《我老婆唔係我女朋友》【那些年／學界比賽／真人】 第四章至六章: 【第六章】 顏文字二人組（３）
難得失散幾年咁難才能重聚，第一時間當然是抄牌先啦。
我醒起剛才阿祥提過搞聯校活動：「你頭先話搞聯誼燒烤，真㗎？喂熱到仆街喎。」今天作打風，天氣超級悶熱，非常應景。
Leon聽到有活動搞格外留神，和我一齊望著阿祥。
阿祥說：「我哋Astro每年都搞聯校觀星暨燒烤會㗎啦，今年八月諗住睇英仙座流星雨（Perseids），聽講今年會係史上最多嘅大爆發，每小時睇到幾百粒㗎。」
「我門小你鹵味，參加天文…學會？熱屎辣辣燒嘢食仲餵蚊喎，睇『周星星』都無心情啦。」一想到天時暑熱仲要對住個火爐，真係乜嘢心情都無晒，肥人又是份外惹蚊的。
Leon接口對我說：「話你無文化哩，一世人無幾多次睇到流星雨咋。英仙座流星雨多火流星，大爆發時仲會出現彩流星呀，係非常容易觀察到嘅流星雨。」
Leon一副專家口吻續說：「仲有呀，醉翁之意點止睇流星咁簡單吖，佢哋實有下文嘅，點會餵蚊啫。」
我一頭霧水的望向Leon：「點解你又好似好醒噉呢？」
「哈哈，因為【神都】一早搵過我，問我哋有無興趣一齊搞囉，頭先關於流星雨啲資料都係佢哋啲文宣，不過我搞緊『聯校水運』唔得閒理佢哋之嘛。」Leon娓娓道來。