《我老婆唔係我女朋友》【那些年／學界比賽／真人】 第四章至六章: 【第六章】 竹 心 理（４）
「哦，噉有無搞啲咩re-u呀，平日有無約下去玩呀？組爸唔係應該抄晒你哋牌咩？妳知唔知佢有無女朋友吖？」我奇怪啲「獸父」不是應該主動擒羊麼？當年聽到召喚re-u（re-union，O Camp後的重聚聯誼），我幾乎想殺人，梗係唔會去啦。
「無呀，完咗O Camp大家都好少聚會啦，各有各忙嘛。聽講好似無囉，但平日佢身邊都有好多女同學一齊呢。」Lulu說完好像帶著一絲愁緒。
聽落【肉園】的生活好像比我們艱苦，校內課業之餘，又實習、又帶隊，所以畢業後的起薪點比商科生高一大截都無可厚非的。
這情報對於份屬「陳瀡」青梅竹馬的我根本不是新聞，不禁點頭同意：「係呀，佢以前都成日俾囡圍嘅，睇見都眼冤，都唔知佢有乜咁好？」我認我和Leon都是葡萄他的。
「吓…佢…都好識照顧人吖，斯文有禮貌，個人又高大靚仔，成日都對人微笑…喂！你男人之家，咁八卦做乜嘢啫！」說著說著，Lulu終於察覺不妥。
又係嘅，條友鄉下話都唔講多句，舉止溫文又身高、外貌出眾，總舵主簡直係一眾女大生的夢中情人（點呀，現代叫男神喎～我呸！）。
「唏，我關心吓妳想點，睇吓有無機會幫吓手嘛。」想不到直腸直肚的她也會警覺到我盤緊佢。
「唔…使喇～都無機會…」
我是第一次看見這個朝氣蓬勃的傻大姐露出淡淡的落寞之色。
「Lu竹，學阿心話齋，唔盡力試過又點知唔得呢。」我記起心媽的教化。
「真㗎？」她馬上又喜形於色，這個高妹比瘦妹更單純。
我聳聳肩：「鬼知咩，試試囉。」
吹吹吓又夠鐘準備游決賽了。