啦，唔好同我講啦。」
這時候文仔加入戰團：「你識呀？教我吖，我都想學定先呀。」文仔是我泳式改良組中比較出色的小男生。
練倒立這個話題，終於成功引起我的注意了。「咩料呀，呢期興玩倒立咩？一陣唔好練水喇，叫阿直教倒立啦～笨，我賭佢識『倒立再盤膝』練『九陽天殘』添呀，哈哈～」幻想肥佬扮王小虎個樣，不禁笑了出來。
豬妹急急再說：「唔係呀，你唔知咋，你問吓攣毛吖。」
豬妹叫了攣毛過來解釋事情始末，似乎攣毛才是始作俑者。
「仁哥哥，你唔知喇，學校嚟咗個『火雲邪神』呀。」攣毛憂心忡忡的跟我說。
我連忙揭開本《龍虎門》內頁指俾佢睇。「呢個火雲邪神？易筋經『黑級浮圖』喎？小學都有咁堅嘅高手？」我幾乎噴飯，小學雞真係乜都敢死。
「老師嚟㗎，好惡㗎，佢成日著紅色衫，啲同學叫佢『火雲邪神』囉。」攣毛繼續繪形繪聲的形容。