[少甜] 《未曾存在的理由：發生喺半套店嘅沉船故事》: 第十九章
「我爸爸以前好鍾意喺車播呢首歌，你有冇聽過
『能同途偶遇在這星球上
是某種緣份 我多麼慶幸
如離別 你亦長處心靈上
寧願有遺憾 亦願和你遠亦近』」Candy坐喺梳化，清冷咁哼出呢首歌。
「係張國榮嘅《春夏秋冬》。」我回答。
「我唔鍾意佢嘅歌喉，不過呢首歌真係唱得好有感情。人生有經歷之後先流露到嘅真實感受，每一句都聽到佢背後嘅故事咁樣。」Candy坐咗喺大廳嘅梳化，漫不經心咁評價。
琴日掛起嘅衫雖然未完全乾透，不過都可以勉強著上身。經過一晚風雨之後，太陽再次掛起，光線傾斜曬入客廳，粉色嘅傢私都鋪上一層情愫。而家可以話係集齊各種成功表白嘅條件：一個溫馨嘅夜晚、浪漫嘅渡假屋氣氛、Candy帶有愛意咁唱歌。
事情發展到呢度，我都無唔表白嘅理由。
我靠近梳化，拖起Candy嘅雙手，望住佢水汪汪嘅雙眼，準備將說話講出嚟。
「我好鍾意⋯⋯」我直接表白。
「其實講到尾，你鍾意我啲咩？」說話畀Candy打斷。
「我都唔係太清楚。遇見你之後，覺得好多嘢都好似整定。第一次見到你喺廳補妝，就好似已經有緣份鋪排好呢一切。原來當一個人進入咗愛情狀態，就會相信一切背後都係有理由嘅。」我回答。
「如果你當時遲咗幾分鐘出房門呢？可能當刻錯過咗我，你就會將同一份愛情轉移俾另一個女仔，嚟南丫島嘅就係另一個人。」Candy似乎將佢埋藏已久嘅心底話講出。
「不過最後我遇上嘅嗰一個始終係你。」我回答。
「啫係你由頭到尾搵嘅唔係命運安排好嘅Perfect Match。你只係需要一個對象，而嗰一個係邊個都無所謂，你只係偶然咁選擇咗我，明明你真正需要嘅根本可以唔係我。」Candy回應。
「如果你相信愛情要經營過先有價值，我唔怕以呢個為前提為你付出。咁樣假設，就算我哋唔係上天打造嘅一對都無所謂，亦都無需要再依賴緣份。」我補救住我嘅諗法。
「原來你一直都無明白過。」Candy漠然咁回應。
就好似Candy咁講，可能我一直都無明白過。
當初喺大廳見到佢補妝，根本構唔成理由去愛上佢。如果我遇見嘅係另一個人，我仲有冇愛上Candy嘅可能？會唔會由始至終，我只係將愛情隨意投射喺其他人身上。
「或者我只係唔識得獨處，自私咁想搵一個對象逃避。」我回應。
「唔係。我哋只係唔好彩，喺中間性嘅地方相遇。我唔相信緣份，亦唔相信需要經營嘅愛情，只係想捉緊每一秒活在當下。你之所以會愛上我，係因為你喺需要愛情嘅嗰一刻遇到我；亦因爲你愛上我，先會感覺到有命運嘅安排。其實我哋都需要接受我哋之所以會遇上，只係偶然，而唔係背後有啲咩價值支撐。」Candy將佢嘅愛情觀講出。
「你係唔係已經做咗決定？」我逃避將佢嘅說話放入耳，我只係想知道答案。
「我琴晚已經正式同老細講咗唔做。過埋今日，我哋以後唔好再聯絡啦。我唔想俾你知道更多我嘅背景，我一個人收埋喺心就可以啦。如果個世界係公平嘅，我可能就唔需要入呢行，到時我哋都唔會相遇。我好介意自己喺到做，亦都唔想將呢啲記憶帶到去以後。你明白我意思嘛？」Candy慢慢將說話講出。
「我唔介意同你分擔。」我回應。
「但係我介意。點解你要喺呢個時間出現喺我生命入面？點解就唔可以係其他時間，其他地方？」Candy肯定咁回應。
「事情之所以發生，係因為事情發生，我同你都控制唔到嘅。」我扮住淡定，試圖安慰Candy，講出呢句廢話。
Candy咩嘢都無講。
我唔敢望住佢嘅神情，只係坐喺梳化，望住前方，唔自然咁將香煙放喺口唇。正想點煙時，諗起我哋之間發生過嘅經歷，所有意識都被吸入去，連聲音都停止，只有深深嘅沈默，沈默以外咩嘢都無。
當我舉頭望向Candy時，見到佢緊閉住雙眼。我伸手撫摸佢嘅頭部，感受佢嘅溫暖，但又似乎有啲無形嘅嘢喺到消失緊。我試住去搵，但係搵唔到，可能歸咎只係無形嘅嘢。
「咁你有冇鍾意過我？」我唔甘心咁問。
「有。你啲話題有種魔力，每一句都會將我拉入去你嘅世界咁。邊有人嚟玩會講咩粉紅色大象？傻佬，你知唔我每次開房門真係會諗起你。你就係咁樣㗎啦，要人哋認識你嘅生活。每當我慢慢揭開你諗法嘅時候，越發現自己俾你深深咁吸引住，連自己都控制唔到咁去諗你嘅嘢。」Candy凝視住窗旁，慢慢回憶起我哋嘅過去。「我翻睇咗好多次《Call me by your name》，套戲明明好悶，但係又好想繼續發掘你喺戲入面睇到嘅感受。好想認識你嘅全部，將自己嘅名連結去你嘅世界。」
究竟我哋嘅名字有冇曾經連接過？好多事情，只係我相信存在過，並無問過Candy嘅諗法。唔理結果會唔會再傷害我，我仍然想知道Candy心入面嘅思緒。
「我可唔可以知道你真名？我想以後都會記得。」我問。
「咁樣可能你會好難受，但你可唔可以只係記住我叫Candy，做我喺中間性嘅地方遇上，留咗好多浪漫回憶，交過心，獨特而且唯一嘅嗰個男仔。重要嘅根本唔係結果，而係過程。我唔可以將你帶去我嘅現實世界，呢個係唯一原則，但我會好好咁記住呢段回憶。」Candy回應。
「睇嚟我真係咩都唔知。就算到咗呢一刻，我都只係諗到自己。」我抬頭望向Candy。
「你可唔可以就埋我呢次？」我哋終於眼神接上，Candy流露出怜愛嘅表情。
點解Candy呢一刻都仲咁可愛？
「呢一次係唔係要就一世？如果我以後諗起你咁點算？」我問。
「一世好似好沉重，不過睇嚟會係咁。」Candy回應。
「我哋之後仲會唔會再見？」我問。
「我只係想跟隨內心嘅諗法，話唔定有一日會再見，不過我唔可以答應。」Candy回應。
最後一次，我將佢抱入懷內。
如果錯過呢次機會，Candy就會真真正正咁消失喺我面前。比起Divya嘅擁抱，今次我更加把握唔到仼何嘢，連點樣面對自己都唔知道，只知要攬住佢直到嗰一秒嘅來臨。我感受到唔真實嘅氣息，慢慢咁從Candy嘅身上轉移去到我身上。咁樣或者可以得到Candy內心深處某啲重要嘅嘢，所以我更加緊抱住佢，接受呢一份情誼，等我可以最後一次擁有佢。
如果真係有國境之南，我會奮不顧身咁捉緊佢，唔俾緣份喺我哋之間擱淺。就算返到嚟現實世界，我仍然想坦然咁將佢挽留，哪怕只有一部分。
「應承我，大家做心入面唯一嘅嗰一個？」我開口嘅同時，眼水終於忍唔住從眼框滲出。
「係，一世嘅，我應承你。」Candy隱約嘅喊聲喺我腦海中迴盪住，一股熱淚滴到我手上面。
討厭嘅時間一分一秒咁流逝住，嗰一刻已經嚟到。Candy安撫住我，然後拎起行裝，先我一步離開渡假屋。我帶住最後嘅信任，並無追到上去，只有自己一個留喺僻靜嘅角落，竭力制止住情緒嘅入侵，但此刻腦入面只有諗到Candy，連悲傷都稱唔上。
或者呢個係Candy嘅理由。